1 Pedro 1:1-25
1 Adxaꞌ Jesukristo jxkaahnisa Pedro yaaseth. Naa kartaꞌs fxiꞌjaçthu vxite kiwesu uꞌp-yaꞌ uꞌjsaweꞌsxtxi, Ponto, Galacia, Kapadocia, Asia, Bitinia txãa kiwesuweꞌsxtxi.
2 Iꞌkweꞌsxtxi txhitxhwaꞌjaꞌs Dxus kweꞌsx Tataꞌ nyafxiitey maꞌwẽneꞌ pheuꞌjçxa jiꞌphuꞌ txãꞌsaꞌ kxtey yuuk. Txãasak Dxus Espirituꞌ iꞌkweꞌsxtxi ewmeejũ txuhdeçxa Jesukristo eeju nuyaate Jesukristoçxáꞌs nwẽeseꞌkhan. Txãꞌwẽ Dxus puꞌçxpaꞌga ãçxhaꞌ seenaꞌ wala wẽt mfxiꞌzewe.
Naꞌwẽsaꞌs jxpaꞌgayaꞌ ũythasna fxiꞌzeni
3 Ãçxhaꞌ kweꞌsxtxi jxpeꞌjsa Jesukristo Tataꞌs weçxana tuutheꞌjega. Txãꞌ kweꞌsx ewmeesatewa peeygãhçxa kiꞌ uꞌse upxsa naꞌwẽ yuuwaꞌjaꞌs vxitku, nawa Jesukristo kweꞌsx paꞌgate uuçxa kiꞌ ĩtxi yuupaꞌgaçxáak txãꞌwẽ yũu.
4 Txãa paꞌgak ew jii yaꞌfxiꞌzeꞌ, Dxusaꞌ cielute kweꞌsxtxi ũswaꞌj jxaawni jiꞌphaꞌ txãꞌsaꞌ jxpaꞌgaꞌnjaꞌw sũhna ũythasna. Txãꞌ bagaçxte yuhwa pçumeena saꞌ suweewameena saꞌ vxituwameena.
5 Iꞌkweꞌsxaꞌ Dxusaꞌs ũuste jxpubamée yaakxwaꞌjaꞌs jiꞌphiꞌkwe, naa paꞌga txãꞌ iꞌkweꞌsxtxi jxaawuuna nmeh en ãhte iꞌkweꞌsx cielute paꞌjwaꞌjaꞌs pheuꞌjçxa jiꞌphaꞌ txãꞌsaꞌ jxpaꞌgakahn.
6 Txãa paꞌga iꞌkweꞌsxaꞌ iiméh wala weçxana meswe, makwe maa enteyaꞌ nxuswaꞌj en maꞌwẽsawa paꞌthewa.
7 Txãa paꞌgatey nxuswaꞌj en thẽysa paꞌjaꞌtx txãꞌ Dxusaꞌs jxpubamée jwee íiçxáa çxhãçxha yaakxwaꞌjaꞌs pheuꞌjsataꞌ, vxyuu bejaꞌswa ew zhiçxkwe neeyũukahn maꞌwẽga ipxte kabçxa yaꞌpheuꞌjuꞌ txãꞌwẽy. Açaꞌ makwe thẽysa nxuswaꞌj en paꞌthewa Dxusaꞌs jxpubamée yaakxniꞌs ivxiitusameꞌ vxyuu beh pçusaate jxthaakwe paꞌgasa yuuna. Txãꞌwẽ yũusaꞌ isa weçxana jxtuhthesa yuuneꞌkwe naa kiwete Jesukristo kĩi enteꞌ.
8 Iꞌkweꞌsx yafxju yuꞌ Jesukristoꞌs uymeeçxawa, peeygãhçxa nwẽeseꞌjeꞌiꞌkwe, saꞌ uymeeçxawa txãꞌsna yajkxçxa iiméh seenaꞌ wala ũuste weçxweçxa yaakiꞌiꞌkwe. Txãꞌwẽ ũuste iiméh seenaꞌ wala zhiçxkwe wẽtwẽt yaakxniꞌs ptaꞌsxyaꞌ yaꞌãjaꞌçmeꞌ.
9 Iꞌkweꞌsxaꞌ txãꞌwẽ Dxusaꞌs jxpubamée yaakxwaꞌjaꞌs jiꞌphupaꞌga iꞌkweꞌsx ũusaꞌ ewte neeyũuna.
10 Dxus peeygãhçxa iꞌkweꞌsxtxi ewte nvxiitwaꞌjaꞌs jiyuçxa ptaꞌsxsa nyafxíi enteyweꞌsxaꞌ wala paapẽjxna atxahtx ewte neeyũuwaꞌj jĩniꞌs.
11 Txãꞌwẽ Dxus Espirituꞌ txãaweꞌsxtxiꞌ dxiikhẽy kaajiyuꞌkh ewte nvxiitwaꞌjsaꞌ wala pxthaa yuuçxawa txãa eꞌsuꞌ wala jxtuhthesa yuuwaꞌjsaꞌ jĩna. Txãa paꞌgatx Dxusna selpisaaweꞌsxaꞌ jiyu wẽe txãꞌwẽ yuuwaꞌjsaꞌ kimki saꞌ bagaçxki açkiꞌk Dxus Espirituꞌ txãꞌwẽ ptaꞌsxiꞌ sũhna.
12 Txãꞌwẽ paapẽjxna ũsteꞌ, Dxusaꞌ txãaweꞌsxtxi pejka kaajiyuꞌkh txãꞌwẽ ptaꞌsxnisaꞌ iꞌkweꞌsx jĩi meeaꞌ, vxite ensuweꞌsx jĩiaꞌ jĩk. Txãꞌwẽ ewte neeyũuwaꞌj seenaꞌ wẽtwẽt-saꞌs Dxus ũsku txãꞌsaꞌ angelesweꞌsx yuhwa jweeíiçxáa wala jiyuwaçaꞌ sũjuꞌtx, txãꞌwẽ seenaꞌ zhiçxkwesa paꞌga.
Kĩh pkal yuhwa jiꞌphmée fxiꞌzekahnku Dxusaꞌ paꞌya
13 Txãa paꞌga ew miiyajkxwe maꞌwẽ ew fxiꞌzewaꞌjaꞌswa wala jxpaꞌyakx. Dxusaꞌ iꞌkweꞌsxtxi peeygãhçxa Jesukristo vxyaa enteꞌ ũsyaꞌwaꞌ txãꞌsçxáana ũythasna meswe.
14 Nwẽeseꞌjsa luuçx naꞌwẽ myuuwe. Nyafxiiaꞌ Dxusaꞌs jiimeeçxaꞌ maꞌwẽkwe peekx ũus yaakxni ewmeesateçxáa fxiꞌzeꞌ txãꞌwẽ yũunuwe,
15 wejxwa ũusuh jxuka ewmeejũ txuteeçxa ũuste kĩh pkal yuhwa jiꞌphmée mfxiꞌzewe, txãa paꞌgatey iꞌkweꞌsxtxi paꞌyasa Dxuswa kĩh pkal yuhwa jiꞌphmeesaꞌ naa paꞌga.
16 Txajíik Dxus librute naꞌwẽ weꞌweꞌ: Iꞌkweꞌsxaꞌ kĩh pkal yuhwa jiꞌphmeesa myuuwe, adxwa kĩh pkal yuhwa jiꞌphmeesath naa paꞌga jĩꞌk.
17 Miiyajkxwe Dxusaꞌ kweꞌsx Tataꞌ jĩna kxsusuꞌiꞌkwe txãꞌ kim yuhtxwa nvxihtmée jxuka pẽywaꞌjsate jiiçxaꞌ, ũukhna mfxiꞌzewe naa kiwete makwe txaçx ĩtxi fxiꞌzeꞌççxawa.
18 Yaçgaweꞌsx maꞌwẽ ewmée fxiꞌzeteꞌ, iꞌkweꞌsxwa txãꞌwẽy ewmée fxiꞌzenijũ Dxusaꞌ nweꞌwek. Saꞌ iꞌkweꞌsxaꞌ ew jii iꞌkwe txãꞌwẽ nweꞌwepaꞌga kĩh yuhwa yaꞌdukhmeꞌ naa kiwete pçuwaꞌjsa ũstaꞌ vxyuu beh vxyuu çxihme txãꞌwẽsa yakhçxáa yuhwa.
19 Naasáa Jesukristo ee yakh yuuçxáak dukhnisa yuu. Txãꞌ piisxakuẽ kĩhte yuhwa ãçaꞌmeesa ewsaꞌs ikhçxa pkaltxi yaateyaꞌ kabnisa naꞌwẽk yuu.
20 Kristoꞌ txãꞌwẽ yuuwaꞌkh txhitxhnisa yuu naa kiwe meetey, nawa naa ensuçxáak txãꞌwẽ yuuyaꞌ vxyaa iꞌkweꞌsxtxi nweꞌweyaꞌ.
21 Kristo txãꞌwẽ yũupaꞌga iꞌkwe Dxusaꞌs jiyuyaꞌ ãja. Dxus íik Kristo uutewa ĩtxi vxitçxa tuhthe nvxiht, Dxus yuuçxáana yajkxna ũythasna fxiꞌzekahn.
22 Ãçxhaꞌ iꞌkweꞌsxaꞌ Dxus Espiritu puꞌçxteꞌ, isa ptaꞌsxniꞌs wẽseꞌjçxaꞌ, iꞌkweꞌsx ũustxi yaate iꞌkwe ũusuh jxuka yajkxçxa yakhthẽꞌjweꞌsxtxi peeygãjxaꞌ. Txãꞌwẽ yãꞌjçxaꞌ, puutx teeçxsa naꞌwẽçxah yaꞌmpeeygãhwe ũusuh jxuka yajkxna.
23 Txãa paꞌgatey iꞌkweꞌsxaꞌ nasa naa kiwete pkalsa jiꞌjmée, kĩh pkal yuhwa jiꞌphmeesa jiꞌjiꞌkwe yuu. Dxus yuwe bagaçxte yuhwa pçuwaꞌjsameꞌs wẽseꞌjçxa iꞌkwe txãꞌwẽ yuu. Dxus yuweꞌ bagaçxte yuhwa pçuwaꞌjsameꞌ.
24 Txajíik Dxus libruꞌ naꞌwẽ ptaꞌsxiꞌ:
Naa kiwete nasaꞌ jxukaysa skhẽwwaꞌjsaçxáataꞌ.
Txãaweꞌsxaꞌ makwe seenaꞌ wala jiisaçxawa, jxũth tasx naꞌwẽsaçxáataꞌ.
Jxũthwa uhdxteꞌ, kitewa weteꞌk txãꞌwẽysaçxáataꞌ.
25 Nawa Dxus yuweꞌ bagaçxte yuhwa pçumée nes yuuwaꞌjsaꞌ jĩꞌk. Txãa Dxus yuweꞌs íik iꞌkweꞌsxtxi ptaꞌsxni yuu.
