1 Tesalonicenses 3:1-13
3 Txãꞌwẽ iꞌkweꞌsxtxi puutx uy wẽeçxa wantaĩmeeçxa, yakhthẽꞌj Timoteoçxáꞌswa kaath iꞌkweꞌsxtxi thegyaꞌ, adx yuꞌ Atenaste neeyũuçxa.
2 Txãꞌ Dxusna selpisáa, kweꞌsx yakh mjĩisaꞌ Kristo yuwe ewsaꞌs ptaꞌsxna, saꞌ nxuste fxiꞌzesatx kçxhãaçxhaꞌjna kvxiisxaꞌjwaꞌjsak yuꞌ,
3 txãꞌwẽ kim yuhwa naa nxussaꞌs ũukhna kuh yaakxkahmén. Txãꞌwẽmeꞌ, iꞌkweꞌsxaꞌ peekx jii iꞌkwe naa thẽyte nxuste fxiꞌzewaꞌjaꞌs jxpaꞌgawaꞌjsathaꞌw.
4 Txajíithaꞌw kxtee iꞌkweꞌsx yakh nee ũsíi ptaꞌsx thẽyte nxuste fxiꞌzewaꞌj en paꞌjana jĩna txãꞌ kxtey yuuk txãꞌsaꞌ jxpaꞌgaiꞌkwe.
5 Txãa paꞌgath adxaꞌ iꞌkweꞌsx pxthaa nxusniꞌs peeygãaweete wantaĩmeeçxa pẽjxyaꞌ kaah Jesukristo yakh maꞌwẽ fxiꞌzeçtewa jiyuyaꞌ, txãꞌwẽmeꞌ eçxthẽꞌjaꞌ pejka ewmeete kweeteꞌjewáana açaꞌ kweꞌsx mjĩiniꞌ kxul yuuna sũhçxa.
6 Açaꞌ Timoteoꞌ sxawedna paꞌkh, saꞌ Dxus yakh jxpubamée peeygãhna ũstaꞌ jĩnak yuwe ewsa jxũna paꞌj. Txãꞌwẽçxáamée, kweꞌsxtxiwa yaakiꞌtx wala wedxna ¿bagaçx puutx uyuukxthaꞌw? jĩna, kweꞌsxwa maꞌwẽtkaꞌw txãaweꞌsxtxi puutx uy wẽjeꞌ txãꞌwẽytxi yaakiꞌ jĩnak ptaꞌsxiꞌ.
7 Txãa paꞌgathaꞌw txakwe wala nxuste thẽyte fxiꞌzena ũsçxawa wala weçxáꞌ, yakhthẽꞌjweꞌsx, iꞌkweꞌsx txãꞌwẽ Jesukristo yakh txutemée çxhãçxha fxiꞌzeniꞌs jiyuçxa.
8 Iꞌkweꞌsxaꞌ Jesukristo yakh txutemée fxiꞌzeniꞌs jiyuteꞌ, kweꞌsx yakhaꞌ ũuste iiméh wala wẽtwẽt ũusuthek.
9 Açaꞌ ¿maꞌwẽ yũuçxa Dxusaꞌs iiméh wala weçxayaꞌ ãjakxthaꞌw? iꞌkweꞌsx paꞌgate txakwe wala wẽtwẽt-saꞌs ũuste jxpaꞌgaçxaꞌ.
10 En maꞌk yuu kus maꞌk yuu nawa Dxusaꞌs pẽjxna nesthaꞌw yuꞌ, iꞌkweꞌsx yakh puutx uyyaꞌ yuuwaꞌjaꞌs ũsteꞌ, iꞌkweꞌsx nee pejiineꞌkwe Dxusna jiyuwaꞌjaꞌs txãꞌsna kaapiyaꞌjaꞌnjaꞌw sũhçxa.
11 Dxus kweꞌsx Tata vxiteꞌ kweꞌsxtxi jxpeꞌjsa Jesukristo txãaweꞌsxaꞌ pejka puꞌçxhitxna sũjuꞌthaꞌw kweꞌsx yujxaꞌ ãjawaꞌjaꞌs.
12 Iꞌkweꞌsxtxiꞌ Jesukristoꞌ jweeíiçxáa wala kçxhãaçxhaꞌjana, saꞌ maatxwa jxukaysatx puutx yaꞌpeeygãawaꞌjaꞌs ũsuna kweꞌsxwa maꞌwẽtkaꞌw iꞌkweꞌsxtxi peeygãjaꞌ txãꞌwẽy.
13 Iꞌkweꞌsx ũuste jxpubamée fxiꞌzewaꞌjaꞌs ũsuna, kxah kweꞌsxtxi jxpeꞌjsa Jesukristo txajx nweꞌwenisa yakh sxawedna kĩhteꞌ, iꞌkweꞌsxaꞌ Dxus dxiꞌpte yuuwemeesa yuuneꞌkwe.
