1 Timoteo 6:1-21
6 Selpiisáꞌ iꞌkweꞌsx patron yakh wala jxpaꞌyakx nwẽeseꞌjna mfxiꞌzewe, Dxusaꞌs açeweꞌweni yuukahmén vxiteꞌ kweꞌsx kaapiyaꞌjniꞌswa txãꞌwẽy ewmée weꞌwekahmén.
2 Saꞌ selpisaaweꞌsx iꞌkweꞌsx patron maaíiaꞌ Dxusaꞌs jiisa wáa yuuna açaꞌ txãꞌwẽ kweꞌsx yakhthẽꞌj íiçxáꞌ sũhçxaçxáa leꞌçxkwe nwẽeseꞌjmée fxiꞌzewaꞌj jiꞌphmeetaꞌ, wejxwa jweeíiçxáa ew selpiwaꞌj jiꞌphtaꞌ, txãa paꞌgatey Dxusna jiisatxíiçxáa wejx ew puꞌçxna selpiwaꞌjaꞌ peeygãhna. Txãꞌwẽ yũuwaꞌjaꞌs ptaꞌsxna mkaapiyaꞌj.
3 Maaíi yuꞌ kweꞌsxtxi jxpeꞌjsa Jesukristo kaapiyaꞌjniꞌsmée, fxiy wáa ptaꞌsxina kweꞌsx kaapiyaꞌjniꞌswamée,
4 saꞌ txãꞌ ũuste iiwejçx yaakxsa kĩhwa jiimeesaçxa txãꞌwẽ yuuna. Naasáa txãꞌ luuku naꞌwẽ kĩhwa seelpimeesuçxáa weꞌwena fxiꞌzesa yuuna açaꞌ txãꞌwẽ yũupaꞌgak vxitetx ewmée yũuwaꞌj kasejeꞌ: açeyaakxni, puiini, wẽesxuni, nasa ewsatx ewmeesataꞌ sũhna fxiꞌzeni,
5 puiiwaꞌj pçuwaꞌjmeek kasejeꞌ, txãꞌwẽ nasa Dxusaꞌs jiimeesaweꞌsx yakh. Saꞌ ewmée kaapiyaꞌjsaweꞌsxaꞌ Dxus yakh fxiꞌzeni jĩnisaꞌ vxyuu knaynisana sũjuꞌtx. Txãꞌwẽsa yakhaꞌ pkhaakhenu.
6 Txãꞌwẽ Dxus yakh fxiꞌzenisaꞌ naa kiwete iiméh wala jiꞌphunisate jxthaakwe walasaꞌ kĩhwa jiꞌphmeeçxawa wẽt fxiꞌzesa yakh yuꞌ.
7 Txãa paꞌgatey kweꞌsxaꞌ naa kiwete kĩhwa jiꞌphmeethaꞌw paꞌj naꞌ kĩhwa jiꞌphmée kasejeꞌnjaꞌw.
8 Txãꞌwẽ kĩhwa jiꞌphmeeçxawa ũꞌwaꞌj vxiteꞌ athwaꞌj ropa txãꞌwẽsatx jiꞌphçxaçxáa weçxana fxiꞌzewaꞌj jiꞌpthaꞌw.
9 Nawa txãꞌwẽ yaakxsameꞌ maaíi yuꞌ wala jiꞌphu wẽeniçxáꞌs yaakxsaꞌ ewmeetetx weteꞌ, ewmée yũuwaꞌjçxáꞌs yaakxpaꞌga. Saꞌ txãꞌwẽ yaakxnisaꞌ nasatx ewmeete kaaivxituꞌjsaçxáꞌ.
10 Txãꞌwẽ vxyuçxáꞌs wejx thaakwe yaakxpaꞌgaíiçxáak kĩhtewa jxuka ewmée yũuwaꞌjçxaçxáa kasejeꞌ. Txãa paꞌga maaíi yuꞌ vxyuu jiꞌphu wẽeniçxáꞌs yaakxsaꞌ Dxus yakh fxiꞌzenijũ txuteeçxa wala nxusteçxáa fxiꞌzena ũstaꞌ peekíi.
Dxus yuuçxáꞌs ũuste peçxkanamée yaakxwaꞌjaꞌs mjiꞌphu
11 Nawa idxaꞌ Dxusna nwẽeseꞌjsag naa paꞌga txãa ewmeejũ jxuka txuteeçxa kĩhte yuhwa jxpubamée Dxusçxáana yajkxna vxitetx peeygãhna thẽysa paꞌthewa txãatxiꞌ yajkxmée ũusuh jxuka manvxiht ewmeesaꞌs.
12 Dxus yakh txutemée fxiꞌzewaꞌjaꞌsçxáa çxhãçxha mpaꞌpçxu, bagaçxte yuhwa pçumée ĩtxi fxiꞌzewaꞌjaꞌsçxáa yajkxna. Txãꞌwẽ yuukahníiçxáak Dxusaꞌ paꞌya, açaꞌ idxaꞌ jxukaysa dxiꞌpte Dxus yakhçxáa fxiꞌzeꞌnja jĩnag weꞌwe.
13 Dxusaꞌ naꞌwẽ ĩtxi fxiꞌzewaꞌjaꞌs peesuꞌk kĩjkĩhçxah ũsna txãatx jxuka vxiteꞌ Jesukristowa Dxus Nçxiꞌkthu jĩna ãate ptaꞌsxku Poncio Pilato tasxte txãꞌwẽ yuusaaweꞌsx dxiꞌpte ãçxhaꞌ idxaꞌs jxkaajaçthu:
14 Adx maꞌwẽ jxkaahniꞌs kxtey nwẽeseꞌjeneꞌga kĩhte yuhwa jxpubana yuꞌpthehmée kweꞌsxtxi jxpeꞌjsa Jesukristo kĩhpkaçx.
15 Jesukristo kĩiwaꞌj en ãhteꞌ, Dxusaꞌ Jesukristoꞌs kaavxyaꞌjaꞌjana, txãa paꞌgatey Dxus yuuçxáa kĩhtewa jxuka ãjawaꞌjsa txãa yuuçxáꞌ, saꞌ Maa jxkaahsatewa jxthaakwe jxtuhthesaꞌ, Maatewa jxthaakwe çxhãçxhasa.
16 Txãa yuuçxáa uuwaꞌjsameꞌ, eenaꞌ kweethnite kim yuhwa utxaayaꞌ ãjanimeete ũssa. Txãꞌsaꞌ maa piçthẽꞌj yuhwa iiuymeetxna saꞌ ãçxpkaçx iiuymeetaꞌ. Txakwe seenaꞌ walasa txãa yuuçxáꞌs tuutheꞌjni yuuwaꞌjaꞌ, bagaçxte yuhwa pçuwaꞌjmeesaꞌs.
17 Naa kiwete jiꞌphsatxiꞌ mweꞌwe, jiꞌphuwaꞌjçxáꞌs paꞌpçxuna iiwejçx yajkxna fxiꞌzekahmén. Txãꞌwẽmeꞌ jiꞌphuniçxáꞌs yaakxniꞌ wala kxulsataꞌ, wejxwa Dxusaꞌsçxáa yaakitxna, txãa paꞌgatey txãꞌ ĩtxisaꞌ, kweꞌsx kĩhçxah peejiniꞌswa peejxmée jxuka ũssa.
18 Ew yũuwaꞌjçxáꞌs mkaah, kxah txãaweꞌsx ew yũuniçxáꞌs jiꞌphsa yuutxna, saꞌ txãaweꞌsx jiꞌphuniꞌs vxitetx jxtxuhdeyaꞌwa piyaatxna.
19 Txãꞌwẽ yũuçxaꞌ cielute jxpaꞌgawaꞌjaꞌs jxaawsa yuuçxa, bagaçxte yuhwa pçumée ĩtxi fxiꞌzewaꞌjaꞌs jxpaꞌgasa yuutxna.
Timoteo jxpaꞌyajkx fxiꞌzewaꞌjaꞌs neeweꞌweni
20 Timoteo, idxna neeweꞌweniꞌs mpaꞌyajkx. Weꞌweni kĩhwa seelpimeesatxiꞌ wẽseꞌjnu, saꞌ Dxus yuwete jxthaakwe jiisathaꞌw jĩna weeçxsatxwa nwẽeseꞌjnu.
21 Txãꞌwẽ yũumeeçxaíi maaíi yuꞌ txãꞌjĩna weꞌwesa yakh uꞌjsaꞌ jxpubana ũstaꞌ Dxus yakh fxiꞌzenijũ. Txãꞌwẽ yũukahmén, Dxusaꞌ idxaꞌs puꞌçxhina.
