2 Korintios 10:1-18
10 Adxaꞌ Kristo naꞌwẽy wala peeygãhna iꞌkweꞌsxtxi weꞌweꞌth, adxaꞌs açeweꞌwena naꞌjĩꞌiꞌkwe txãꞌsna: Pabloꞌ kweꞌsx yakh ih ũsçxa yuꞌ maꞌjĩmeꞌ. Nawa jxuꞌj txuteeyãꞌjçxaꞌ, wala juunaꞌ weꞌwena jxkaajaꞌk jĩna iꞌkwe nuyweꞌweꞌ.
2 Adx iꞌkweꞌsx tasxte paꞌjçxa maaíitxiꞌs juunaꞌ yuukahmen, adxaꞌs nuyweꞌwenuwe, txãꞌwẽ Dxus jxthãasnimeꞌsku juunaꞌ jxkaajaꞌ jĩna. Txãꞌwẽ nuyweꞌwesa yakh yuꞌ puutx pdxiꞌpuyaꞌçxáa ũsthu maa yakhwa.
3 Adxaꞌ iꞌkweꞌsx naꞌwẽy nasaçxáa yuhth. Nawa adxaꞌ naa kiweteweꞌsx naꞌwẽ puiiyaꞌ ũsmeeth.
4 Kweꞌsxaꞌ naa kiwete puiinisa yakh puiꞌçmeethaꞌw. Dxus kaaũusutheꞌjnisa yakhthaꞌw puiꞌ. Txãasa ewmeesa yuꞌsaꞌ makwe seenaꞌ walasatewa knaywaꞌjsathaꞌw.
5 Txãasathaꞌw knayuꞌ Dxusaꞌs jiyukahmen yupsa yuꞌsaꞌ maꞌwẽsatxwa, kweꞌsx ũus yaakxni yuꞌsaꞌ nwẽeseꞌjmée, Kristo kaaũusutheꞌjniçxáꞌsthaꞌw kxtey yuꞌ Kristoꞌs nwẽeseꞌkhan.
6 Saꞌ iꞌkweꞌsx yuꞌ ew yãꞌj nwẽeseꞌthewa, maaíi yuꞌ nwẽeseꞌjmée ũssatxiꞌs maatxwa kastigãyyaꞌçxáa ũsthu.
7 Iꞌkweꞌsxaꞌ ãakhẽweꞌsxçxáꞌs iꞌkwe theguꞌ, txãꞌwẽ maawa Kristoꞌs selpisath sũhna yaakxsaꞌ, adxnawa txãꞌwẽy Kristoꞌs selpisana sũhna yaakxwaꞌjna.
8 Adxaꞌ juunaꞌ jxkaahwaꞌjsath jĩna weꞌwena nesthu yuꞌ, nawa txãꞌjĩpaꞌga thaamewaꞌj yuꞌ jiꞌphmeeth. Txãa paꞌgatey Kristok txãꞌwẽ ivxiitumée wejxwa juunaꞌ jxkaahna yuꞌkxpehwaꞌjaꞌs adxna ũs, iꞌkweꞌsxaꞌ Dxus yakh çxhãçxha fxiꞌzekahn.
9 Açaꞌ ũukhkahnku karta juunaꞌ fxiꞌjçxa kajaꞌ sũhna yaakxnuwe.
10 Saꞌ iꞌkweꞌsx weꞌweçxaꞌ: Kartate yuꞌ wala juunaꞌ weꞌwena fxiꞌjaꞌk, nawa puutx pdxiꞌpuçxa yuꞌ, jxkaahwaꞌj yuꞌsaꞌ ãjaꞌçmeꞌ jĩꞌiꞌkwe.
11 Nawa txãꞌjĩsaꞌ jxpaꞌyakina, maꞌwẽtka jxuꞌju ũsçxa, juunaꞌ weꞌwena karta kajaꞌ naꞌ, txãꞌsaꞌ kxtey yuꞌnja iꞌkweꞌsx yakh puutx uyna paꞌjçxaꞌ.
12 Wala mjĩisathaꞌw jĩna weeçx weꞌwesa yakh kaajaꞌdaꞌjna ũs wẽemeeth. Txãaweꞌsxaꞌ iiméh wala jiimeetaꞌ, txãasatx vxitesate thaakwe mjĩisathaꞌw jĩna fxiꞌzeꞌ.
13 Adxaꞌ txãaweꞌsx naꞌwẽy vxitee mjĩinisu iweeçx weꞌwena fxiꞌzewaꞌj jiꞌphmeeth. Adxaꞌs Dxus mtee paꞌj mjĩina pekũhwaꞌjaꞌs ũsuna kxtee paꞌj mjĩiwaꞌjsath. Txãꞌwẽçxa íiçxáath adxaꞌs Dxus kaatheꞌ, iꞌkweꞌsx tasxtewa paꞌj.
14 Txãꞌwẽ adx pekũhwaꞌjmeesu yuꞌ uꞌjmée ũsthu naꞌ, iꞌkweꞌsx tasxsuwa adx pekũhwaꞌjmeewaç yuꞌ, iꞌkweꞌsx yakh ũsyaꞌ nyafxíi paꞌjwaꞌjmée neꞌtka yuꞌ. Nawa iꞌkweꞌsx tasxsu adx paꞌjwaꞌkh yuꞌ, txãa paꞌgath Kristo kaapiyaꞌjni ewsaꞌs iꞌkweꞌsxtxi ptaꞌsxyaꞌ adx nyafxte paꞌj.
15 Txãasa adxaꞌ vxitee mjĩiniꞌs iweeçx weꞌwena ũsmeeth. Txãꞌwẽ weꞌwemée wejxwa Dxus puꞌçxteꞌ, jweeíiçxáa iꞌkweꞌsx yakh wala mjĩiyaꞌ ãjaꞌnja, iꞌkweꞌsxaꞌ jweeíiçxáa Dxusaꞌs jiyukahn sũjuꞌth. Nawa Dxus mtee paꞌj mjĩikaatheꞌ, kxtee paꞌjçxáa.
16 Txãꞌwẽ yũuçxa txãa eꞌsuꞌ vxite ahsuwa kasejeꞌnja Dxus yuwe ewte nvxiitwaꞌjsaꞌs ptaꞌsxna. Nawa vxitee mjĩinisu yuꞌ iweeçx weꞌwena uꞌkameꞌnja sũjuꞌth.
17 Adxthu mjĩi jĩna weꞌwepkaçxte, wejxwa Dxusku mjĩi sũhnaçxáa weçxana fxiꞌzewaꞌjaꞌ.
18 Txãa paꞌgatey iiwejçx weꞌwesa txãꞌwẽ Dxus dxiꞌpte ewsa kasejeꞌçmeꞌ, naasáa Dxus weꞌweçxa txãꞌ ewsaꞌ jĩnisa yuuçxáa ewsaꞌ.
