1 Pedro 3:1-22
3 Uꞌyweꞌsx iimiꞌsawa, iꞌkweꞌsx nmiꞌtx kxtey nwẽeseꞌjna mfxiꞌzewe. Txãꞌwẽ yũuteꞌ, iꞌkweꞌsx nmiꞌ maaíiaꞌ Dxus yuweꞌs wẽseꞌjyaꞌ waꞌlsawa
2 iꞌkweꞌsx ew fxiꞌzeniꞌs uyçxaꞌ, Dxusaꞌs jiyuna paꞌjatxna, Dxusaꞌs mpaakwe jĩna weꞌwemeetewa.
3 Iꞌkweꞌsxaꞌ peekx kakwe ãakhẽweꞌsxçxáꞌs txakwe wala zhiçxkwesa kiꞌpna pheuꞌjwaꞌj jiꞌphmée iꞌkwe,
4 wejxwa ũuste txãꞌwẽ zhiçxkwe mpheuꞌjwe, ew yũuwaꞌjçxáꞌs yajkxna, vxitesa yakh puiimée fxiꞌzewaꞌjaꞌsçxáa pakwena. Txãaçxáa thaakwe ewsaꞌ Dxus dxiꞌpte.
5 Nyafxíi entey uꞌyweꞌsxaꞌ txãaweꞌsx ũustetx txãꞌwẽ zhiçxkwe pheuꞌjuꞌ Dxusçxáana neeweꞌwena txãaweꞌsx nmiꞌtx nwẽeseꞌjna.
6 Saraꞌ txãꞌwẽsak yuꞌ. Abrahanaꞌs ũꞌkweꞌs jxpeꞌjsaꞌ jĩnak nwẽeseꞌjeꞌ, açaꞌ iꞌkweꞌsxwa txãa naꞌwẽysa yuuneꞌkwe, txãꞌwẽy ew nwẽeseꞌjçxa yuꞌ, ãhmeeth yũu sũhna ũukh yajkxna fxiꞌzemeeneꞌkwe.
7 Txãꞌwẽy nmiꞌweꞌsxwa iꞌkweꞌsx nyuu yakh jxpaꞌyakx ewçxáa mfxiꞌzewe, uꞌyaꞌ wejxkuẽꞌ çxhãçxhameekwetaꞌ txãa paꞌga. Saꞌ txãꞌwẽçxáamée, iꞌkweꞌsx naꞌwẽyçxáa Dxus yakh fxiꞌzesataꞌ txãa paꞌga txãꞌwẽ ew mfxiꞌzewe, Dxus yakh puutx weꞌweniꞌ kxul yuukahmen.
Ew yũupaꞌga nxus knaysáa
8 Jxukaysa iꞌkweꞌsxaꞌ ewçxáa yũuna mfxiꞌzewe, vxitesatxwa teeçxsa naꞌwẽçxah peeygãhna. Weeçx yajkxmée zhiçxkwe puutx weꞌwena yakhthẽꞌj pweꞌsx naꞌwẽ mfxiꞌzewe.
9 Ewmée yũusaꞌs kaꞌtuwa txãꞌwẽy ewmée yũuwaꞌjmeꞌ, saꞌ wẽesxuteꞌ, txãꞌwẽy kaꞌtuwa wẽesxuwaꞌjmeꞌ, wejxwa txãꞌwẽ yũusatxiꞌ kaꞌtu yuꞌ ewçxáa myũuwe. Txãꞌwẽ ewçxáa yũukahn íiçxáak Dxusaꞌ iꞌkweꞌsxtxi paꞌyaçxa txakwe wala ew yũu.
10 Txãꞌwẽ yũuwaꞌjaꞌs naꞌwẽk ptaꞌsxiꞌ Dxus librute:
Maawa ewçxáa wẽt fxiꞌze wẽeçxaꞌ,
Peekx thuneꞌs ewmée weꞌwekahmen jxpaꞌyakxçxa
Iꞌkweꞌsx yuweju ĩsxiinuwe.
11 Ewmeejũ txuteeçxa, ewçxáa yũuna
Puiimée fxiꞌzewaꞌjçxáꞌs pakweçxa uu entepkaçx txãꞌwẽ yuuçxáa fxiꞌzewaꞌjaꞌ.
12 Txãa paꞌgatey Dxusaꞌ jxpeꞌjeꞌk ew yũusatxiꞌ,
Saꞌ Dxusaꞌs pakwen neeweꞌweniꞌs wẽseꞌjeꞌk.
Nawa ewmée yũusatxiꞌ txãꞌwẽ yũꞌçmeꞌ jĩꞌk.
13 Bagaçxtewa iꞌkweꞌsxaꞌ ewçxáa yũuçteꞌ, ¿kim txãꞌwẽ kaꞌtuꞌ ewmée yũukx?
14 Ew yũuna fxiꞌzepaꞌga nxuswaꞌj en jiꞌphuçxawa, weçxana wẽtwẽtçxáa meswe. Kim yuhtxwa ũukhnuwe kuh yajkxna,
15 wejxwa iꞌkweꞌsx ũuste jxkaahsa Kristoçxáꞌs weçxana mneeweꞌwewe. Naꞌwẽ iꞌkweꞌsxtxi kaapiyaꞌjniꞌs jii iꞌkwe txãꞌsna paapẽysatxiꞌs pasyaꞌ thaamemée meswe bagaçxtewa, saꞌ ũusçxa weꞌwemée ewçxáa mpaaswe.
16 Txãꞌwẽ ew yũuçxa mfxiꞌzewe, iꞌkweꞌsx ũuste yuuwemeethaꞌw sũhwaꞌjçxáa ũusuthekahn, kxah Kristo yakh ew fxiꞌzesatx eꞌsga ewmée nuyweꞌwesaweꞌsxaꞌ thaameetxna, txãꞌwẽ iꞌkweꞌsxtxi ewmée nuyweꞌweçxaꞌ.
17 Wejxwa ewmée yũuçxa nxus knayupkaçxte, ew yũupaꞌga nxus knayni wejx ewaꞌ, Dxus yuu txãꞌwẽ jxthãas yãꞌtheꞌ.
18 Kristowa txãꞌwẽyku pxthaa yuuçxa uu, tee dxiꞌjçxáa jxukaysa paꞌgate. Txãꞌ ewsak yuꞌ, nawa kweꞌsx ewmeesa paꞌgate pxthaa yuuk Dxus tasxte nuypaꞌjyaꞌ. Txãꞌ isa uuyujk kakwe yuꞌ, nawa ũus yuꞌ uumeꞌ.
19 Txãasak uꞌj uusaaweꞌsx ũus preesu ũsuꞌtx kxtee ptaꞌsxyaꞌ.
20 Txãaweꞌsxaꞌ nyafxíi Noé enteꞌ nwẽeseꞌjsameetx yuꞌ Dxusaꞌs. Txãa enteꞌ Noeaꞌ barkoꞌs pheuꞌjuꞌçpkaçxhaꞌ, Dxusaꞌ wala yuh ũythasku txãaweꞌsxtxiꞌ nweꞌweyaꞌ. Nawa oçxo nasaçxáatx yuꞌju nweꞌwenisa yuu.
21 Noé ente yuꞌaꞌ ãçxh yuꞌte yaꞌbautisaĩꞌthaꞌw ewmeejũ jxukate txuteeyaꞌ sũhçxa txãꞌwẽsak yuꞌ. Nawa bautismoꞌ pkalaꞌs yaateꞌçmeꞌ, naasáa Dxus dxiꞌpte peena yuꞌ pkalte fxiꞌzeyaꞌmée sũhçxaçxáak yaꞌbautisãynisa yuꞌ. Açaꞌ Jesukristo uuçxa kiꞌ ĩtxi yuunisa yuuçxáak kweꞌsxtxiꞌ nweꞌwe.
22 Ãçxhaꞌ txãꞌ cielun uꞌjçxa Dxus pukate jxkaahna ũsaꞌ, açaꞌ txãꞌsaꞌ angelesweꞌsx maꞌwẽsawa txãꞌsçxaçxáanatx nwẽeseꞌjeꞌ.
