1 Pedro 5:1-14
5 Ancianoweꞌsxtxi yuꞌkxpejeçthu, adxwa txãaweꞌsx naꞌwẽysa íiçxáath, saꞌ Kristo pxthaa yuuniꞌswa uysaath, saꞌ txãaweꞌsx naꞌwẽy cielutewa ũswaꞌjsath.
2 Iꞌkweꞌsx kusete neeweꞌweni ũstaꞌ Dxus luuçx txãatx jxpaꞌyakx miipeꞌjwe, piisxáa-thegsa naꞌwẽ. Saꞌ vxyuu jxpaꞌgawaꞌjçxáꞌs yajkxna txãꞌwẽ yũumée, Dxus jxthãasniçxáꞌs kxtey myuuwe, waꞌlmée weçxana ewçxáa yũuna.
3 Saꞌ Dxus luuçx iꞌkweꞌsx jxpeꞌjnitx juunaꞌ weꞌwenawa jxkaahwaꞌjmeꞌ, kxah iꞌkweꞌsx fxiꞌzeniꞌs piyaatxna.
4 Txãꞌwẽ yũuçxaꞌ, kweꞌsxtxi jxpeꞌjsa jxthaakwe jxtuhthesa vxyaateꞌ, iꞌkweꞌsxaꞌ jxpaꞌganeꞌkwe peesni iiméh zhiçxkwesaꞌs txãꞌ naa kiwega peesnisa pçuꞌtx txãꞌwẽsa meetaꞌ.
5 Piçtakxweꞌsxwa txãꞌwẽy ancianoweꞌsx weꞌweniꞌs kxtey myuuwe. Jxukaysa puutx yaꞌnwẽeseꞌjna fxiꞌzewaꞌjaꞌ iiwejçx yajkxmée. Txãꞌwẽmeꞌ, Dxusaꞌ puꞌçxhiꞌçmeꞌ iiwejçx yaakxsatxiꞌs, nawa iiwejçx yaakxsameetxiꞌs peeygãhnak puꞌçxhiꞌ.
6 Txãꞌwẽ yãꞌtheꞌ, Dxusaꞌs mwẽeseꞌjwe, txajx kuseteçxaçxáa jxuka yaꞌdukhna, kxah iꞌkweꞌsx txãꞌwẽ yũunijũꞌ, Dxusaꞌ iꞌkweꞌsxtxiꞌ walasa vxituna.
7 Txãa paꞌga iꞌkweꞌsxtxi kĩh thẽysa vxyaatewa, txãꞌsaꞌ jxuka Dxus kuseteçxaçxáa manvxihtwe, txãa paꞌgatey txãꞌ iꞌkweꞌsxtxi thegsaꞌ naa paꞌga.
8 Iꞌkweꞌsxaꞌ jxpaꞌyakx meswe. Txãꞌwẽmeꞌ, iꞌkweꞌsxtxi açesa eçxthẽꞌjaꞌ kimçxáanawa ikhyaꞌ sũhna león naꞌwẽ seenaꞌ pebeena pakwena uꞌjuꞌ.
9 Nawa eçxthẽꞌjaꞌs weh yuhwa nwẽeseꞌjnuwe Dxusaꞌs çxhãçxha yajkxna, txãa paꞌgatey iꞌkweꞌsxçxáamée txãꞌwẽ pxthaa nxusna ũsiꞌkwe, yakhthẽꞌjweꞌsx msuuweꞌsxwa jxuka txãꞌwẽçxaçxáa pxthaa yuuna ũstaꞌ.
10 Nawa iꞌkweꞌsx maz en pxthaa yuuniijũꞌ, Dxus kĩhtewa jxuka puꞌçxsaꞌ kçxhãaçxhaꞌjana jxpubana sxiigmée ew fxiꞌzewaꞌjaꞌs puꞌçxna. Txãa Dxusíiçxáak kweꞌsxtxi paꞌya, Jesukristo yakh bagaçxte yuhwa pçumée ũswaꞌthe.
11 Txãa paꞌga bagaçxtewa txãꞌs yuuçxáana weçxaaga.
Yuwe weçxaa kaahnitx ptaꞌsxna fxiꞌjni
12 Naa kartaꞌs fxiꞌjçxa kajaçthu ew fxiꞌzesa yakhthẽꞌj Silwano yakh. Kxteeaꞌ jxuꞌjmeekweth yuꞌkxpejeꞌ, naꞌwẽ Dxus puꞌçxniꞌs jxpaꞌgaiꞌkwe txãꞌ Dxusaꞌ peeygãasa yuhna sũhwaꞌjaꞌs ew kaajiyuꞌjsataꞌ. Açaꞌ txãꞌwẽ ũusutheniꞌs peçxkanamée mfxiꞌzewe.
13 Iꞌkweꞌsx naꞌwẽy Dxus txhitxhnisa Babilonia kiwete ũstaꞌ txãaweꞌsxwa yuwe weçxaa kajaꞌtx, açaꞌ adx nçxiꞌk naꞌwẽsa Markoswa yuwe weçxaa kajaꞌk.
14 Puutx ptaꞌsxna yuwe meen weeçxawe, teeçxsa naꞌwẽçxah yaꞌpeeygãhna.
Jesukristoꞌs nwẽeseꞌjsa iꞌkweꞌsx jxukaysa ewçxáa mfxiꞌzewe.
