1 Timoteo 2:1-15
2 Nyafxteꞌ Dxus yakh puutx weꞌwewaꞌjaꞌs khuẽꞌythu neeweꞌweꞌ. Iꞌkweꞌsxaꞌ nasa jxukaysa paꞌgate Dxusaꞌs weçxana mneeweꞌwewe txãa yakh puutx weꞌwena, saꞌ kĩh pẽjxçxawa pẽywaꞌjaꞌ.
2 Txãꞌwẽy naa kiwete jxkaahna ũssaweꞌsx jxukaysa paꞌgatewa Dxus yakh puutx weꞌwewaꞌjaꞌ, kxah Dxus puꞌçxteꞌ txãaweꞌsx ew jxkaatheꞌ, wẽt fxiꞌzeyaꞌ ãjaꞌnjaꞌw kĩhwa kuçx yuunimée Dxus yakh yuuçxáa.
3 Kweꞌsxtxi nweꞌwesa Dxusaꞌ txãꞌwẽ yũuniꞌsku jxthãasuꞌ.
4 Txãa paꞌgatey Dxusaꞌ kim yuhtxwa vxitu jxthãasuꞌçmeꞌ, jxukaysa ewsaꞌs jiyuçxa ewte neeyũuniꞌsku jxthãasuꞌ.
5 Txãꞌwẽmeꞌ, ewte nvxiitwaꞌjsaꞌ teeçx Dxus yuuçxáa ũsaꞌ, açaꞌ txãꞌwẽy Dxus dxiꞌpte nasaa juꞌgu yuuçxa weꞌwe puꞌçxsawa teeçx íiçxáa ũsaꞌ, txãꞌ Jesukristoꞌ kweꞌsx kakweꞌs íiçxáa jiꞌphsa.
6 Txãa Jesukristok jxukaysa ewte neeyũuwaꞌjaꞌs vxitna pkalsa paꞌgate uu txãꞌwẽ yũuwaꞌj en ãhteꞌ.
7 Açaꞌ txãꞌwẽ yũuniꞌs ptaꞌsxwaꞌjsa txhitxçxa nvxiitnisath, Jesukristo jxkaahnisa. Txãasa adxaꞌ ĩsxiinimeesa isasaꞌs kaapiyaꞌjwaꞌjsath, judiu jiꞌjmée vxite nasawa Dxus yakh jxpubamée fxiꞌzekahn. Txãꞌwẽ kaahnisath jĩçxaꞌ ĩsxiijaꞌçmeeth txãꞌsaꞌ Kristoꞌ jiiaꞌ.
8 Txãasath neeweꞌweꞌ: Nasa msuuweꞌsxwa Dxus yakh puutx weꞌwewaꞌj jiꞌphtaꞌ puiina fxiꞌzemée Dxus yuuçxáana ũusuh jxuka yajkxna.
9 Txãꞌwẽy uꞌyweꞌsxwa ropa iijxũniꞌs jxpaꞌyakxwaꞌjaꞌ nasa weꞌwekahmen. Saꞌ dxkhasaꞌs kiduççxaꞌ txakwe wala vxyuu beh kiꞌpna ew pheuꞌjmeetewa ewna.
10 Athnisawa jwee paꞌgasa iijxũmeeçxawa, Dxus yakh ew fxiꞌzeniçxáa wejx ewsaꞌ, txãa yakhçxáa fxiꞌzesayãꞌjaꞌ.
11 Uꞌyweꞌsxaꞌ wala jxpaꞌyakx wẽseꞌjna uꞌpwaꞌjsataꞌ kaapiyaꞌjniꞌs.
12 Nasaa ksxavxyte uꞌy weꞌwewaꞌjaꞌs ũsmeꞌnja, saꞌ piçthẽꞌjaꞌs jxkaahwaꞌjaꞌswa ũsmeꞌnja, wejxwa sxuunaꞌçxáa uꞌpwaꞌjsaꞌ.
13 Txãꞌwẽ piçthẽꞌjaꞌs jxkaakhameníi, Dxusaꞌ Adanaꞌs khuẽꞌyku pheuꞌj, eꞌsuk Ewaꞌs pheuꞌj.
14 Açaꞌ Adan yaꞌĩsxiini yuumeꞌ, uꞌyku yaꞌĩsxii. Txãꞌwẽ yaꞌĩsxiiçxak pkalte wete.
15 Nawa uꞌyaꞌ peekx luuçxtxi ew jxpeꞌjna Dxus yakhwa jxpubamée ew fxiꞌzeçxaꞌ, ewte neeyũuna.
