1 Timoteo 1:1-20
1 Adxaꞌ Jesukristo jxkaahnisa Pablo yaaseth, txãasa kweꞌsxtxi nweꞌwesa Dxus vxiteꞌ kweꞌsxtxi jxpeꞌjsa Jesukristo txãaweꞌsx kaahnisath, Jesukristo yuuçxáa nweꞌwewaꞌjaꞌs ptaꞌsxsa.
2 Dxus yakh jxpubamée fxiꞌzesa isa adx nçxiꞌk naꞌwẽsa Timoteoꞌs fxiꞌjaçthu naa kartaꞌs. Dxus kweꞌsx Tata vxiteꞌ kweꞌsxtxi jxpeꞌjsa Kristo Jesus txãaweꞌsx peeygãhçxa puꞌçxteꞌ, idxaꞌ ewçxáa wẽt fxiꞌzeneꞌga.
Kaapiyaꞌjni ewmeesaꞌs jxpaꞌyakxkahn neeweꞌweni
3 Macedonia kiwen uꞌjweççxaꞌ, idxaꞌs Efxeso çxhabtee nvxihtthu Dxus yuwemée txãaweꞌsx ũus yajkxçxa fxiy kaapiyaꞌjsatx yupkahn.
4 Txãꞌwẽmeꞌ, txãaweꞌsxaꞌ Dxus librute yuꞌ fxiꞌjnimeetewa nyafxiitey yaçgaweꞌsxaꞌ txãꞌwẽtx yũu jĩna yajkxçxatx kwentuꞌjuꞌ, açaꞌ txãꞌwẽsatx wẽseꞌkhamén idxaꞌ weꞌwewaꞌjsag neeyũu. Açaꞌ txãꞌwẽsaçxáꞌs kwentuꞌjniꞌ Dxus neeweꞌweçxa nvxihtku txãate yuꞌ leꞌçxkweçxáa yuhwa selpiꞌçmeꞌ.
5 Txãa paꞌgath naꞌwẽ yũuwaꞌjçxáꞌs jxkaajaꞌ: puutx yaꞌpeeygãawaꞌjaꞌs isa ĩsxiimée ũusuh jxuka yajkxna Dxus yakh yuuçxáa fxiꞌzewaꞌjaꞌsthu neeweꞌweꞌ.
6 Maaíi yuꞌ txãꞌwẽ peeygãawaꞌju txuteeçxa kwentu selpiwaꞌjmeesuçxáatx puutx weꞌwena fxiꞌzeꞌ.
7 Txãaweꞌsxaꞌ Dxus libruꞌs jiyuwaꞌjaꞌs kaapiyaꞌjsatx yuu wẽjeꞌ, nawa txãaweꞌsxíiçxáa yuhwa jiyuꞌçmeetaꞌ peekx kaapiyaꞌjniꞌs txakwe wala çxhãçxha weꞌweççxawa.
8 Jiithaꞌw Dxus jxkaahni leyaꞌ ew yujaꞌ, maꞌwẽ jxkaatheꞌ kxtey yuusáa yakh yuꞌ.
9 Ew yũuna fxiꞌzesatxiꞌ Dxus jxkaahni leyaꞌ thegwaꞌj jiꞌphmeꞌ. Dxus jxkaahni leyaꞌ naꞌwẽsaçxáatx thegwaꞌj jiꞌphaꞌ: Dxusna açesa, Dxusna nwẽeseꞌjsamée, ewmeesa, pkalsaweꞌsx, Dxusna ũukhsamée, Dxus yuweꞌswa weeçxsa, neyweꞌsxtxi ikhsa meeçxawa nasa maꞌwẽsatxwa ikhsa,
10 ptamumey pkal yũuna fxiꞌzesa meeçxawa piçthẽꞌj pweꞌsx txãꞌwẽ yũusáa, nasatx sũthçxa ikhsa, ĩsxiisa, Dxus uyte isath weꞌweꞌ jĩna ĩsxiisa. Saꞌ Dxus yuwemeesuçxáa txãꞌwẽ puutx weꞌwena fxiꞌzeni yuꞌsaꞌ Dxus leyaꞌ yup yujuꞌk.
11 Açaꞌ adx kaapiyaꞌjaꞌth txãꞌ ĩsxiinisameꞌ, txãasaíi Kristo yuwe ewte nvxiitwaꞌjsaꞌs Dxusíi adxna neeweꞌweçxa nvxihtku txãaíiçxáꞌ.
Dxus peeygãhçxa txakwe ew yũupaꞌga weçxani
12 Kweꞌsxtxi jxpeꞌjsa Jesukristoꞌs weçxaꞌth, adxaꞌs txhitxçxa naꞌwẽ selpiwaꞌjsak nvxiht txajx tasxte selpiwaꞌjsaneꞌtka yuꞌ naa paꞌga.
13 Adxaꞌ nyafxíi yuꞌ ahçeçxa wẽesxuuna pkxuuyaꞌ pakwesaath yuꞌ. Nawa Dxusaꞌ adxaꞌs peeygãhçxa jxpaꞌgak, jiimeeçxaneꞌtka txãꞌwẽ yũuna ũsuꞌ naa paꞌga.
14 Txãasa kweꞌsxtxi jxpeꞌjsa puꞌçxniꞌ adx yakhaꞌ iiméh walasa yuꞌk vxiteꞌ Kristo Jesus yakh utxaapaꞌga txajx peeygãanisawa txãꞌwẽyku walasa yuꞌ.
15 Kristo Jesus naa kiwete kĩjk pkalsatx nweꞌweyaꞌ jĩna ptaꞌsxniꞌ ĩsxiinisameꞌ, açaꞌ txãꞌwẽ ptaꞌsxniꞌs nasa jxukaysa isa yuhna sũhwaꞌj jiꞌphtaꞌ. Nawa maatewa jxthaakwe pkalsaꞌ adxthu yuꞌ.
16 Makwe txãꞌwẽtewa, Dxusaꞌ adxaꞌs peeygãjk, adx txakwe ewmeesatewa Jesukristoꞌ txãꞌwẽsaꞌs khuẽꞌyku wejx peeygãhna jxpaꞌga sũjkahnku txãꞌwẽ yũu. Açaꞌ maawa adx naꞌwẽy ewmeesa ũsçxawa kweꞌsxwa pçumée ĩtxi fxiꞌzewaꞌjaꞌs pejka jxpaꞌgayujuꞌnjaꞌw sũjkahnku txãꞌwẽ yũu.
17 Txãa paꞌga bagaçxtewa weçxana nes yuuwaꞌj jiꞌpthaꞌw jxkaahsa pçuwaꞌjsameꞌs. Txãꞌ kweꞌsx yafxte vxyaasameꞌ, nawa bagaçxte yuhwa pçuwaꞌjsawameꞌ. Dxus txãa yuuçxáa kĩhte yuhwa sxiigwaꞌjsameꞌ.
18 Adx nçxiꞌk naꞌwẽsa Timoteo idxaꞌs neeweꞌweçthu, iidx ũuste maꞌwẽ ew fxiꞌzewaꞌjaꞌs ũusuthena txãꞌsçxáa kxtey yuuna, ew yũuwaꞌjçxáꞌs paꞌpçxuna Dxusaꞌ puꞌçxhina sũhna fxiꞌzekahn. Idx txãꞌwẽ ew fxiꞌzekahníiçxáatx yakhthẽꞌjweꞌsxwa dxiikhẽy ptaꞌsx Dxus yakh jxpubamée selpiwaꞌjsaꞌ jĩna açaꞌ txãꞌsaꞌ kxtey myuu.
19 Maaíi yuꞌ kĩh txãꞌwẽ ewsatewa jiiçxa, kiꞌ kĩh ewmeesatewa jiiçxawa nwẽeseꞌjmeeçxa, Dxus yakh fxiꞌzenijũ jxpubatx.
20 Txãꞌwẽ yũusaꞌ Himeneo, Alejandro txãaweꞌsxtaꞌ. Açaꞌ adxaꞌ txãaweꞌsxtxiꞌ eçxthẽꞌj kusete nvxihtthu, kxah Dxusaꞌs açeweꞌweyaꞌmée piyaatxna.
