2 Korintios 12:1-21
12 Peekíiçxáa iiwejçx weꞌweni yakhaꞌ kĩh yuhwa ewsa yaꞌkutxiꞌjiꞌçmeꞌ, açaꞌ wejx yuuwa Kristo kaavxyaꞌjaꞌjniꞌs uyniçxáꞌs weꞌweyaꞌwath.
2 Katorce anxu yuuçaꞌ txãa ensuꞌ teeçx piçthẽꞌj Kristoꞌs nwẽeseꞌjsaꞌs tekh cielute kãhpkaçx jxũna uꞌjnik yuu txãa piçthẽꞌjaꞌs jiith. Txãꞌsaꞌ petx kakwe maꞌk jxũna uꞌjni yuu, meeçxaꞌ kakwe jiꞌphmée maꞌk jxũna uꞌjni yuu nawa Dxusçxáa jiina.
3 Maꞌwẽneꞌ yuu kakwe jiꞌph maꞌk jxũna uꞌjni yuu, meeçxaꞌ jiꞌphmée maꞌk jxũna uꞌjni yuu txãa yuꞌsaꞌ jiimeeth, Dxusçxáa jiiaꞌ.
4 Nawa jxũna uꞌjni yuh yuuk Dxus ũsnite paꞌj. Açaꞌ kxteeaꞌ weꞌweni wẽseꞌkh, kim yuhnawa ptaꞌsxwaꞌj meeaꞌs.
5 Txãꞌwẽ yũunisaçxáꞌ iiwejçx yajkxyaꞌ yaꞌãjayujuna. Nawa iiwejçx weꞌwena ũs wẽemeeth, naasáa adx pxthaa yuuna fxiꞌzeniçxáꞌs yaakxwaꞌj jiꞌpthu.
6 Adx iiwejçx weꞌwe wẽewaç yuꞌ, txãꞌ ĩsxiinisamée yuh yuuna, txãa paꞌgatey isasaçxáꞌsku yaꞌweꞌweꞌ naa paꞌga. Nawa txãꞌwẽ yuꞌ iiwejçx weꞌweꞌçmeeth, kxah maa yuhwa adxaꞌs thaakwe walasana sũhna yajkxmeetxna adx fxiꞌzeniꞌs uyna wẽseꞌjçxawa.
7 Txãꞌwẽ Kristo kaavxyaꞌjaꞌjnisaꞌ iiméh seenaꞌ wala zhiçxkwesa yuꞌk, açaꞌ txãatx jiyuçxa adxaꞌ iiwejçx yaakxweꞌsxte, adx kakwete seenaꞌ wala akasa kaapaꞌjaꞌjnith yuu, eçxthẽꞌj kaahnisa.
8 Açaꞌ Kristoꞌs tekh uswa pẽjxthu txãa akaꞌs kaykaseꞌkhan.
9 Nawa Kristoꞌ naꞌwẽçxáak pas: Peeygãhçxa adx piꞌkxna ũsni wejx thaakwe ewsaꞌ, txãa paꞌgatey çxhãçxhameesaíiçxáa adx puꞌçxniꞌs jxpaꞌgawaꞌjsataꞌ jĩꞌk. Txãa paꞌgath weçxana fxiꞌzeꞌ, aka yuꞌ kasemeetewa, Kristoꞌ adxaꞌs peeygãhçxa puꞌçxna nes yuuna sũhna.
10 Txãa paꞌga adxaꞌ waꞌluꞌçmeeth, çxhãçxhameekuẽ fxiꞌzeni, wẽesxuni, peejiina fxiꞌzeni, yahçena fxiꞌzeni, Kristoꞌs selpiipaꞌga thẽysa paꞌjaꞌtx txãatx, txãa paꞌgatey naa kakwete jwee íiçxáa nxuste çxhãçxhameekuẽ fxiꞌzeççxa yuꞌ, jwee íiçxáath Dxus yakh çxhãçxha fxiꞌzeꞌ.
Dxus yakh fxiꞌzesa Korintoteweꞌsx ewmeewáa fxiꞌzena ũstxna sũhçxa Pablo kuh yaakxni
11 Luuku naꞌwẽth peekíiçxáa weeçx weꞌwe, nawa iꞌkweꞌsx jiyukahnku txãꞌwẽ weꞌwewaꞌj kaseh. Adxaꞌ Dxus dxiꞌpte yuꞌ ãhmeekwesaçxawa, naꞌwẽ Jesus jxkaahnisa walasathaꞌw jĩꞌtx txãaweꞌsxte yuꞌ ãhmeekwesameeth. Txãa paꞌga iꞌkweꞌsxaꞌ adx juꞌgu yuuwaꞌjsa iꞌkwe yuꞌ.
12 Txãasath adxaꞌ iꞌkweꞌsx ksxavxyte selpiina ũsçxaꞌ, kĩhtewa wantãyna kĩjkĩhwa kaavxyaꞌjaꞌth kim yuhwa ewunimeesa iiméh wala zhiçxkwesatx. Txãꞌwẽ yũunisatx kaajiyuꞌjsa yuꞌ, adxaꞌ ĩsxiimée Jesus jxkaahnisatewa.
13 Dxus luuçx vxite ahsuweꞌsxte thaakwe ãhmeekwesamée iꞌkwe, nawa adxaꞌ peeygãhçxath iꞌkweꞌsxtxiꞌs puꞌçx thãasmée. Txãꞌwẽ iꞌkweꞌsxtxi kĩhwa thãaspaꞌgamée ¡mpeltunaĩwe!
14 Ãçxhaꞌ iꞌkweꞌsx tasxna paꞌjyaꞌ yuuwaꞌjaꞌs pheuꞌjçxa jiꞌpthu naa yakhaꞌ tekh us yujxaꞌ yaakiçthu. Nawa iꞌkweꞌsx yuutxiꞌs thãasmeꞌnja, txãa paꞌgatey iꞌkweꞌsx puꞌçxwaꞌjsamée iꞌkwe, wejxwa iꞌkweꞌsxtxi adx puꞌçxwaꞌjsath ney naꞌwẽ.
15 Txãa paꞌga adx jiꞌphuni yuꞌsaꞌ jxuka ũsuꞌnja, adx ĩtxĩ fxiꞌzeniyãꞌjçxa, iꞌkweꞌsx ũustxi vxitu jxthãasmeeçxa. Txãꞌwẽth adxaꞌ iꞌkweꞌsxtxi jweeíiçxáa peeygãjaꞌ, naapkaçxhaꞌ iꞌkweꞌsx yuꞌ adxaꞌs jweeíiçxáa iꞌkwe açeꞌ.
16 Iꞌkweꞌsxtxi adx kĩhwa thãassameete jiiçxawa, maaíi yuꞌ naꞌwẽ iꞌkwe weꞌweꞌ: Txãꞌwẽ ãate yuꞌ kĩhwa thãasmeeçxawa, maꞌwẽ kutxiꞌjwaꞌjaꞌswa jiik yuꞌ, txãasaçxáak kĩhwa pẽjxmée jĩꞌiꞌkwe.
17 Txãꞌjĩkahnaꞌ, naꞌwẽ Tito yakh teeçx yakhthẽꞌj iꞌkweꞌsx tasxna nyafxçxah kaath, ¿txagaçx wáꞌntka iꞌkweꞌsxtxiꞌ ĩsxiiyaꞌ yajkxçxa kaah?
18 Titoꞌs iꞌkweꞌsx tasxna nyafxçxah kajaꞌççxaꞌ, vxite yakhthẽꞌj kaapiꞌkiꞌjçxath kaah. ¿Txãn ente wáꞌ Tito iꞌkweꞌsxtxi ĩsxii? Adxaꞌ Tito yakh teeçxsa naꞌwẽçxah ew yajkxnaçxáa fxiꞌzesate ¿jiimeewáꞌkwe?
19 Kweꞌsx dxiꞌpte ewte neeyũu wẽeçxaçxáak txãꞌjĩꞌ sũjuwáꞌkwe, nawa txãꞌwẽmeeth, wejxwa Dxus dxiꞌpteth weꞌweꞌ Kristo jxkaahniçxáꞌs, kxah iꞌkweꞌsxaꞌ Dxus yakh jweeíiçxáa çxhãçxha fxiꞌzewaꞌjaꞌs uyuuneꞌkwe, adx yakhthẽꞌjweꞌsx yaakxnisa.
20 Txãꞌwẽmeꞌ, iꞌkweꞌsx tasxte paꞌjçxaꞌ, adx jxkaahnimeꞌs wáa uyuꞌnja. Saꞌ peeygãhna paꞌjapkaçxte, juunaꞌ yuuwaꞌj wáa kasejena sũhte ũukh yujaꞌ. Txãꞌwẽ adx paꞌjaꞌçteꞌ, iꞌkweꞌsxaꞌ puutx puiina, vxitee jiꞌphunitx açeyajkxna, ũusaçxana, puutx txuteena, yuwe susna, eꞌsgaçxáa açeweꞌwena, iiwejçx yajkxna, ewmée wáa fxiꞌzena ũs yuuneꞌkwe sũhtek ũukh yuh yuꞌ.
21 Saꞌ iꞌkweꞌsx tasxna yujxaꞌwath txãa enteꞌ iꞌkweꞌsx paꞌgate adxaꞌ Dxus dxiꞌpte thaamewaꞌj jiꞌphuwáꞌnja sũhçxa ũukhuꞌth. Txãꞌwẽ iꞌkweꞌsx txakwe txaçxtewa pkal kazxsate íiçxáa fxiꞌzena ũste uyna paꞌjçxaꞌ, wala nxusna ũꞌnewaꞌj jiꞌphuꞌnja sũhçxath txãꞌwẽ ũukh yaakiꞌ.
