1 Tesalonicenses 1:1-10
1 Pablo yaasesa naa kartaꞌs fxiꞌjaçthu Silwano vxiteꞌ Timoteo txãaweꞌsx yakh, yakhthẽꞌjweꞌsx Tesalónika çxhabte pkhaakhena ũssaweꞌsxtxi weçxana. Iꞌkweꞌsxaꞌ Dxus kweꞌsx Tata vxiteꞌ kweꞌsxtxi jxpeꞌjsa Jesukristo txãaweꞌsx yakh txutemée wala ew fxiꞌzena ũsiꞌkwe. Iꞌkweꞌsxtxiꞌ Dxusaꞌ puꞌçxhina vxiteꞌ kweꞌsxtxi jxpeꞌjsa Jesukristo, txãa paꞌga Dxus yakhçxáa mfxiꞌzewe.
Tesalonikateweꞌsx Dxus yakh fxiꞌzewaꞌjaꞌs kaavxyaꞌjaꞌjni
2 Iꞌkweꞌsx jxukaysa txãꞌwẽ ew fxiꞌzepaꞌga Dxusaꞌsthaꞌw weçxana puutx weꞌweꞌ iꞌkweꞌsxtxi peçxkanamée neeweꞌwena.
3 Txãꞌwẽ iꞌkweꞌsx paꞌgate Dxus kweꞌsx Tata yakh puutx weꞌweççxaꞌ, naꞌwẽ iꞌkweꞌsxaꞌ Dxus yuuçxáana yajkxna iꞌkwe txajx jxkaahniꞌs mjĩꞌ, saꞌ txãꞌwẽy wala peeygãhna selpíi iꞌkwe kweꞌsxtxi jxpeꞌjsa Jesukristoçxáꞌs ũythasna txãa yakh txutemée. Txãatxthaꞌw bagaçxtewa peçxkanamée Dxus dxiꞌpte neeweꞌweꞌ.
4 Kweꞌsxaꞌ jiithaꞌw Dxusaꞌ yakhthẽꞌjweꞌsxtxi peeygãhçxa txhitxhku nweꞌweyaꞌ.
5 Açaꞌ kweꞌsxaꞌ Dxus yuwe nweꞌwewaꞌjsaꞌs ptaꞌsxiççxaꞌ yuwejuçxáa weꞌwemeethaꞌw, wejxwa ptaꞌsxwaꞌjaꞌs Dxus Espiritu puꞌçxteꞌ, txãꞌ ĩsxiinimeena sũhnathaꞌw ptaꞌsx. Iꞌkweꞌsxaꞌ peekx jii iꞌkwe maꞌwẽ ptaꞌsxçxaꞌ, kweꞌsxíi yuuwa txãꞌwẽythaꞌw yũuna fxiꞌze iꞌkweꞌsx yakh ũsçxaꞌ.
6 Iꞌkweꞌsxaꞌ kweꞌsx fxiꞌzeni vxiteꞌ Jesukristo fxiꞌzenitx thegçxa txãa naꞌwẽyiꞌkwe fxiꞌze makwe wala açeçtewa, Dxus yuweꞌs Dxus Espiritu ũsteꞌ wala weçxana jxpaꞌgaçxa.
7 Iꞌkweꞌsx txãꞌwẽ yũupaꞌgatx vxite kiwe Macedonia Akayasuweꞌsx Dxus luuçx jxukaysa kweꞌsxwa txãꞌwẽy fxiꞌzega sũhwaꞌjaꞌs jiꞌphu.
8 Iꞌkweꞌsx txãꞌwẽ yũuni yakhiꞌkwe Jesukristo kaapiyaꞌjniꞌs Macedonia Akaya kiwesuçxáamée, msuu msuuwa jxuka kaajiyuꞌj, txãa paꞌgak iꞌkweꞌsxaꞌ Dxusaꞌs yaakxsatewa yaꞌjiyuꞌ, açaꞌ ãçxhaꞌ kweꞌsxaꞌ iꞌkweꞌsx ew fxiꞌzeniꞌs tuutheꞌjwaꞌj jiꞌphmeeyãꞌthaꞌw.
9 Iꞌkweꞌsx ew fxiꞌzeniꞌs kweꞌsx ptaꞌsxipkaçxte, wejxwa txãaweꞌsx khuẽꞌytxi ptaꞌsxiꞌ maꞌwẽneꞌkwe kweꞌsxtxi ew jxpaꞌga txãꞌsna, saꞌ maꞌwẽneꞌkwe Dxus ĩtximeesatx nvxihtçxa Dxus ĩtxisaꞌs selpiiyaꞌ yaakiꞌ.
10 Saꞌ ãçxhaꞌ maꞌwẽ ũythasna ũskwe Jesus Dxus Nçxiꞌk uuniijũwa ĩtxi yuuçxa cieluju kiꞌ sxawedwaꞌjaꞌs txãꞌsnatx ptaꞌsxiꞌ. Txãa Jesusaꞌ Dxus kastigo seenaꞌju nweꞌwewaꞌjsaꞌ.
