1 Timoteo 3:1-16
3 Isath weꞌweꞌ: Maawa dxuus yatte jxkaahwaꞌjaꞌs jxpaꞌgasa ancianoꞌ mjĩi ewsaꞌs jxpaꞌgasa yuuna.
2 Nawa kxtee jxkaahwaꞌjaꞌs jxpaꞌgasaꞌ kĩhte yuhwa jxpubamée wala ew fxiꞌzesa yuuwaꞌjaꞌ, ãhmée yũute yuꞌkxpehni fxiꞌzewaꞌjsameꞌ. Saꞌ peekx nyuu yakhçxáa fxiꞌzesa yuuwaꞌjaꞌ; kĩhtewa jxuka jxpaꞌyakx fxiꞌzesa yuuwaꞌjaꞌ, saꞌ zhiçxkwe juunaꞌ yuumée fxiꞌzesa yuuwaꞌjaꞌ; paadeesatx yat pkiꞌjna fxiꞌzesa yuuwaꞌjaꞌ, saꞌ ewsaꞌs maꞌwẽ kaapiyaꞌjwaꞌjaꞌswa jxuka jiisa yuuwaꞌjaꞌ.
3 Tũuna fxiꞌzesa yuuwaꞌjmeꞌ puii jxpakwena, vxyu knaywaꞌjçxáꞌs yajkxna fxiꞌzesa yuuwaꞌjmeꞌ, wejxwa vxyuꞌs yajkxmée peeygãhna puꞌçxna ewçxáa yũuna fxiꞌzesa yuuwaꞌjaꞌ.
4 Peekx yatteweꞌsxtxi ew zhiçxkwe jxpeꞌjsa yuuwaꞌjaꞌ, saꞌ peekx luuçxwa nwẽeseꞌjna ew fxiꞌzekahn kaapiyaꞌjsa yuuwaꞌjaꞌ.
5 Txãꞌwẽ peekx yatteweꞌsx yuhtxwa ew jxpeꞌjyaꞌ ãjameeçxaꞌ, ¿maꞌwẽ Dxus luuçx yuutxiꞌ jxpeꞌjyaꞌ ãjakx?
6 Dxuus yatte jxkaahsaꞌ Kristoꞌs uꞌse jxpaꞌgasa yuuwaꞌjmeꞌ. Txãꞌwẽmeꞌ, wala iiwejçx yajkxçxa ewmeete weteena eçxthẽꞌj weteniitey.
7 Nasa Dxusaꞌs jiimeesa ksxavxysuwa wala ew fxiꞌzesa yuuwaꞌjaꞌ, txãꞌwẽ eçxthẽꞌj kusete weteyaꞌmée, nasa ewmée weꞌweweꞌsxte.
Maꞌwẽsa diákono yũuwaꞌjaꞌswa ptaꞌsxni
8 Txãꞌwẽy dxuus yatte pkhaakhesatx theg puꞌçxsa diakonowa Dxus dxiꞌpte wala ew fxiꞌzesa yuuwaꞌjaꞌ. Kĩh yũuyaꞌ puutx weꞌweçxawa ĩsxiimée kxtey yuusáa yuuwaꞌjaꞌ. Tũumée fxiꞌzesa yuuwaꞌjaꞌ, vxyuu knaywaꞌjçxáꞌs wejx paꞌpçxuna fxiꞌzesa yuuwaꞌjmeꞌ.
9 Dxus yakh fxiꞌzewaꞌjaꞌs ew jiisa yuuna saꞌ ũustewa jxpubamée ũsthu sũhwaꞌjaꞌs jiꞌphusa yuuwaꞌjaꞌ.
10 Maꞌwẽsatewa jiyuyaꞌ nyafxte maz en nvxihtçxa, kĩhtewa ewçxáa fxiꞌzeniꞌs uyçxa txãꞌwẽ dxuus yatte pkhaakhesatx theg puꞌçxwaꞌjsa nvxiitwaꞌjaꞌ.
11 Txãꞌwẽy uꞌywa dxuus yatte selpiina fxiꞌzesaꞌ Dxus dxiꞌpte wala ew fxiꞌzesa yuuwaꞌjaꞌ, vxitesatx nuyweꞌwemée, kĩhtewa jxuka jxpaꞌyakx ewçxáa fxiꞌzesa yuuwaꞌjaꞌ.
12 Dxuus yatte pkhaakhesatx theg puꞌçxsa diakonoꞌ peekx nyuu yakhçxáa fxiꞌzesa yuuwaꞌjaꞌ, saꞌ peekx yatteweꞌsxtxi ew jxpeꞌjsa yuuwaꞌjaꞌ.
13 Txãꞌwẽ diakonoweꞌsxaꞌ txãaweꞌsx mjĩꞌs ew mjĩiçxaꞌ, tuhthetx fxiꞌzeꞌ, saꞌ Kristo Jesus yakh fxiꞌzewaꞌjaꞌs thaamemée ptaꞌsxwaꞌjaꞌs uyuꞌtx.
Kweꞌsx ewte neeyũuwaꞌjaꞌs kim yuhnawa kaajiyuꞌjnimeek ũsuꞌ
14 Idx yakh puutx uyyaꞌ dud yuweꞌnja sũjuꞌth, nawa meeçxaꞌ jxthẽeyuuwáꞌnja sũhçxa naa kartaꞌs fxiꞌjaçthu,
15 kxah Dxus yakh fxiꞌzesa yakh ew fxiꞌzeyaꞌ maꞌwẽ yũuwaꞌjaꞌswa jiyuneꞌga. Txãaweꞌsxaꞌ Dxus ĩtxisa luuçxtaꞌ, txãasatx isa ewsaꞌs nvxihtmée txãate yuuçxáa fxiꞌzeꞌ.
16 Kweꞌsx ewte neeyũuwaꞌjaꞌs kim yuhwa jiyunimeek ũsuꞌ txãꞌsaꞌ Dxusaꞌ kaavxyaꞌjaꞌkh txãꞌ naꞌwẽ seenaꞌ walasaꞌ:
Dxusaꞌ nasaa kakwe yakhku vxyaa,
Saꞌ Dxus Espiritu weꞌweçxaꞌ: Txãꞌ kĩh pkal yuhwa jiꞌphmeesaꞌ jĩnik yuu.
Açaꞌ Dxus angelesweꞌsxwa uyniisak yuu.
Saꞌ mtee mteewa jxuka ptaꞌsxni yuuteꞌ,
Naa kiwete msuuweꞌsxwa maaíi yuꞌ txãaweꞌsx ũuste jxpaꞌgatx.
Txajũꞌ cielute kiꞌ jxpaꞌganik yuu.
