2 Korintios 1:1-24
1 Jesukristo jxkaahnisa Pablo yaaseth, txãꞌwẽ yũuwaꞌjaꞌs Dxusku jxthãas txãa paꞌga. Naa kartaꞌs yakhthẽꞌj Timoteo yakh fxiꞌjçxa kajaçthu Dxus luuçx Korinto çxhabte pkhaakhena ũssaweꞌsxtxi. Saꞌ txãaweꞌsxtxiçxáa mée, Akaya kiwesuweꞌsx Dxus luuçx jxukaysaweꞌsx jĩi yãꞌjçxa fxiꞌjaçthu weçxana.
2 Iꞌkweꞌsxtxiꞌ Dxus kweꞌsx tataꞌ puꞌçxhina vxiteꞌ kweꞌsxtxi jxpeꞌjsa Jesukristowa, txãa paꞌga Dxus yakhçxáa mfxiꞌzewe.
Pablo pxthaa nxuste fxiꞌzeni
3 Ãçxhaꞌ Dxusaꞌs wala weçxawaꞌj jiꞌpthaꞌw, txãꞌ kweꞌsxtxi jxpeꞌjsa Jesukristo Tataꞌ, txãasak kweꞌsxtxiꞌs peeygãhçxa bagaçxtewa kvxiisxaꞌjna nes yuꞌ.
4 Kweꞌsxtxiꞌ kĩjkĩh nxuswaꞌj en paꞌthewa, kvxiisxaꞌjaꞌk Dxusaꞌ, açaꞌ txãa maꞌwẽga kweꞌsxtxiꞌs kvxiisxaꞌj, txãꞌwẽy kweꞌsxwa vxitesa nxusna fxiꞌzesatx kvxiisxaꞌkhanku txãꞌwẽ yũꞌ.
5 Kristoꞌs nwẽeseꞌphaꞌga maꞌwẽga seenaꞌ nxuswaꞌj en paꞌjaꞌ, nawa Kristo puꞌçxteꞌ, txãꞌwẽyçxáathaꞌw kvxiisxaꞌjnisaꞌswa jxpaꞌgaꞌ.
6 Txãꞌwẽ iꞌkweꞌsx ewte neeyũuwaꞌjaꞌs jxpaꞌgaçxa kvxiisxaꞌjni yuukahnthaꞌw kweꞌsxaꞌ nxuste fxiꞌzeꞌ. Dxusaꞌ kweꞌsxtxi kvxiisxaꞌjçxaꞌ, iꞌkweꞌsxtxiwa txãꞌwẽy kvxiisxaꞌjçxa ewte nvxiituna, kxah iꞌkweꞌsxaꞌ wantãyyaꞌ ãjaneꞌkwe kweꞌsxtxi nxuswaꞌj en paꞌjaꞌk txãꞌwẽysa iꞌkweꞌsxtxiwa paꞌthewa.
7 Iꞌkweꞌsxaꞌ nxuswaꞌj enaꞌsaꞌ jxpaꞌgaçxaꞌ, Dxus kvxiisxaꞌjniꞌswa txãꞌwẽyçxáa jxpaꞌgawaꞌjsa iꞌkwe txãꞌwẽ yũuwaꞌjaꞌs ew jiithaꞌw.
8 Asia kiwete maꞌwẽtka seenaꞌ nxussaꞌs jiꞌphu txãꞌsna miiyajkxwe, yakhthẽꞌjweꞌsx. Kxteeaꞌ iimejk seenaꞌ wala nxuswaꞌj en paꞌj, açaꞌ peena yuꞌ ĩtxĩ fxiꞌzewaꞌj jiꞌphmeeneꞌtka sũjuꞌth wantãyyaꞌ çxhãçxhameeçxa.
9 Ãçxhaꞌ uu en yuhna sũjuꞌçxáath. Nawa naa kiwete ĩtxĩ fxiꞌzeniꞌs yajkxmée Dxus ĩtxĩ vxit-sana yaakxkahnçxáak txãꞌwẽ yuu.
10 Txakwe seenaꞌ uuwaꞌtheçxáa yãꞌj fxiꞌzeçtewa, Dxusaꞌ adxaꞌs nweꞌwek, saꞌ ãçxwa nweꞌwena nes txãꞌwẽꞌ.
11 Kweꞌsx paꞌgate iꞌkweꞌsxaꞌ Dxus yakh puutx weꞌwepaꞌga txãꞌwẽ nweꞌwena nes yuuna sũhna Dxusçxáanath yaakiꞌ. Saꞌ nasa maazkuẽesawa kweꞌsx paꞌgate Dxus yakh puutx weꞌweteꞌ, Dxusaꞌ kweꞌsxtxi nweꞌwena açaꞌ txãaweꞌsxaꞌ Dxusaꞌs weçxaatxna.
Pabloꞌ kĩh yuuçxaga Korinton uꞌjmée
12 Isath weꞌweꞌ, Dxusaꞌs açesaweꞌsx yakhwa ew yuuçxáath yũuna fxiꞌze, saꞌ iꞌkweꞌsx yakh yuꞌ wejxthu txãꞌwẽ ewçxáa fxiꞌze sũhna yuuçxáak ũusutheꞌ, txãa paꞌgath weçxáꞌ. Txaꞌwẽ ew yũuna fxiꞌzewaꞌjaꞌs Dxusku puꞌçx, açaꞌ peekx ũusuhçxáa çxhãçxha yajkxçxa txãꞌwẽ ew fxiꞌzemeeth.
13 Adxaꞌ iꞌkweꞌsxtxi karta fxiꞌjçxaꞌ, ĩsxiiyaꞌ sũhçxa fxiy yajkxna fxiꞌjmeeth, açaꞌ iꞌkweꞌsxaꞌ kuh jwed yaakxnuwe.
14 Iꞌkweꞌsx maaíi yuꞌ adx kaapiyaꞌjniꞌ isasatewa jiyuiꞌkwe naꞌ ew jiyuna mjxãꞌjwe. Txãꞌwẽ ew jiyuçxaꞌ, kweꞌsxtxi jxpeꞌjsa Jesus kĩhteꞌ, iꞌkweꞌsxaꞌ wẽtwẽt yaakineꞌkwe adx iꞌkweꞌsxtxi ew yũupaꞌga, açaꞌ adxwa wẽtwẽt yaakiꞌnja iꞌkweꞌsx ew fxiꞌzepaꞌga.
15 Txãꞌwẽ adx kaapiyaꞌjniꞌs ew jiisaiꞌkwe txãa paꞌga adxaꞌ eꞌz us paꞌjyaꞌ yuweꞌnja sũhna yaakxnith jiꞌphuꞌ iꞌkweꞌsx yakh weçxana puutx uyyaꞌ.
16 Nyafxteꞌ Macedonia kiwen uꞌjweççxa iipaꞌj uꞌjweꞌnja. Saꞌ Macedoniajũ kiꞌ sxawedna yuhçxa kiꞌ paꞌjaꞌnja sũjuꞌth. Açaꞌ kxtee ũsçxa Judea kiwen uꞌjweçteꞌ, iꞌkweꞌsxaꞌ adxaꞌs puꞌçxhineꞌkwe sũhna yaakxnith jiꞌphuꞌ.
17 Ew ũus yajkxmey fxiꞌjaꞌneꞌ kxtey yuꞌnja jĩçxawa kxtey yuꞌçmeꞌ, Dxusaꞌs jiimeesa naꞌwẽ, sũjuwáꞌkwe.
18 Nawa Dxusaꞌ jiiaꞌ adxaꞌ eꞌz jwed weꞌweꞌçmeeth iꞌkweꞌsxtxiꞌs.
19 Txãꞌwẽ yũukahmeníi Dxus Nçxiꞌk Jesukristoꞌ bagaçxte yuhwa eꞌz jwed weꞌwemée isasaçxáꞌsku weꞌweꞌ, açaꞌ kweꞌsxaꞌ txajx weꞌweniꞌsthaꞌw ptaꞌsxiꞌ iꞌkweꞌsx ksxavxyte Silwano, Timoteo vxiteꞌ adx yãꞌjçxa.
20 Naꞌwẽ Dxusaꞌ kĩh yũuwaꞌjaꞌswa puutx weꞌwek txãꞌsaꞌ Kristo yuuçxáak jxuka kxtey yuu, Dxus puutx weꞌweniꞌs kaavxyaꞌjaꞌjna. Txãa paꞌgathaꞌw Dxusaꞌ bagaçxtewa kxtey yuusaꞌ jĩna tuutheꞌjeꞌ.
21 Txãasak Dxusaꞌ adxna vxiteꞌ iꞌkweꞌsxtxiwa puꞌçx isasaçxáꞌs kxtey yuuna fxiꞌzekahn, Kristo yuuçxáꞌs selpiina fxiꞌzepaꞌga.
22 Saꞌ Dxusaꞌ kweꞌsxtxi txhitxhçxa txajx Espirituꞌs peesku, Dxus jĩi yuꞌsaꞌ kĩhnawa jxuka txãꞌwẽçxaçxáa jxpaꞌgawaꞌjsa iꞌkwe jĩna kaajiyuꞌjna.
23 Naꞌwẽ Korinton uꞌjweꞌnja sũhçxawa, kxtey yuunimeeth. Nawa txãa yuꞌ wejxwa iꞌkweꞌsxtxi juunaꞌ weꞌwena ũsyaꞌmeeth txãꞌwẽ yũu. Adx ũuste ĩsxiiçxa txãꞌjĩꞌçmeeth txãꞌsaꞌ Dxusaꞌ jiiaꞌ.
24 Iꞌkweꞌsxtxi ũusaçxaçxa txãꞌwẽ yuhmée yuumeeth, wejxwa kimwa juunaꞌ weꞌwemeete iꞌkweꞌsx pweꞌsxçxáa ewkuẽeçxah yuweꞌs pheuꞌkhanthu ũythasna txãꞌwẽ yũu. Adx txãꞌwẽ juunaꞌ yũukahmeníi iꞌkweꞌsxaꞌ Dxus yakh yuꞌ çxhãçxha yãꞌj ũsiꞌkwe.
