1 Korintios 9:1-27
9 Adxaꞌ Jesus jxkaahnisateweꞌsxthu, naa paꞌga sãꞌjĩniꞌs jxuka pẽywaꞌj jiꞌpthu, txãa paꞌgatey kweꞌsxtxi jxpeꞌjsa Jesusaꞌs iiuythu, saꞌ txajx tasxte mjĩith açaꞌ adx mjĩiçxa Jesus tasxte kuutxaꞌjnisa iꞌkwe iꞌkweꞌsxaꞌ.
2 Vxitesa adxaꞌs weꞌweçxaꞌ: Pabloꞌ Jesus jxkaahnisateweꞌsxmeꞌ jĩsawa ũswáatxna. Nawa iꞌkweꞌsx yuꞌ txãꞌjĩyaꞌ ãjameeneꞌkwe. Adxaꞌ Jesukristo jxkaahnisateweꞌsxte íiçxáa iꞌkweꞌsxaꞌ Jesukristoꞌs nwẽeseꞌjsa iꞌkwe adx ptaꞌsxte.
3 Adxna nuyweꞌwesatxiꞌ naꞌwẽth pasuꞌ:
4 Adxaꞌ ũꞌwaꞌjaꞌs jxuka pẽjxyaꞌ ãjawaꞌjsath.
5 Maꞌwẽta Jesukristo jxkaahnisaweꞌsxwa txãaweꞌsx nyuutx peꞌjçxa sãꞌjĩni fxiꞌzeꞌ vxiteꞌ Jesus nyakh, Pedroweꞌsxwa, açaꞌ adxçxáa ¿kĩh yũuçxa txãꞌwẽy yũuyaꞌ ãjamée yuukiꞌth?
6 Bernabé yakh kweꞌsx eꞌzsaçxáa wáa Dxus yuweꞌs ptaꞌsxna uꞌjuçxawa ¿naa kiwete mjĩiaꞌs nvxiitwaꞌjsamée neꞌtkaꞌw?
7 ¿Maa soldauçxáꞌ sãꞌjĩnimée fxiꞌzegáꞌ? ¿Kimga uuthasx vxitçxaꞌ, kxtee yũnniꞌs ũꞌweꞌçmée? ¿Kimga kla takiꞌjçxawa txãa klaa leçxiꞌs tudxiꞌçmée?
8 Adx ũusuhçxáa txãꞌwẽ yajkxçxa weꞌweꞌçmeeth. Txãꞌwẽmeete íik Moises leytewa txãꞌjĩꞌ.
9 Kxteeaꞌ naꞌwẽ fxiꞌjniꞌ: Bweyaꞌs kmaajĩꞌjiççxaꞌ, yuweꞌs tudwaꞌjmeꞌ iiũꞌ mjĩikahn jĩꞌk. Dxusaꞌ txãa bweyçxáatx peeygãhçxa txãꞌwẽ weꞌwemeꞌ,
10 wejxwa kweꞌsxtxi weꞌweçxak txãꞌjĩꞌ, txãa paꞌgatey txãa leyaꞌ kweꞌsx jĩik yuꞌ naa paꞌga. Txãꞌwẽ uuthasxsu mjĩisa maꞌk yuu meeçxaꞌ kiweꞌs wuwsa maꞌk yuu nawa kxtee mjĩiniꞌs kutxiꞌjçxa ũꞌweꞌnja sũhnak mjĩꞌ.
11 Txãꞌwẽ yãꞌtheꞌ, kweꞌsxwa iꞌkweꞌsx ksxavxysu Dxus jĩi mjĩisathaꞌw açaꞌ iꞌkweꞌsxaꞌ miiyajkxwe ¿kweꞌsx mjĩipaꞌga ũꞌwaꞌj kĩhçxáawa jxpaꞌgawaꞌj jiꞌphmeemthaꞌw?
12 Vxite mjĩisawa ũꞌwaꞌjaꞌs jxpaꞌganeꞌta açaꞌ ¿kweꞌsx yuꞌ wejx txãꞌwẽ jxpaꞌgawaꞌjsameemthaꞌw?
Txãꞌwẽçxawa kweꞌsxaꞌ mjĩipaꞌga ũꞌwaꞌjaꞌs iipẽjxmeethaꞌw, wejxwa kweꞌsx peejiniꞌs wantaĩꞌthaꞌw, Kristo kaapiyaꞌjniꞌs yupsá naꞌwẽ yuuyaꞌmée.
13 Iꞌkweꞌsxaꞌ jii iꞌkwe dxuus yatte mjĩisaꞌ dxuus yatte ũꞌ yakhtxi fxiꞌzeꞌ. Txãaweꞌsxaꞌ naꞌwẽtx yuꞌ: altalte puꞌçxsaꞌ kxtee niimal ikhni çxiçxaꞌstxi ũꞌweꞌ.
14 Kristowa txãꞌwẽyçxáak jxkaajaꞌ: Dxus yuwe ptaꞌsxsa txãaweꞌsxaꞌ kxtee sãꞌjĩni fxiꞌzewaꞌj jiꞌphtaꞌ jĩꞌk.
15 Nawa adxaꞌ bagaçx yuhwa iipẽjxmeeth txãꞌwẽ sãꞌjĩwaꞌjaꞌs, saꞌ iꞌkweꞌsx kĩhçxáawa peeskahn txãꞌjĩna fxiꞌjaçmeeth. Kĩhwa sãꞌjĩmeetewa wẽtthu fxiꞌzeꞌ naꞌ txãꞌwẽ iꞌkweꞌsxtxi thãasmey uuwaꞌjsath.
16 Adxaꞌ Dxus yuweꞌs ptaꞌsxpaꞌga iiwejçx yaakiçmeeth, txãa mjĩiaꞌ adx jĩimeꞌ, Dxus jĩꞌ txãa paꞌga. Açaꞌ Dxus yuweꞌs ptaꞌsxmeeçxaꞌ, wala yuh seenaꞌ yuuwesa yuꞌnja.
17 Txãꞌwẽ dukh jxthãasçxa mjĩi pakwewaçaꞌ, txãa mjĩipaꞌga jxpaꞌgawaꞌj jiꞌpthu sũjuꞌnja. Nawa txãꞌwẽ yajkxçxa mjĩinisa yuꞌçmeꞌ. Txãa mjĩiaꞌs Dxusku ũs, açaꞌ txajx jxkaahniçxáꞌs kxtey yuuwaꞌj jiꞌpthu kĩhwa dukh jxthãasmée.
18 Dxus yuweꞌs wẽt weçxana ptaꞌsxni adx yakhaꞌ dukhni naꞌwẽsaꞌ, açaꞌ adx mjĩipaꞌga iꞌkweꞌsx yuutxiꞌs dukh jxthãasuꞌçmeeth.
19 Txãꞌwẽ adxaꞌ dukh jxthãasmée ũsthu, açaꞌ adxaꞌs kim yuhwa jxkaahwaꞌj jiꞌphmeetaꞌ. Nawa Kristo tasxte nasa kuh nuypaꞌjyaꞌ sũhçxa yuuçxáath selpisáa yuu jxukaysatx.
20 Bagaçxtewa judiuweꞌsx yakh ũsçxaꞌ, judiu naꞌwẽythu yuꞌ, txãaweꞌsxtxi Kristo jĩi knayyaꞌ. Adxaꞌ Moises leyaꞌs nwẽeseꞌjeçíi yuꞌ meeçxawa Moises leyaꞌs nwẽeseꞌjsa yakh ũsçxa yuꞌ, txãa leyaꞌs nwẽeseꞌjsa naꞌwẽythu yuꞌ, txãaweꞌsxtxi Kristo jĩi knayyaꞌ.
21 Saꞌ vxite nasa Moises leyaꞌs jiimeesa yakh ũsçxaꞌ, adxwa txãaweꞌsx naꞌwẽyçxáath jiimeesa naꞌwẽ yuuna fxiꞌzeꞌ makwe Dxus leyaꞌs yuꞌ nvxihtmée ũsçxawa, txãa paꞌgatey Kristo jxkaahniꞌsthu nwẽeseꞌjna fxiꞌzeꞌ. Nawa txãaweꞌsxtxi Kristo jĩi knayyaꞌçxáath txãꞌwẽ yũꞌ.
22 Dxusaꞌs açxamée ew jiisa yakh ũsçxaꞌ, adxwa txãꞌwẽy jiimeekwesa naꞌwẽth fxiꞌzeꞌ. Nasa maꞌwẽkwesateꞌ, adxwa txãaweꞌsx naꞌwẽyçxáath fxiꞌzeꞌ, txãꞌwẽ yũuteꞌ maaçxáawa ewte neeyũuwaꞌjaꞌs uyuwáatxna sũhçxa.
23 Txãasath kĩhtewa jxuka txãꞌwẽ yũuna fxiꞌzeꞌ, Dxus yuwe ewsaꞌs vxitetxwa jxtxuhdeyaꞌ.
24 Iꞌkweꞌsxaꞌ peekx jii iꞌkwe wuwuuçxa knay wẽesaꞌ kxazíi jaꞌdaçxahtx wuwuꞌ, peeswaꞌj ũsna txãꞌsna knayyaꞌ. Nawa teeçxsa yuuçxáak knayuꞌ. Txãa knaysawa maꞌwẽga çxhãçxha wuwuꞌ, iꞌkweꞌsxwa txãꞌwẽy myũuwe, peeswaꞌj ũsna txãꞌsna jxpaꞌgayaꞌ.
25 Maawa wuwuuçxa knay wẽesaꞌ txãaweꞌsx kakweꞌs kaapiyaꞌjna pheuꞌjuꞌtx yaçkhẽy. Txãaweꞌsxaꞌ naa kiwete korona pçuwaꞌjsaꞌs jxpaꞌgayaꞌçxáatx txãꞌwẽ yũꞌ. Nawa kweꞌsxaꞌ bagaçxte yuhwa pçuwaꞌjsameꞌs jxpaꞌgayaꞌthaꞌw txãꞌwẽ paꞌpçxuꞌ.
26 Adx txãꞌwẽ yũuççxaꞌ, maꞌwẽ wuwuuwaꞌthewa jiimée yuꞌ wuwuumeꞌnja. Adxaꞌ puiiyaꞌ jiimeesa naꞌwẽ fxiisuçxáa ujkameꞌnja.
27 Txãꞌwẽ yũuyaꞌmée, adx kakweꞌs kaapiyaꞌjaꞌth. Txãꞌwẽmeꞌ, vxiteçxáatx ew kaapiyaꞌjçxaꞌ, kaapiyaꞌjsa adx yuꞌ seelpimeesa yuuyaꞌmée.
