1 Tesalonicenses 4:1-18
4 Ãçxhaꞌ yakhthẽꞌjweꞌsxtxi wala yuꞌkxpehna neeweꞌweçthaꞌw Jesukristo jxkaahniꞌs: naꞌwẽ Dxus dxiꞌpte ew fxiꞌzewaꞌjaꞌs maꞌwẽtkaꞌw kaapiyaꞌj txãꞌsaꞌ nvxihtmée, jweeíiçxáa ew fxiꞌzena.
2 Jesus jxkaatheꞌ kweꞌsxaꞌ kaapiyaꞌthaꞌw txãꞌsaꞌ iꞌkweꞌsxaꞌ jii iꞌkwe.
3 Dxusaꞌ kĩh pkal yuhwa jiꞌphméek fxiꞌze jxthãasuꞌ, ptamumée pkal yũuna fxiꞌzenijũ jxuka txuteeçxa.
4 Teeçxsa naꞌwẽçxah peekx nyuutx pkalsu kaafxiꞌzeꞌjmée ew zhiçxkwe miipeꞌjwe.
5 Dxusna jiimeesa naꞌwẽ kazx ewmée yajkxna yuꞌ fxiꞌzenuwe.
6 Kim yuhwa vxitee nyuutx pkal yuuwaꞌj jiꞌphmeetaꞌ nmiꞌaꞌs pesweena. Txãꞌwẽmeꞌ, Dxusaꞌ seenaꞌ yuh wala kastigaĩna maꞌwẽtkaꞌw ptaꞌsxiꞌ txãꞌsaꞌ kxtey yuuna.
7 Txãa paꞌgatey Dxusaꞌ paꞌyak nawa txajx dxiꞌpte kĩh pkal yuhwa jiꞌphmée fxiꞌzekahnku txãꞌwẽ yũu.
8 Txãꞌwẽ maawa naꞌwẽ ew kaapiyaꞌjniꞌs nwẽeseꞌjsameꞌ kaapiyaꞌjsaꞌs nwẽeseꞌjsamée yuꞌçmeꞌ; Dxus txajx Espirituꞌs ũssaꞌsku nwẽeseꞌjsamée yuꞌ.
9 Yakhthẽꞌj pweꞌsx puutx yaꞌpeeygãawaꞌjaꞌs ptaꞌsxna fxiꞌjwaꞌj jiꞌphmeeth, txãa paꞌgatey Dxusaꞌ kaapiyaꞌjyãꞌkh teeçxsa naꞌwẽçxah puutx yaꞌpeeygãawaꞌjaꞌs.
10 Txãa paꞌgaiꞌkwe Macedoniate ũssa yakhthẽꞌjweꞌsx jxukaysatx peeygãhna fxiꞌzeꞌ. Nawa yakhthẽꞌjweꞌsxtxi neeweꞌweꞌthaꞌw, iꞌkweꞌsx peeygãaniꞌ jweeíiçxáa ũuste penakahn.
11 Kuçx nxus yajkxmée wẽtçxáa mfxiꞌzewe iꞌkweꞌsx mjĩisuçxáa paꞌpçxuna, maꞌwẽtkaꞌw neeweꞌwe txãꞌwẽ yũuna,
12 kxah Dxusaꞌs jiimeesawa açeweꞌwemeetxna, açaꞌ iꞌkweꞌsxtxiwa kĩhwa peejiimeena.
Jesukristoꞌ kiꞌ sxawedna kĩjana
13 Yakhthẽꞌjweꞌsxtxi kaajiyuꞌjmée yuꞌ nvxiit wẽemeethaꞌw uusaaweꞌsx maꞌwẽ yuuwaꞌjsatewa, kxah iꞌkweꞌsxwa Dxusna jiimeesa naꞌwẽ nxusmeeneꞌkwe.
14 Jesusaꞌ uuçxawa kiꞌ ĩtxi yuuniꞌs jiithaꞌw, txãꞌwẽyçxáa Jesusna jxpaꞌgaçxa uusaatxiꞌ Dxusaꞌ kiꞌ ĩtxi vxitçxa Jesus yakh nuykĩjana sũjuꞌthaꞌw.
15 Kxahthaꞌw iꞌkweꞌsxtxi ptaꞌsxiꞌ Kristo kaapiyaꞌjniꞌs, txãꞌwẽ Kristo kĩi enteꞌ kweꞌsx nee ĩtxi ũssaꞌ uusaaweꞌsx yaçte peꞌjna uꞌjni yuumeꞌnjaꞌw.
16 Txãa paꞌgatey Kristoíiçxáa cieluju kĩiwaꞌjsaꞌ seenaꞌ jxkaahwaꞌjaꞌs weꞌwena, Dxus angelesweꞌsx npiiçthẽꞌjwa weꞌwena, naapkaçxhaꞌ Dxus tukani zhiçxkwesawa susuna. Naapkaçxhaꞌ Kristona jxpaꞌgaçxa uusaaweꞌsx khuẽꞌy ĩtxi yuutxna.
17 Txajũꞌ nee ĩtxi ũssaꞌ txãaweꞌsx yakh jaꞌdaçxah peꞌjna uꞌjni yuꞌnjaꞌw tãaph pxãhte cielute Kristoꞌs puutx uyyaꞌ. Txajũꞌ Kristo yakh nes yuꞌnjaꞌw bagaçxtewa.
18 Kxah naꞌwẽ ptaꞌsxniꞌs jiyuçxaꞌ, puutx kvxiisxaꞌjna mfxiꞌzewe nxusmée.
