2 Korintios 3:1-18
3 Txãꞌwẽ weꞌwena fxiꞌjçxaꞌ, peekíiçxáa ewsath jĩnak weꞌweꞌ ¿sũjuwáꞌkwe? Meeçxaꞌ vxitewa naꞌwẽtx neeweꞌwenisa karta jxũçxa paꞌjaꞌ açaꞌ txãawa txãꞌwẽy jxũçxa paꞌjwaꞌj jiꞌphaꞌ ¿sũjuwáꞌkwe? Meeçxawa iꞌkweꞌsx neeweꞌwenisa karta kutxiꞌjwaꞌj jiꞌphaꞌ ¿sũjuwáꞌkwe?
2 Adxaꞌ txãꞌwẽ vxitesa neeweꞌwenisa karta jxũçxa paꞌjwaꞌj jiꞌphmeeth, txãa paꞌgatey adxna neeweꞌwewaꞌjsaꞌ iꞌkweꞌsxíiçxáa iꞌkwe. Txãasa adx mjĩiniꞌs maatxwa kaajiyuꞌjwaꞌjsaꞌ iꞌkweꞌsxiꞌkwe, karta naꞌwẽsa.
3 Kweꞌsxtxi neeweꞌwesaꞌ Kristoꞌ, txãasak txajx kuseju yuu fxiꞌjçxa karta ũs, açaꞌ txãa kartaꞌ iꞌkweꞌsxiꞌkwe. Nawa txãa kartaꞌ tintaju fxiꞌjni yuumeꞌ. Dxus Espiritujuk fxiꞌjni yuu, saꞌ kwet taplatewa fxiꞌjni yuumée, nasaa ũustek fxiꞌjni neeyũu.
4 Kristo puꞌçxpaꞌga, Dxusaꞌs selpiiyaꞌ ãjãth, txãasath ĩsxiimée isa weꞌweꞌ.
5 Dxusaꞌs selpiiyaꞌ ãjãnisaꞌ peekxçxáa txãꞌwẽ yaꞌãjãꞌçmeꞌ. Txãꞌsaꞌ Dxus puꞌçxtek txãꞌwẽ yaꞌãjãꞌ.
6 Dxusaꞌ naa ensu nasatx nweꞌweyaꞌ ãjãwaꞌjaꞌs pheuꞌjçxa nvxihtku txãꞌ leyaꞌs nwẽeseꞌjwaꞌj yuꞌçmeꞌ, naasáa Dxus Espirituꞌs yuuçxáa ũuste jxpaꞌgawaꞌkh yuꞌ, açaꞌ txãꞌsna ptaꞌsxyaꞌ ãjãwaꞌjaꞌsku Dxusaꞌ adxaꞌs puꞌçx. Ley fxiꞌjçxa nvxiitnisaꞌ uuwaꞌtheçxáak vxit, naapkaçxhaꞌ Dxus Espirituꞌ Dxus yakh fxiꞌzewaꞌjaꞌsku vxit.
7 3:7-8 Moises ley kwet taplate fxiꞌjnisaꞌs jxpaꞌga enteçxáa yuhwa seenaꞌ yuh zhiçxkwe eenaꞌ kweethku. Txãa paꞌga Moises dxiꞌpwa txãꞌwẽyku eenaꞌ kweethna neeyũu. Açaꞌ Israelweꞌsxaꞌ Moises dxiꞌpte thegyaꞌ ãjãmeetaꞌ, Moises dxiꞌpaꞌ seenaꞌ eenaꞌ kweethpaꞌga. Nawa tuhdtuhdçxah ũçxhana uꞌkh. Txãꞌwẽ uuwaꞌtheçxáa vxit-sa leyaꞌs jxpaꞌga enteçxáa yuhwa txãꞌwẽ seenaꞌ zhiçxkwe eenaꞌ kweethçxaꞌ, Dxus Espiritu kaapiyaꞌjni en yuꞌ wejx thaakwe zhiçxkwesaꞌ.
8 —
9 Txãꞌwẽ yuuwesa iꞌkwe jĩna ptaꞌsxsa leyaꞌs jxpaꞌga enteçxáa yuhwa seenaꞌ zhiçxkwe yuuk açaꞌ kweꞌsxtxi yuuwemée ewte nvxiitwaꞌjsaꞌs ptaꞌsxni en yuꞌ wejxku thaakwe zhiçxkwesa yuꞌ.
10 Ley jxpaꞌga enteꞌ txãꞌwẽ yuh seenaꞌ zhiçxkwesa yuuk. Nawa ãçxh naa ensu thaakwe zhiçxkwesa vxyaak txãa yakh kaajaꞌdaꞌthe yuꞌ, nyafxiiweꞌsxaꞌ seelpimeesak yuu.
11 Txaçxmeeçxáa selpiwaꞌjsa paꞌj enteçxáa yuhwa zhiçxkwe yuuçxaꞌ, bagaçxte yuhwa pçumée selpiwaꞌj en yuꞌ wejx thaakwe zhiçxkwesaꞌ.
12 Txãꞌwẽ bagaçxte yuhwa pçumée selpiwaꞌjaꞌs jiiçxath ãate ptaꞌsxna weꞌweꞌ.
13 Adxaꞌ Moises naꞌwẽ yũuçmeeth. Moisesaꞌ txaçxmeeçxáa eenaꞌ kweethnisa ũçxhaçte Israelweꞌsx uyweꞌsxte dxiꞌpaꞌs yaaphku.
14 Saꞌ Moisesaꞌ kĩh yuukahn txãꞌwẽ yaaphtewa Israelweꞌsxaꞌ jiyumeetaꞌ. Saꞌ ãçxh paꞌjwa aphni ũsna jiyukahmen, txãa paꞌgatx txãa leyaꞌs lẽeyçxawa jiyuꞌçmée. Açaꞌ txãa aphnisaꞌs Kristoꞌs piꞌkxçxa yuuçxáa phaadeyaꞌ yaꞌãjana.
15 Ãçxpkaçx aphni ũsna, Moises fxiꞌjnitx lẽeyçxawa jiyukahmen.
16 Açaꞌ maawa Jesukristo tasxte utxaate yuuçxáak txãa aphnisaꞌ phaadeni yuꞌ jiyukahn.
17 Kweꞌsxtxi jxpeꞌjsaꞌ Dxus Espirituꞌ, açaꞌ txãa yakh ũste yuꞌ, jiyuwaꞌjaꞌs weh yuhwa yaꞌjypubameena.
18 Txãa paꞌgatey kweꞌsxaꞌ dxiꞌpaꞌs yaaphni jiꞌphmeethaꞌw, txãa paꞌgak Dxus kweethniꞌ kweꞌsx dxiꞌpte speeju naꞌwẽ eenaꞌ kweethyaꞌ ãjãꞌ. Açaꞌ Dxus Espiritu puꞌçxteꞌ, jxukaysa jwee íiçxáathaꞌw Kristo maꞌwẽsateꞌ, txãa naꞌwẽy fxiꞌzena uꞌjyaꞌ ãjaꞌ, kweꞌsxtxi jxpeꞌjsa Dxus Espirituꞌ txãꞌwẽ yũuwaꞌjaꞌsku puꞌçxhiꞌ naa paꞌga.
