1 Tesalonicenses 2:1-20
2 Yakhthẽꞌjweꞌsx, iꞌkweꞌsxíiwa jii iꞌkwe kweꞌsx iꞌkweꞌsx tasxte paꞌjniꞌ kxul yuumeꞌ.
2 Nyafxíi yuꞌ txakwe wala wẽesxuna pkxuunithaꞌw yuu Fxilipos çxhabte txãꞌsaꞌ jii iꞌkwe. Nawa Dxusaꞌ puꞌçxku txajx yuwe ewte nvxiitwaꞌjsaꞌs açesa ksxavxyte ũukhmée ptaꞌsxkahn.
3 Txãa paꞌgatey kweꞌsxaꞌ jxpubaçxa ptaꞌsxna ũsuꞌçmeethaꞌw, saꞌ ewmée yajkxçxa ĩsxiina ũsuꞌçmeethaꞌw.
4 Txãꞌwẽmeeteíik Dxusaꞌ txajx yuwe ewte nvxiitwaꞌjsaꞌs kweꞌsxtxi neeweꞌweçxa nvxiht, kxahthaꞌw txãꞌwẽ ptaꞌsx. Naa kiwete nasatx weçxaa jxthãasçxa txãꞌwẽ yuꞌçmeethaꞌw, wejxwa Dxus kweꞌsx ũustxi jiisa weçxakahnthaꞌw txãꞌwẽ yũꞌ.
5 Iꞌkweꞌsxaꞌ jii iꞌkwe kweꞌsxaꞌ bagaçxte yuhwa txãꞌwẽ nasatx yuꞌkxweꞌwena ũsuꞌçmeethaꞌw, saꞌ vxyuu knayyaꞌ sũhçxawa txãꞌwẽ ũsuꞌçmeethaꞌw. Dxusaꞌ jiiaꞌ.
6 Bagaçxte yuhwa nasa txãꞌwẽ kweꞌsxtxi ew weꞌwena tuutheꞌj jxthãasnawa uꞌjuꞌçmeethaꞌw. Iꞌkweꞌsxtxi vxitesatx maa yuhtxwa txãꞌwẽ jxthãasmeethaꞌw. Saꞌ txãꞌwẽ iꞌkweꞌsxtxi juunaꞌ weꞌweçxa kĩhçxáawa thãas wẽewaçaꞌ, ãjawaꞌjneꞌtkaꞌw yuꞌ, Jesukristo jxkaahnisathaꞌw yuꞌ naa paꞌga.
7 Txãꞌwẽ yũupkaçxte, iꞌkweꞌsxtxi ewkuẽçxáathaꞌw weꞌwe, luuçx njĩꞌjwa maꞌwẽga ewkuẽ jxpeꞌjna nuywaláꞌ txãꞌwẽ.
8 Iꞌkweꞌsxaꞌ iiméh wala wedxnisaiꞌkwe txãa paꞌga Dxus yuweçxáꞌs ũsmée, kweꞌsx ĩtxi fxiꞌzeni yuunawa ivxiituwaçaꞌ sũhthaꞌw iꞌkweꞌsx paꞌgate, iꞌkweꞌsx ew fxiꞌzeniꞌs jxthãasçxa.
9 Yakhthẽꞌjweꞌsx, yaakiꞌneꞌkwe, kweꞌsxaꞌ Dxus yuweꞌs ptaꞌsxna uꞌjuçxaꞌ maꞌwẽtkaꞌw çxhãçxha mjĩꞌ kweꞌsx peejiniꞌs uyyaꞌ, en maꞌk yuu meeçxaꞌ kus maꞌk yuu nawa mjĩꞌthaꞌw vxitesatx thãasyaꞌmée.
10 Iꞌkweꞌsxaꞌ jii iꞌkwe, açaꞌ Dxuswa jiiaꞌ, kweꞌsx txãꞌwẽ ew zhiçxkwe iꞌkweꞌsx yakh fxiꞌzeniꞌs, açaꞌ kim yuhwa kweꞌsxtxi ewmée nuyweꞌweyaꞌ ãjameetxna.
11 Jii iꞌkwe kweꞌsxaꞌ maꞌwẽtkaꞌw iꞌkweꞌsxtxi teeçxsa naꞌwẽçxah kvxiisxaꞌjn kçxhãaçxhaꞌjna yuu, neywa maꞌwẽga luuçxtxi jxpeꞌjeꞌ txãꞌwẽthaꞌw yuu.
12 Kweꞌsxaꞌ wala ew yuꞌkxpehna neeweꞌwethaꞌw Dxus dxiꞌpte maꞌwẽ fxiꞌzeçxa txajx jxkaahna ũsnite uꞌkayaꞌ ãjawaꞌjaꞌs.
13 Dxus yuweꞌs kweꞌsx ptaꞌsxteꞌ, nasaa ptaꞌsxniçxáamée, Dxus ptaꞌsxni yuhna sũhnaiꞌkwe jxpaꞌga, txãa paꞌgathaꞌw kweꞌsxaꞌ Dxusaꞌs weçxáꞌ bagaçxtewa. Isa txãꞌ Dxus yuwe yujaꞌ, txãasaíik iꞌkweꞌsx ũustxi yuꞌpthejeꞌ.
14 Yakhthẽꞌjweꞌsx, iꞌkweꞌsxaꞌ Judea kiwete Dxus luuçx Kristo Jesus yakh fxiꞌzesa ũstaꞌ txãaweꞌsx naꞌwẽyiꞌkwe yuu. Txãaweꞌsxtxiꞌ peekx nweꞌsxíiçxáa wala ahçetx txãꞌwẽy iꞌkweꞌsxwa wala yaaçeni fxiꞌzeiꞌkwe iꞌkweꞌsx nweꞌsxíiçxáa.
15 Txãa judiuweꞌsxaꞌ kweꞌsxtxi jxpeꞌjsa Jesusaꞌs ikhtxi nyafxíiwa maꞌwẽneꞌta ikh Dxus yuwe ptaꞌsxsatx txãꞌwẽy. Txãasatx kweꞌsxtxiwa çxhabu kutxiꞌjna ũsuꞌ. Txãaweꞌsxaꞌ Dxus dxiꞌpte ew yũuna ũsmeetaꞌ, saꞌ nasa jxukaysatx açeꞌtx.
16 Judiu jiꞌjmée vxite nasawa ewte neeyũukahn Dxus yuweꞌs ptaꞌsx wẽjeꞌçtewa, ũsuꞌçmeetaꞌ kweꞌsxtxi. Txãꞌwẽ yũuçxa txãaweꞌsx pkaltxi jweeíiçxáa nuywalana ũstaꞌ, nawa ãçxhaꞌ Dxus kastigo seenaꞌsa yujaꞌ txãꞌwẽ yũupaꞌga.
Tesalonikateweꞌsxtxi Pablo maz uswa puutx uyyaꞌ uꞌjyaꞌ yaakxni
17 Yakhthẽꞌjweꞌsx tasxu kweꞌsxaꞌ txuteeçxaꞌ, yafx yakh yuꞌ puutx uymeeçxawa ũuste yuꞌ peçxkanameethaꞌw iꞌkweꞌsxtxi yajkxna fxiꞌzeꞌ, ¿maꞌwẽn kiꞌ puutx uyyaꞌ uꞌjwekxthaꞌw? sũhna.
18 Iꞌkweꞌsx tasxna yujxaꞌ yajkxthaꞌw, saꞌ adxaꞌ maz uswa txãꞌwẽ yuu wẽeth. Nawa eçxthẽꞌjaꞌ kweꞌsxtxi yupku.
19 Txãꞌwẽtewa kweꞌsxtxi jxpeꞌjsa Jesukristo kĩi enteꞌ iꞌkweꞌsx txãꞌwẽ kweꞌsxtxi wẽtwẽt ¿kaaũusutheꞌjwaꞌjsa meemaꞌkwe?
20 Isa iꞌkweꞌsx yuh txãꞌwẽ wẽtwẽt kaaũusutheꞌjwaꞌjsaiꞌkwe.
