2 Korintios 2:1-17
2 Açaꞌ txãꞌwẽ juunaꞌ weꞌweyaꞌçxáa yuꞌ uꞌjmeete ewna sũhnath yajkx.
2 Adxaꞌs iꞌkweꞌsx yuuçxáa wẽtwẽt kaayakiꞌjwaꞌjsa iꞌkwe naapkaçx txãꞌwẽ adxaꞌ iꞌkweꞌsxtxi juunaꞌ weꞌweçxa kxũusuꞌtheꞌ, adxaꞌs ¿kim wẽtwẽt kaayakiꞌjikx? sũhnath yajkx.
3 Txãasath iꞌkweꞌsxtxi kxũusuꞌjna paꞌjyaꞌmée kartaçxáa fxiꞌjçxa kaah, iꞌkweꞌsx txãꞌwẽ ãhmée yũuna ũspaꞌga adxaꞌ weçxana paꞌjapkaçxte, nxuswaꞌjçxáa jiꞌphuꞌnja sũhnath yajkx. Naasáa adx weçxana paꞌthe yuuçxáa iꞌkweꞌsxwa txãꞌwẽy weçxana ũswaꞌjaꞌs jiꞌphuneꞌkwe sũjuꞌth.
4 Iiméh wala kuh yajkxna nxusçxa ũꞌnenath kartaꞌs fxiꞌj, nawa iꞌkweꞌsxtxi juunaꞌ yuuçxa kxũusuꞌjyaꞌ sũhna ũusaçxaçxa txãꞌwẽ yũumeeth. Adxaꞌ iꞌkweꞌsx txãꞌwẽ ãhmée yũupaꞌga iiméh wala peeygãhçxaçxáath txãꞌwẽ ũꞌnena fxiꞌj.
Kazx pkal yũusaꞌs peltunãyçxa kvxiisxaꞌkhan yuꞌkxpehni
5 Nawa txãꞌwẽ ãhmée yũusaꞌ adxçxáana txãꞌwẽ kxũusuꞌjmeꞌ, iꞌkweꞌsxtxiwa jxukaysatxku txãꞌwẽ kxũusuꞌj, txãꞌwẽ kazx yũuçxa. (Txãꞌwẽ kazxku yũu jĩnaçxáath weꞌweꞌ jxuka yuꞌ ptaꞌsxyaꞌmée.)
6 Iꞌkweꞌsx puutx weꞌweçxa kastigãywaꞌjaꞌs vxitiꞌkwe txãꞌ kxtee paꞌjçxáa ewna, jwee yuꞌ thaakwe yuumée.
7 Wejxwa ãçxhaꞌ peltunãyçxa mekvxiisxaꞌjwe, txãꞌwẽmeꞌ wejx thaakwe wala nxusçxa isa jxukate vxituweꞌsxte.
8 Txãa paꞌgath iꞌkweꞌsxtxi neeweꞌweꞌ peeygãawaꞌjaꞌs kiꞌ jiꞌphukahn txãꞌwẽ ãhmée yũusaꞌs.
9 Juunaꞌ yuukahn iꞌkweꞌsxtxi fxiꞌth, nawa adx jxkaahniꞌs aan kxtey nwẽeseꞌjetxna sũhçxaçxáath jiyuyaꞌ txãꞌwẽ yũu.
10 Ãçxhaꞌ iꞌkweꞌsxaꞌ txãꞌwẽ ãhmée yũusaꞌs kĩh yũuniꞌswa mpeltunaĩwe, adxwa peltunãythu peltunãywaꞌj ũsuꞌk txãꞌsaꞌ Kristo dxiꞌpte, iꞌkweꞌsx pweꞌsx puiimée ew fxiꞌzekahn.
11 Txãꞌwẽmeꞌ, eçxthẽꞌjaꞌ wala yuh jiiaꞌ kweꞌsxtxi kaypubaꞌjçxa knaywaꞌjaꞌs txãꞌsaꞌ jiithaꞌw.
Troaste Titoꞌs uymeeçxa, Pablo wala nxus yaakxni
12 Kristo nweꞌweniꞌs ptaꞌsxyaꞌ Troas çxhabte paꞌtheꞌ, Kristoꞌs selpiina ũswaꞌj en wala yuh ewsa vxyaak.
13 Nawa kweꞌsx yakhthẽꞌj Titoꞌs uymeeçxa wala kuh yajkxthu, txãasath txajũ kasehçxa Macedonian uꞌj.
Kristo yakhaꞌ kĩhtewa jxukak ewçxáa yaꞌfxiꞌzeꞌ
14 Nawa Dxusaꞌ puꞌçxhiꞌk Kristo Jesus yakh fxiꞌzeteꞌ, kĩhtewa ewçxáa kaafxiꞌzeꞌjna, açaꞌ txajx yuweꞌs mteewa kaajiyuꞌjwaꞌjsathaꞌw, maa maawa jiyuna jxãꞌkhan.
15 Txãa paꞌgatey kweꞌsxaꞌ Dxusaꞌs jiiyãꞌjsaꞌ vxite ewte neeyũuwaꞌjsa maꞌtx yuu meeçxaꞌ vxituwaꞌjsa maꞌtx yuu nawa kaajiyuꞌjwaꞌjsathaꞌw Dxus yakh fxiꞌzeniꞌs.
16 Txãꞌwẽ yãꞌtheꞌ, ¿kim txãꞌwẽ Dxus yuweꞌs kaajiyuꞌjyaꞌ uꞌjwaꞌjsa ũstxki? Vxituwaꞌjsa yakh yuꞌ, Dxus yakh fxiꞌzeniꞌ wala yuh ewmée theguna, naapkaçxhaꞌ ewte neeyũuwaꞌjsa yakhaꞌ iiméh seenaꞌ zhiçxkwesa yuuna.
17 Maaíiaꞌ Dxus yuweꞌs yuꞌpthehçxa fxiytxi ptaꞌsxna pekũjuꞌ. Nawa kweꞌsxaꞌ txãꞌwẽ yũꞌçmeethaꞌw, saꞌ Dxus yuweꞌs vxyuu paꞌgawa ptaꞌsxna ũsmeethaꞌw. Txãꞌwẽ yũuyaꞌméeíi, kweꞌsxaꞌ Dxus kaahnisathaꞌw, Kristoꞌs selpisáa. Txãasathaꞌw ĩsxiimée ũusuh jxuka isasaçxáꞌs weꞌweꞌ Dxus dxiꞌpte.
