1 Pedro 2:1-25
2 Txãa paꞌga ewmée yũuyaꞌ yaakxniꞌs jxuka manvxihtwe. Ĩsxiinisa, yuwejuçxáa ew weꞌweçxaꞌ ũuste yuꞌ ewmée yaakxni, vxitetx açeyaakxni, eꞌsgaçxáa ewmée nuyweꞌweni txãꞌwẽsatxiꞌ nvxihtçxa,
2 luuçx uꞌse kasehsawa maꞌwẽga leçxi ewsaçxáꞌs jxpaꞌgaꞌ, txãꞌwẽy iꞌkweꞌsx ũuste ew kçxhãaçxhaꞌjwaꞌjsaçxáꞌs mpaakwewe. Txãꞌwẽ yũuçxa Dxus yakh çxhãçxha fxiꞌzeneꞌkwe ewte neeyũuyaꞌ.
3 Txãꞌwẽ myũuwe, kweꞌsxtxi jxpeꞌjsa ewsatewa ew jiyu dxihçxaꞌ.
Kwet ĩtxisa naꞌwẽsaꞌ Kristoꞌ
4 Kweꞌsxtxi jxpeꞌjsa tasxte mutxaawe. Txãꞌ kwet ĩtxisa naꞌwẽsaꞌ. Txãꞌsaꞌ naa kiwete nasaꞌ ahçetx, nawa txãaíik kwet jxthaakwe ewsa Dxus txhitxhnisa yuꞌ.
5 Iꞌkweꞌsxwa kwet ĩtxisa naꞌwẽ iꞌkwe naa paꞌga Dxusaꞌ iꞌkweꞌsxtxiꞌ txajx ũswaꞌj yat naꞌwẽsak vxituꞌ, saꞌ txãꞌwẽçxáamée kĩh pkal yuhwa jiꞌphmée txajx tasxte yuuçxáa selpiina ũswaꞌjsak vxit, txãa paꞌga txajx tasxte utxaaçxa ewsa yuuçxáꞌs kxtey myuuwe. Jesukristo puꞌçxteꞌ, iꞌkweꞌsx txãꞌwẽ yũuniꞌs Dxusaꞌ jxpaꞌgana.
6 Txãꞌsna weꞌweçxak Dxus librute naꞌjĩꞌ:
Yat txaahwaꞌj kwet txhitxhnisa iiméh ewsa nvxiituçthu Sion judiuweꞌsx kiwete,
Açaꞌ txãꞌsaꞌ maawa jxpaꞌgasaꞌ jxpubasáa yuumeena jĩꞌk.
7 Iꞌkweꞌsx ew jiyusa yakh yuꞌ txãa kwetaꞌ iiméh wala ewsaꞌ. Nawa jiyusamée yakhaꞌ naꞌwẽçxáak yaꞌyuꞌ txãꞌwẽ yũuniꞌs Dxus librute naꞌwẽk weꞌweꞌ:
Yat txaahsaweꞌsxaꞌ kwetaꞌs ahçeçxa wãatãhtewa,
Eꞌsuyãꞌjaꞌ txãaíik thaakwe ewsa yuuna paꞌj jĩꞌk.
8 Vxite ajkhẽꞌ txãa kwetaꞌsíi weꞌweçxaꞌ:
Kwetaꞌ kxuꞌçxafxiꞌjçxa pẽtxsaçxáꞌ jĩꞌk.
Dxus yuweꞌs ptaꞌsxtewa, txãaweꞌsxaꞌ kxtey nwẽeseꞌjsameꞌ jxpubasaataꞌ, jiyuwaꞌjsamée neꞌta yuꞌ naa paꞌga.
Nasa Dxus txhitxhnisa
9 Nawa iꞌkweꞌsxaꞌ Dxus txhitxhnisaiꞌkwe, txajx tasxte yuuçxáa selpiina ũswaꞌjsa. Dxus kuseteweꞌsxiꞌkwe, kĩh pkal yuhwa jiꞌphmeesa. Txãa paꞌga Dxus txakwe wala iꞌkweꞌsxtxi ewte nvxiitniꞌs ptaꞌsxwaꞌj jiꞌphiꞌkwe. Txãꞌwẽ yũukahnku paꞌya, jiimée jxpubana çxhiꞌdxte ũsnijũ kasehçxa zhiçxkwe eenaꞌte paꞌkhan.
10 Iꞌkweꞌsxaꞌ nyafxiiaꞌ Dxus jĩi yuꞌçmée iꞌkwe, nawa ãçxhaꞌ Dxus jĩi iꞌkwe. Nyafxíiaꞌ kim yuhwa peeygãanisamée iꞌkwe yuꞌ, nawa ãçxhaꞌ Dxus peeygãanisa iꞌkwe.
Dxusna selpiina yuuçxáa mfxiꞌzewe
11 Adx yakhthẽꞌjweꞌsxtxith neeweꞌweꞌ: Iꞌkweꞌsxaꞌ naa kiweteweꞌsxmée yãꞌjiꞌkwe, txãa paꞌga peekx kakwe ewmée yũuyaꞌ yaakxnitxiꞌs nwẽeseꞌjnuwe. Txãꞌwẽmeꞌ ũusaꞌs suwsaataꞌ.
12 Dxusaꞌs jiimeesaweꞌsx ksxavxysu wala ew mfxiꞌzewe. Txãaweꞌsxaꞌ ãçxhíi yuꞌ wala açeweꞌweꞌtx iꞌkweꞌsxtxi ewmeesa naꞌwẽ. Nawa Kristo kĩi enteꞌ iꞌkweꞌsx ew yũuniꞌs uyçxaꞌ, Dxus luuçx yuh yuꞌta jĩna tuutheꞌjetxna.
13 Dxusaꞌs jii yãꞌjsaꞌ jxuka mwẽeseꞌjwe naa kiwete jxkaahwaꞌjsa nvxiitni ũstaꞌ txãaweꞌsxtxi, jxkaahsa npiiçthẽꞌjsa maꞌk yuu,
14 meeçxaꞌ jxkaahsa nuuçxsa maꞌtx yuu nawa jxuka. Txãaweꞌsxaꞌ Dxus kaahnisataꞌ ewmée yũusatxiꞌ kastigãyna vxiteꞌ ew yũusatxiꞌ nweꞌwesa.
15 Txãa paꞌgatey Dxusaꞌ iꞌkweꞌsxtxiꞌ ewku yũu jxthãasuꞌ vxitetx, txãꞌwẽ yũuçxa açeweꞌwesatx sxuunaꞌ vxit-yaꞌ.
16 Dxus nweꞌwenisa yãꞌjçxaꞌ, ew mfxiꞌzewe. Nawa nweꞌwenisa yãꞌthaꞌw açaꞌ kimwa maꞌjĩmeena sũhçxa ewmée yũunuwe, wejxwa Dxus kusete selpisaathaꞌw sũhna ew yũuwaꞌjçxáꞌs yajkxna mfxiꞌzewe.
17 Jxukaysa yakh ewçxáa mfxiꞌzewe, yakhthẽꞌjweꞌsxtxi peeygãhna, jxkaahsaweꞌsxtxi nwẽeseꞌjna, Dxusnawa txãꞌwẽy nwẽeseꞌjna.
Kristowa maꞌwẽga pkxuuni yuu txãꞌwẽy myuuwe
18 Selpisaaweꞌsxaꞌ iꞌkweꞌsx patrontxi wala jxpaꞌyakx nwẽeseꞌjna kxtey myuuwe. Iꞌkweꞌsx patron ewsaçxáatx txãꞌwẽ yũumée, patron seenaꞌ juunaꞌsatxwa ewçxáa myũuwe.
19 Kĩhwa ãhmée yũumeete Dxus yakh fxiꞌzepaꞌgaçxáa patronweꞌsx txãꞌwẽ kastigãyteꞌ, txãꞌsaꞌ nxuswaꞌjmeꞌ.
20 Nawa iꞌkweꞌsx ãhmée yũute kastigãyteꞌ, yuuwesathaꞌw naa paꞌgatx kastigãy sũhwaꞌjçxáꞌ. Nawa iꞌkweꞌsx ew yũupaꞌgaçxáa nxuswaꞌj enaꞌs jiꞌphuteꞌ, Dxusaꞌ peeygãjana.
21 Txãꞌwẽte fxiꞌzekahnku Dxusaꞌ paꞌya, iꞌkweꞌsx paꞌgate Kristoꞌ yuuwemeesaçxawa pxthaa yuuk txãa naꞌwẽy yuuwemeesaçxawa pkxuuni yuukahn.
22 Txãꞌ kĩh pkal yuhwa yũumeꞌ, saꞌ kim yuhnawa ĩsxiimeꞌ.
23 Wẽesxusatxiꞌs kaꞌtuwa wẽesxuuna pasmeꞌ. Pkxuusaatxiꞌs txãꞌwẽ yũupaꞌga iꞌkweꞌsxwa ewmeete neeyũuneꞌkwe jĩna pasmeꞌ. Txãꞌwẽ yũumée wejxwa Dxusçxáanak neeweꞌwe.
24 Kweꞌsx pkaltxiꞌs Kristok kluuste uuçxa ivxiitu, kweꞌsxaꞌ peenaꞌ yuꞌ pkalte fxiꞌzemée Dxus dxiꞌpte ewçxáa fxiꞌzekahnku txãꞌwẽ yũu. Kweꞌsx pkalaꞌ yaateni yuukahnku txãꞌ pkxuuni pxthaa yuu.
25 Iꞌkweꞌsxaꞌ nyafxiiaꞌ piisxáa vxitusa naꞌwẽ iꞌkwe ũsuꞌ, nawa ãçxhaꞌ Kristo tasxte sxawediꞌkwe, txãꞌ piisxáa thegsa naꞌwẽk jxpeꞌjeꞌ iꞌkweꞌsx ũustxi.
