1 Timoteo 5:1-25
5 Idxaꞌ thẽꞌjsatxiꞌs juunaꞌ weꞌwena yuꞌkxpehmée, wejxwa peeygãhna ewçxáa myuꞌkxpeh, iidx tata naꞌwẽ yajkxna. Saꞌ piçtakxtxiwa iidx nyakhweꞌsx naꞌwẽ yajkxna myuꞌkxpeh.
2 Uꞌy thẽꞌjsatxwa iidx mama naꞌwẽ yajkxna ewkuẽçxáa myuꞌkxpeh. Saꞌ knaꞌsaweꞌsxtxiwa iidx npeꞌsx naꞌwẽ yajkxna myuꞌkxpeh wala jxpaꞌyakx fxiꞌzena.
3 Nmiꞌ uute uꞌyçxáa neeyũusaaweꞌsx kĩhwa jiꞌphmée pejiina ũssatxiꞌ mpuꞌçx.
4 Nawa txãaweꞌsxaꞌ nçxiꞌk meeçxaꞌ nçun jiꞌphuwáatxna açaꞌ txãa nçun meeçxawa nçxiꞌk txãꞌwẽ njĩꞌjaꞌs jxpeꞌjwaꞌj jiꞌphtaꞌ, neyweꞌsx maꞌwẽneꞌta peeygãhna jxpeꞌj txãꞌwẽy yũuwaꞌj jiꞌphtaꞌ. Txãꞌwẽk Dxusaꞌ jxthãasuꞌ.
5 Nawa nmiꞌ uuteꞌ luuçx jiꞌphmée txãaçxáa neeyũusaꞌ, Dxus yuuçxáanatx een isa neeweꞌwena fxiꞌzeꞌ, Dxusaꞌ puꞌçxhina sũhna.
6 Nawa vxiteꞌ txãꞌwẽ yũumée nmiꞌ uuyãꞌtheꞌ naa kiweteweꞌsxçxáꞌs yajkxna fxiꞌzesaꞌ uuníi naꞌwẽsayãꞌthaꞌ.
7 Ãçxhaꞌ nasa ekajuweꞌsx ewmée nuyweꞌwekahmén, naꞌwẽ yũuwaꞌjaꞌswa mkaapiyaꞌj uꞌyçxáa neeyũusáa jiꞌjtx:
8 Txãꞌwẽ peekx nweꞌsxtxi jxpeꞌjwaꞌj jiꞌphaꞌ, saꞌ peekx yatteweꞌsx yuutxiꞌ wejx thaakwe thegwaꞌj jiꞌphaꞌ, naa kxah kxtey yuumeeçxaꞌ Dxus luuçxthu sũhwaꞌj jiꞌphmeꞌ saꞌ Dxusaꞌs jiimeesate jxthaakwek yuuwesa yuuna.
9 Nmiꞌ uuteꞌ uꞌyçxáa neeyũusaatxiꞌ puꞌçxwaꞌjaꞌ, nawa sesenta anxu jiꞌphsa teeçx nmiꞌ yakhçxáa fxiꞌzesatx txãꞌwẽ puꞌçxwaꞌjaꞌ.
10 Txãaweꞌsxaꞌ bagaçxtewa ew fxiꞌzesa yuutxna naꞌwẽ yũuna: luuçx jiꞌphsaçxaꞌ txãatx ew jxpeꞌjsa yuutxna, yatte paꞌjsatx jxpaꞌgasa yuutxna, yakhthẽꞌjweꞌsxtxi peeygãhna puꞌçxsa yuutxna, nxuste pxthaa yuusatx puꞌçxsa yuutxna, kĩhtewa jxuka ewçxáa yũuna fxiꞌzesaçxáatx puꞌçxwaꞌjaꞌ.
11 Nawa sesenta anxu ãhmée jiꞌphsatxiꞌ jxpaꞌgawaꞌjmeꞌ. Txãꞌwẽmeꞌ, kiꞌ imiꞌwaꞌjçxáꞌs yaakxnite Kristo tasxu txuteetxna,
12 açaꞌ txãꞌwẽ yũuçxaꞌ yuuwesa yuutxna, txãꞌwẽ Kristo yakh fxiꞌzeyaꞌ puutx weꞌweniꞌs eꞌskhẽ nvxiitpaꞌga.
13 Saꞌ txãꞌwẽsaꞌ yat iisa paꞌjna uꞌjyaꞌ piyaatxna, mjĩiwaꞌj yuꞌsaꞌ yaakxsamée yuuna. Saꞌ txãꞌwẽçxáamée, txãꞌwẽ txãaweꞌsx weꞌwewaꞌjmeesu jxuka weꞌwe puꞌçxyaꞌ piyaçxaꞌ, yuwee ksuusuꞌjsa yuutxna.
14 Txãa paꞌga nee knaꞌsatey txãaweꞌsx nmiꞌ uuteꞌ, txãaweꞌsxaꞌ kiꞌ iimiꞌçxa luuçx uyçxa yatte fxiꞌzetxna, txãꞌwẽ Dxus yakh fxiꞌzesatx açesa nuyweꞌwekahménthu txãꞌwẽ jxkaajaꞌ.
15 Txãꞌwẽ yũumeeçxa maaíi yuꞌ Dxusaꞌs peçxkanaçxa eçxthẽꞌj yakh fxiꞌzena ũstaꞌ.
16 Dxusna jiisaꞌ nçxiꞌk maꞌk yuu meeçxaꞌ niisa maꞌk yuu nawa maawa iꞌkweꞌsx nweꞌsx txãꞌwẽ uꞌyçxáa neeyũusaꞌs sãꞌjĩna jxpeꞌjwaꞌj jiꞌphiꞌkwe, kxah dxuus yatte pkhaakhesaweꞌsxaꞌ txakwe thẽysaꞌs uymeetxna txãa uꞌytxi puꞌçxna, naasáa kĩh nweꞌsx yuhwa jiꞌphmeesaçxáꞌs puꞌçxwaꞌjsataꞌ.
17 Dxus yuweꞌs ptaꞌsxna kaapiyaꞌjna nasatx ew jxpeꞌjsaꞌ wala ew puꞌçxni fxiꞌzewaꞌj jiꞌphtaꞌ.
18 Txãa paꞌgatey Dxus libruꞌ naꞌwẽk ptaꞌsxiꞌ: Mjĩisa bwey yuweꞌs tudnu iiũꞌ mjĩikahn jĩꞌk, saꞌ vxite ajkhẽwa weꞌweçxaꞌ: Mjĩisaꞌ jxpaꞌgawaꞌj jiꞌphaꞌ jĩꞌk.
19 Dxus yuweꞌs ptaꞌsxsatx yuuwesaꞌ jĩna nuyweꞌweniꞌs eꞌz meeçxawa tekh ew jiisa kasehmey yuꞌ nwẽeseꞌjnu.
20 Nawa isa pkalte dxih fxiꞌzena ũste jiyuçxaꞌ, juunaꞌ mweꞌwe jxukaysa ksxavxyte, kxah vxite wẽseꞌjna ũssaꞌ ũukhçxa pkalte fxiꞌzemeetxna.
21 Dxus vxiteꞌ kweꞌsxtxi jxpeꞌjsa Jesukristo vxiteꞌ Dxus angel txhitxnisa txãaweꞌsx dxiꞌpte txãꞌwẽ yũuwaꞌjaꞌs kajaçthu, ãhmée yũusatxiꞌ jxukaytxi txãa naꞌwẽçxaçxáa weꞌwena yuꞌkxpejkahn.
22 Jiyumey yuꞌ kim yuhnawa dxuus yatte jxkaahwaꞌjsa kiꞌpnu. Txãꞌwẽ jiyumey jxkaahwaꞌjsa kiꞌpçxaꞌ, txajx pkalaꞌs sũth puꞌçxsa yuuneꞌga. Kĩhwa ewmeesa yuꞌs jxuka mpaꞌyajkx.
23 Nawa tutxh wala ãçaꞌg txãa paꞌga yuuçxáa yuꞌçxáꞌs yuꞌ tudxmée, uwa yuꞌ pusmeesa yuꞌs leꞌçxkwe mtudx.
24 Maaíi yuꞌ txãaweꞌsx pkalaꞌ wala ãate yaꞌjiyuꞌtx paapẽjxmeetewa. Nawa vxiteꞌ yaꞌjiyuꞌçmeetaꞌ, txãꞌwẽsaꞌ nmeh ente yãꞌjçxáa yaꞌjiyuna.
25 Txãꞌwẽytxi ew yũuna fxiꞌzenisawa ãate yaꞌjiyuꞌ, saꞌ ew yũuna fxiꞌzenisa dud yuꞌ ãate yaꞌjiyumeeçxawa, bagaçxtewa vxyaamée yuꞌ neeyũumeetxna.
