1 Pedro 4:1-19
4 4:1-2 Kristowa maꞌwẽga txajx kakwete akasaꞌs jxpaꞌgana pxthaa yuu, txãꞌwẽy iꞌkweꞌsxwa pxthaa yuuwaꞌjsathaꞌw sũhna meswe, txãa paꞌgatey peekx kakwete ewmée yũuyaꞌ yaakxni pkalaꞌs nvxihtçxa, Dxus jxthãasniçxáꞌs uu entepkaçx kxtey yuuyaꞌ yaakxpaꞌgak pxthaa yuuwaꞌj en paꞌjaꞌ.
2 —
3 Pkalaꞌs nwẽeseꞌjmée nvxiht-yaꞌíi nyafxíi entey wala yãꞌjneꞌkwe nwẽeseꞌj Dxusaꞌs jiimeesaweꞌsx yakh jaꞌdaçxah. Txãa ensuꞌ iꞌkweꞌsxaꞌ ewmée iꞌkwe yũuna fxiꞌze peekx kakweju ewmée yũuyaꞌ yajkxna, tũuna, kuꞌjna, pkhaakheçxa tudxna, Dxus ĩtximeesatx neeweꞌwena.
4 Txãꞌwẽ yũusaiꞌkwe yuꞌ. Nawa ãçxhaꞌ iꞌkweꞌsxaꞌ peena yuꞌ txãaweꞌsx yakh txãꞌwẽ iiméh seenaꞌ ewmée yũuna fxiꞌzeꞌçmeeneꞌkwe, txãa paꞌga neꞌta iꞌkweꞌsxtxiꞌ ewmée nuyweꞌwena açeꞌ.
5 Nawa txãaweꞌsxaꞌ Dxusna paswaꞌj jiꞌphutxna, ĩtxisa maꞌtx yuu meeçxa uuniisa maꞌtx yuu nawa jxukaysatx paapẽywaꞌj enteꞌ.
6 Uusaaweꞌsx maꞌtx yuu nawa paapẽy enteꞌ kakwe jiꞌphsa naꞌwẽyçxáa paapẽyni yuutxna. Açaꞌ uuteꞌ ũus yuꞌ Dxus naꞌwẽyçxáa ĩtxi ũskahnku txãꞌwẽ ptaꞌsxni yuu. Txãꞌwẽ yuuwaꞌjsate íiçxáak uusaaweꞌsxtxiwa Dxus yuweꞌs ptaꞌsxni yuu txãaweꞌsx uumeyna.
7 Naa kiwe pçuwaꞌj enaꞌ utxaaçaꞌ. Txãa paꞌga iꞌkweꞌsxaꞌ wala jxpaꞌyakx meswe, naasáa Dxus yakh yuuçxáa puutx weꞌwena mfxiꞌzewe.
8 Nawa iꞌkweꞌsx pweꞌsx puutx peeygãawaꞌjaꞌs wejx jxthaakwe mpaꞌpçxuwe, txãa paꞌgatey peeygãanisaꞌ pkal makwesanawa jxuka kaapeltunaĩꞌkh jĩꞌk.
9 Yakhthẽꞌjweꞌsxtxi yat mpeekiꞌjwe waꞌlmée.
10 Teeçxsa naꞌwẽçxah puutx yaꞌmpuꞌçxwe, iꞌkweꞌsx selpiiyaꞌ ãjawaꞌjaꞌs Dxus maꞌwẽneꞌ ũs txãꞌsaꞌ kxtey yuuna. Dxusaꞌs selpiwaꞌjaꞌs nakwe wala kuh jwed ũsni yuuk txãꞌsaꞌ jxpaꞌgaçxaꞌ, ew kaaselpiꞌjsa myuuwe.
11 Maaíiaꞌ ptaꞌsxwaꞌj jiꞌphçxaꞌ, peekx ũuste yaakxniꞌs weꞌwemée Dxus weꞌweniçxáꞌs ptaꞌsxwaꞌjaꞌ. Maawa vxitetx puꞌçxyaꞌ yaakiççxaꞌ, Dxus makwe kçxhãaçxhaꞌjana txãꞌs yuꞌ jxuka kxtey yuuwaꞌjaꞌ. Kĩh yũuççxawa Dxusaꞌs weçxaawaꞌjaꞌsçxáa yajkxna txãꞌwẽ yũuwaꞌjaꞌ Jesukristoꞌs piꞌkxçxa, txãa paꞌgatey kĩjkĩhwa jxuka Dxus jĩiçxaçxáataꞌ bagaçxtewa nes yuuwaꞌjsa.
Nxuswaꞌj en paꞌthe weçxana fxiꞌzewaꞌjaꞌ
12 Yakhthẽꞌjweꞌsx, Kristoꞌs nwẽeseꞌphaꞌga nxuswaꞌj en paꞌtheꞌ, fxiy yuh yuꞌk sũhna kuh yaakxnuwe,
13 wejxwa Kristo naꞌwẽy nxuswaꞌjaꞌs jiꞌphuçthu sũhna wẽt miiyajkxwe. Txãꞌwẽ yũuçxaꞌ, txajx kĩi enteꞌ weçxaawaꞌjaꞌs wala uyuuneꞌkwe.
14 Kristo yakh fxiꞌzepaꞌga ahçena wẽesxuteꞌ, iꞌkweꞌsxaꞌ nxusmée mweeçxawe, txãa paꞌgatey Dxus Espirituꞌ iꞌkweꞌsx ũuste ũsaꞌ nxusmée weçxweçxa kaayakiꞌjwaꞌjsa. Kristoꞌ txãaweꞌsx yaaçenik fxiꞌzeꞌ, nawa iꞌkweꞌsx yuꞌ txãꞌsaꞌ weçxana iꞌkwe fxiꞌzeꞌ.
15 Iꞌkweꞌsxaꞌ maa yuhwa nxus knaywaꞌj jiꞌphuwaꞌj jiꞌphmée iꞌkwe, naꞌwẽ yũuçxa: nasa ikhna, pesweena, ewmée yũuna, ĩsxiina yuwe ksuusuꞌjna fxiꞌzena. Txãꞌwẽ yũuçxa nxus knaywaꞌj yuꞌsaꞌ jiꞌphunuwe, wala thaampaꞌsaꞌ.
16 Nawa Kristoꞌs selpiipaꞌga nxuswaꞌj en jiꞌphuçxaꞌ, thaamewaꞌjmeꞌ, wejxwa Dxusaꞌs weçxana tuutheꞌjwaꞌjaꞌ.
17 Txãꞌwẽmeꞌ, makwe Dxus luuçxte yuhwa nxuswaꞌj enaꞌ txãaweꞌsx yakh khuẽꞌyku takh naꞌ ãçxh nmeh enteꞌ ¿maꞌwẽ seenaꞌ thaakwe nxus yujkx Dxus yuweꞌs nwẽeseꞌjsamée yakhaꞌ?
18 Dxus luuçx yuhwa wala nxus knayçxa nweꞌweni yuuteꞌ, pkalsa ewmeesa yuꞌ ¿mtee yuuyaꞌ uꞌjwetxki?
19 Txãꞌwẽ Dxus jxthãasnite nxuswaꞌj en jiꞌphuçxaꞌ, nxusmée fxiꞌzewaꞌjaꞌ peekx ũustxi Dxus kusete neeweꞌwena. Txãak kweꞌsxtxi takiꞌj naꞌ txãaíiçxáa nweꞌwena.
