1 Timoteo 4:1-16
4 Txãꞌwẽ ew ãate kaavxyaꞌjaꞌjni yuutewa, maaíi yuꞌ nmeh en yuuçteꞌ Dxus tasxu txuteetxna eçxthẽꞌj ĩsxiina kaapiyaꞌjnite fxiꞌzeyaꞌ. Txãꞌjĩnak Dxus Espirituꞌ ãate ptaꞌsxiꞌ.
2 Txãa nasa ĩsxiina kaapiyaꞌjsaꞌ yuwejuçxáa ew weꞌweçxaꞌ, ũuste yuꞌ eçx jxkaahniçxáꞌs nwẽeseꞌjna ewsa yuꞌs nwẽeseꞌjsameꞌ
3 naꞌwẽ jxkaajatxna: Kabawaꞌjmeꞌ saꞌ ũꞌtasxaꞌs Dxus nvxihtku Dxus nweꞌwenisa ewsaçxáꞌs nwẽeseꞌjsaweꞌsx Dxusaꞌs weçxana ũꞌkahn txãa ũꞌaꞌs txhitxçxaçxáa ũꞌwaꞌjaꞌ jĩtxna.
4 Txãꞌwẽ yuukahmeníi Dxus nvxiitnisa yuꞌ kĩh ũꞌwa jxuka ewsaꞌ, açaꞌ ewmeesaꞌ jĩmée ũꞌwaꞌjaꞌ,
5 txãa paꞌgatey Dxus yuwete weꞌweçxaꞌ: Ũꞌaꞌ jxuka ewsaꞌ jĩꞌk açaꞌ ũꞌaꞌs jxpaꞌgaçxaꞌ Dxusaꞌs weçxaçxa ũꞌteꞌ, ewmeesa yuꞌçmeꞌ.
Jesukristoꞌs wala ew selpisáa
6 Txãꞌwẽ Dxus yakh fxiꞌzewaꞌjaꞌs ũuste yuꞌakhçxa isasaçxáꞌs kaapiyaꞌjniꞌs ew piyaçxa yakhthẽꞌjweꞌsxtxi kaypubaꞌjmée jxpeꞌjçxaꞌ, Jesukristoꞌs wala ew selpisaaçxa txãꞌwẽ yuuneꞌga.
7 Dxus yakh fxiꞌzewaꞌjmeeçxáꞌs weꞌweni seelpimeesatxiꞌ nwẽeseꞌjmée, Dxus yakh fxiꞌzewaꞌjçxáꞌs çxhãçxha mpaꞌpçxu.
8 Txãꞌwẽmeꞌ kakwe çxhãçxhawaꞌjçxáꞌs paꞌpçxuteꞌ, jwee yuꞌ selpiꞌçmeꞌ. Nawa Dxus yakh fxiꞌzewaꞌjaꞌs çxhãçxha paꞌpçxunisak wejx jxthaakwe selpiꞌ. Txãꞌwẽsaꞌ naa kiwete ew fxiꞌzewaꞌthek selpiꞌ, saꞌ cielutewa selpiwaꞌjsaíiçxáꞌ.
9 Naꞌwẽ ptaꞌsxniꞌ ĩsxiinisameꞌ, açaꞌ jxukaysa nwẽeseꞌjwaꞌj jiꞌphtaꞌ.
10 Txãa paꞌgaíiçxáathaꞌw pxthaa yaꞌiiwẽesxuunawa çxhãçxha mjĩꞌ, txãa paꞌgatey Dxus ĩtxisa ũsaꞌ txãꞌ puꞌçx yujuna sũjuꞌthaꞌw, txãꞌ naa kiwete nasa jxukaysatx nweꞌwesaꞌ txãꞌsna ũuste jxpaꞌgasa yuutxiꞌ jxuka.
11 Txãꞌwẽ yũuwaꞌjaꞌs ew kaapiyaꞌjwaꞌj jiꞌphgu.
12 Saꞌ piçtakxaꞌ jĩna weeçxweꞌsxte wala ew mfxiꞌze, kxah Dxusaꞌs jiisaweꞌsx iidx fxiꞌzeniꞌs uyçxaꞌ, txãꞌwẽy ew fxiꞌzekahn kĩhtewa ũus yajkxçxa mweꞌwe. Saꞌ txãaweꞌsxtxi peeygãhna mfxiꞌze, Dxus yakh jxpubamée, kĩhte yuhwa pkalte wetemée.
13 Adx paꞌphkaçx idxaꞌ Dxus yuweꞌs nasaa ksxavxyte lẽeyna, yuꞌkxpehna kaapiyaꞌjna yuuwaꞌjçxáꞌs paꞌpçxuna mes.
14 Idx kĩhtewa sxiigmée ãjawaꞌjaꞌs Dxusaꞌ ũsku ancianoweꞌsx idxaꞌs peekizeçxa Dxus yakh puutx weꞌwete txãatxiꞌ ivxiituyaꞌmée wala mpaꞌyajkx.
15 Txãꞌwẽ ew fxiꞌzewaꞌjaꞌs yuuçxáa peçxkanamée mfxiꞌze, kxah idxaꞌ Dxus yakh jweeíiçxáa çxhãçxhana uꞌjniꞌs jxukaysa uyuutxna.
16 Peekíi wala mpaꞌyajkx saꞌ kaapiyaꞌjniꞌswa txãꞌwẽy mpaꞌyajkx kĩhte yuhwa sxiigmée. Txãꞌwẽ yũuçxaꞌ, idxíiwa ewte neeyũuneꞌga, saꞌ iidx ptaꞌsxniꞌs wẽseꞌjsatxwa ewte nvxiituneꞌga.
