2 Korintios 11:1-33
11 Adxaꞌ iꞌkweꞌsxtxi yuꞌkxpejxaꞌ sxiiguꞌneꞌthka, nawa txãatxiꞌ mwantaĩwe. Makwe ãjaꞌçmeewáꞌntka, nawa ãçxwa mwantaĩwe.
2 Adxaꞌ iꞌkweꞌsxtxiꞌ Kristo tasxu weh yuhwa txutee jxthãasuꞌçmeeth. Knaꞌsawa maꞌwẽga teeçxsa yakh yuuçxáa imiꞌçxa fxiꞌzeꞌ, txãꞌwẽy iꞌkweꞌsxtxiꞌ Kristo yakh yuuçxáa kaafxiꞌzeꞌjyaꞌth neeyũu Dxus dxiꞌpte.
3 Nawa eçxthẽꞌjaꞌ nyafxíiwa maꞌwẽga Ewaꞌs ĩsxii, txãꞌwẽy ãçxwa iꞌkweꞌsxtxiꞌs ĩsxiijawáana, açaꞌ Kristo yakh txakwe ew fxiꞌzeççxawa txuteewáꞌkwe sũhçxath ũukhuꞌ.
4 Txãꞌwẽ yaakxkahníi iꞌkweꞌsxaꞌ waꞌlmée jxpaꞌgana ũsiꞌkwe adx ptaꞌsxiꞌth Kristo kaapiyaꞌjniꞌs txãꞌwẽmée fxiy ptaꞌsxsatx. Saꞌ nyafxíi jxpaꞌgaiꞌkwe Dxus Espirituꞌs txãꞌwẽmée fxiysanawa waꞌlmée weçxana jxpaꞌgana ũsiꞌkwe. Txãꞌwẽy Dxus yuwe ewte nvxiitwaꞌjsaꞌs nyafxíi wẽseꞌjiꞌkwe txãꞌwẽmée fxiysatewa waꞌluꞌçmeeiꞌkwe.
5 Txãꞌwẽ fxiy kaapiyaꞌjsaweꞌsxaꞌ Jesus jxkaahnisa walasathaꞌw jĩꞌtx, nawa adxaꞌ txãaweꞌsxte ãhmeekwesa neꞌtka sũjuꞌçmeeth.
6 Adxaꞌ weꞌweyaꞌ yuꞌ ãjãçmeeneꞌthka, nawa adx ũuste yuꞌ wala jiith. Txãasa íiçxáath adxaꞌ iꞌkweꞌsxtxiꞌ ãate kaajiyuꞌjuꞌ adx jiyuniꞌs bagaçxtewa.
7 Txãꞌwẽ iꞌkweꞌsxtxi kçxhãaçxhaꞌjyaꞌ sũhçxa, iꞌkweꞌsx yuutxiꞌs vxyuu pẽjxmée adx vxyuu yakhthu fxiꞌzeꞌ Dxus yuweꞌs ptaꞌsxna. Saꞌ txãꞌwẽ yũuçxaꞌ, ewmeewáꞌntka yuukx.
8 Iꞌkweꞌsx yuutxiꞌ vxyuu thãasmée, wejxwa Dxus luuçx vxite ahsuweꞌsx adxna peestxi txãꞌsnath iꞌkweꞌsx tasxte kaaselpiꞌjiꞌ.
9 Saꞌ iꞌkweꞌsx tasxte ũsçxaꞌ, adxaꞌ peejiiçxawa iꞌkweꞌsx yuutxiꞌ maa yuhtxwa thãasmeeth. Adx peejiniꞌs Macedoniajũ yakhthẽꞌjweꞌsxtxi pees. Txãꞌwẽth wala jxpaꞌyakx fxiꞌzena ũsuꞌ iꞌkweꞌsx yuutxiꞌs maa yuhtxwa thãasmée, saꞌ iꞌkweꞌsx yuutxiꞌs thãasmeꞌnja bagaçxtewa.
10 Adx ũuste isa yajkxçxa weꞌweniꞌs Kristoꞌ jiiaꞌ, açaꞌ Akayasuweꞌsxaꞌ: Pabloꞌ txãꞌwẽ vxyuu thãasku jĩyaꞌ ãjãmeetxna.
11 Kweꞌsxtxi ahçeçxak Pabloꞌ txãꞌwẽ weꞌweꞌ sũjuwáꞌkwe. Nawa txãꞌwẽ yũumée, iꞌkweꞌsxtxi wala peeygãjaꞌth txãꞌsaꞌ Dxusaꞌ jiiaꞌ.
12 Nawa naꞌwẽth vxyuu thãasuꞌçmée naꞌ txãꞌwẽ yũuna nes yuꞌnja, adxwa maꞌwẽtka kĩhwa thãasmée Dxus yuweꞌs ptaꞌsxna ũsuꞌ açaꞌ txãꞌwẽy txãaweꞌsxwa kĩhwa thãasmeethaꞌw jĩyaꞌ ãjãmeetxna.
13 Txãaweꞌsxaꞌ Jesus jxkaahnisathaꞌw jĩna ĩsxiinisaꞌs isasa naꞌwẽ weꞌwena uꞌjusaçxáataꞌ.
14 Txãꞌwẽ yũuniꞌs fxiy yuh yuuneꞌta sũhna yaakxwaꞌj jiꞌphmeethaꞌw, txãa paꞌgatey eçxthẽꞌj seenaꞌsa yuhçxawa angel ewsa naꞌwẽ yuuçxak vxyaꞌ.
15 Açaꞌ kxahtx eçxthẽꞌjaꞌs selpisaawa txãꞌwẽy ewmeesaçxawa ewsa naꞌwẽ yuuçxa vxyaꞌ. Nawa txãꞌwẽ ewmée yũuna fxiꞌzepaꞌga vxituwaꞌjaꞌs jiꞌphutxna.
Kristo kaahnisa Pablo pxthaa yuuna fxiꞌzeni
16 Adxaꞌ naꞌjĩꞌth naꞌ: Luukumeeth, nawa txãꞌwẽtewa luukuna sũhna yaakxsa yakh yuꞌ luuku naꞌwẽyçxáawa kiꞌ weꞌweyaꞌwath: ¿Adxçxáa kĩh yũuçxa iiwejçx yaakxwaꞌjaꞌs jiꞌphmée yuukiꞌth?
17 Iiwejçx weꞌwenisaꞌ Kristo jxkaahnisameetaꞌ, naasáa luuku yuusáa weꞌwenisaçxáataꞌ. Txãa paꞌga adxaꞌ luuku yuusáa weꞌweniçxáꞌs weꞌweyaꞌwath.
18 Naa kiweteweꞌsxçxáꞌs jiiçxawa nakwe wala iiwejçx yaakiꞌtx açaꞌ adxwa iiwejçx yaakxwaꞌj jiꞌphneꞌtka.
19 Iꞌkweꞌsxaꞌ txakwe wala jiisathaꞌw sũjuꞌiꞌkwe nawa luuku weꞌwesa yuutxiꞌ jiyumeeiꞌkwe nwẽeseꞌjeꞌ.
20 Txãasa iꞌkwe txãaweꞌsx juunaꞌ kaaselpiꞌjiniꞌs waꞌluꞌçmée, ĩsxiiçxa vxyuu kusaꞌjaꞌtx, saꞌ iꞌkweꞌsxtxi iiyamuçxa ahçenatx jxpeꞌjeꞌ uyiina.
21 Nawa adxaꞌ txãꞌwẽy juunaꞌ yuuyaꞌ ãjãmeeth, açaꞌ thaame yujaꞌ nawa ptaꞌsxiꞌth.
Nawa vxite txãꞌwẽ yãꞌj iiwejçx weꞌweçteꞌ, adxwa txãꞌwẽy luuku weꞌweniꞌs weꞌwewaꞌj jiꞌpthu.
22 Txãaweꞌsxaꞌ hebreoweꞌsxtxna, açaꞌ adxwa txãath. Israelweꞌsxtxna, açaꞌ adxwa txãaíiçxáath. Abrahan jiꞌjtxna, açaꞌ adxwa txajũjxweꞌsxthu.
23 Kristoꞌs selpiisaathaꞌw jĩꞌtx, açaꞌ adxaꞌ txãaweꞌsxte wejx jxthaakwe selpiisath. Txãꞌwẽ iiwejçx weꞌwenisaꞌ luuku yuusáa weꞌweniçxáꞌ, nawa weꞌweçthu. Adxaꞌ txãaweꞌsxte jxthaakwe mjĩisath, txãaweꞌsxte jxthaakwe pkxuunisath, karcelte maazkuẽe uswa kxuuphnisath, maazkuẽe uswa uuwaꞌtheçxáa yãꞌj fxiꞌzesath.
24 Adxaꞌs judiuweꞌsxaꞌ tahç us kastigãyçxaꞌ treinta y nwewe ãhpkaçxtxi peçxujkwe.
25 Tekh usthu pãpani yuu. Teeçx enteꞌ kwet wãatatahçxa ikheꞌdxihtx. Tekh usku adx uꞌjni barkoꞌ ĩkh dxiikhẽ khẽe. Vxite enteꞌ teeçx kus peꞌte teen utath ĩkhsu pehdna uꞌjuꞌ.
26 Iiméh wala pekũhsath, yuꞌwala seenaꞌsuwa ktejkana, peswée ikh wẽeni, adx nweꞌsx íiwa ikh wẽeni, maawa txãꞌwẽy yũu wẽeni. Çxhabsu maꞌk yuu, meeçxaꞌ dxiꞌthe maꞌk yuu, meeçxaꞌ ĩkhte maꞌk yuu, nawa txãꞌwẽçxaçxáath ũukh ũukhte fxiꞌzena ũsuꞌ. Yakhthẽꞌjweꞌsxthaꞌw jĩna ĩsxiisawa ikh wẽeni yuuçxáath uꞌjuꞌ.
27 Mjĩina nxusteth fxiꞌzeꞌ. Maazkuẽe kuswa dehmeeth uꞌjuwaꞌj jiꞌphuꞌ, pxthaa wẽena, yũꞌwẽena, ũꞌwaꞌj uymée maazkuẽe uswa uꞌjuꞌth, ropa jiꞌphmée kumana pxthaa yuuna.
28 Txãꞌwẽ nxuste fxiꞌzenisaçxáatx jiꞌphumeeth. Dxus luuçx msuuweꞌsxtxiwa jxuka peeygãhna yaakxwaꞌjaꞌswa een isath jiꞌphu.
29 Maawa Dxus yakh çxhãçxhamée fxiꞌzeçteꞌ, adx yuu txãꞌwẽ yuuç naꞌwẽth yaakiꞌ txãaweꞌsxtxi peeygãhna. Maaíitxiꞌs pkalte kweeteꞌjeçteꞌ, adx yuu txãꞌwẽ pkalte weteeç naꞌwẽth yaakiꞌ txãaweꞌsx paꞌgate.
30 Adxaꞌ iiwejçx weꞌweyaꞌwaçxaꞌ, wejxwa adx pxthaa yuuna fxiꞌzeçte Dxus puꞌçxku txãꞌsçxáana yaakxwaꞌj jiꞌpthu.
31 Bagaçxtewa tuutheꞌjni fxiꞌzewaꞌjsa kweꞌsxtxi jxpeꞌjsa Jesukristo Tataꞌ jiiaꞌ adx ĩsxiimée isa weꞌweniꞌs.
32 Vxite enteꞌ adxaꞌs naꞌwẽtx yuu: Damasko çxhabte ũsteꞌ, Aretas jxkaahna ũsni kiwete neꞌjweꞌsxaꞌ çxhabte uꞌkani vxitxte adxna tudwaꞌjsa txajk.
33 Nawa adxaꞌs kanastate akhçxa wentana muralxakhẽtx spajkx. Txãꞌwẽ yũuçxath iyu ewmeesa kusejũ.
