2 Korintios 4:1-18
4 Ãhmeekwetewa Dxusku neeweꞌweçxa nvxiht txajx tasxte selpiwaꞌjaꞌs, kxahthaꞌw çxhãçxha yajkxna fxiꞌzeꞌ.
2 Kweꞌsxaꞌ jxuka nvxihtthaꞌw paaçte ewmée yũuna ĩsxiina fxiꞌzeniꞌs. Txãasa ewmée yajkxçxa Dxus yuweꞌs yuꞌpthehna ũsmeethaꞌw. Isasaçxáanathaꞌw weꞌweꞌ, açaꞌ Dxus dxiꞌpte ĩsxiijaꞌçmeeneꞌ sũhnaçxáa miiyajkxwe jxukaysa.
3 Nawa ewte nvxiitwaꞌjsa Dxus yuweꞌs ptaꞌsxiꞌthaꞌw txãꞌsaꞌ maaíi yuꞌ açxamée wáa ew jiyutxna, nawa txãa yuꞌ vxituwaꞌjsa yakhçxáa txãꞌwẽ yũuna.
4 Txãꞌwẽ yũukahníi naa kiwete jxkaahna ũssa eçxthẽꞌjaꞌ txãaweꞌsx ũus yaakxniꞌs jxuka aphku, Jesukristo Dxus naꞌwẽysa kaapiyaꞌjni zhiçxkwesaꞌs jiyukahmen.
5 Saꞌ kweꞌsxtxi nwẽeseꞌj jxthãasçxa ptaꞌsxiꞌçmeethaꞌw, wejxwa kweꞌsxtxi nweꞌwesa Jesukristo yuuçxáꞌs nwẽeseꞌjwaꞌjaꞌ jĩnaçxáathaꞌw ptaꞌsxiꞌ, kweꞌsxaꞌ naasáa iꞌkweꞌsxtxi selpiisaçxáathaꞌw, Jesusaꞌs nwẽeseꞌjsa.
6 Dxusaꞌ nyafxiitey kĩh yuhwa meetey çxhiꞌdx walate eenaꞌsaꞌs kaakh kweethkahn txãa Dxusíiçxáak kweꞌsx ũustewa eenaꞌ kaakweetheꞌj, Jesukristoꞌ Dxusíiçxáatewa jiyukahn.
Dxusaꞌ puꞌçxhina sũhnaçxáa fxiꞌzeni
7 Dxusaꞌ kweꞌsxtxiꞌs neeweꞌwek Kristo kaapiyaꞌjni txakwe seenaꞌ zhiçxkwesaꞌs. Nawa kweꞌsxaꞌ txãꞌwẽ seenaꞌ zhiçxkwesaꞌs weꞌweyaꞌ yuꞌ ãjawaꞌjmeesathaꞌw, açaꞌ txãꞌwẽ kweꞌsx yuꞌ ãjameete íiçxáak Dxusçxaçxáa puꞌçxhiꞌ.
8 Txãasaíiçxáak thẽyte fxiꞌzewaꞌj iiméh wala paꞌthewa, txajũwa kasejxaꞌ ãjawaꞌjaꞌs puꞌçxhiꞌ. Açaꞌ nxuswaꞌj en paꞌthewa, Dxusaꞌ puꞌçxhina sũhwaꞌj yuuçxáꞌsthaꞌw jiꞌphuꞌ.
9 Naa kiweteweꞌsx yuꞌ ahçetewa, Dxus yuꞌ açeni fxiꞌzeꞌçmeethaꞌw. Pkxuuni fxiꞌzeçxawa, jxukate yuꞌ vxituni yuꞌçmeethaꞌw.
10 Jesuswa maꞌwẽga uu txãa naꞌwẽy uusáa naꞌwẽ yuuwaꞌj jiꞌpthaꞌw, ĩtxĩ yuusáa Kristo puꞌçxniꞌs jxpaꞌgaçxa txãa naꞌwẽ yuuçxáa fxiꞌzeyaꞌ.
11 Nawa kweꞌsxaꞌ naa kiwete nee fxiꞌzeꞌççxaꞌ, bagaçxtewa ikh wẽeniçxáathaꞌw fxiꞌzeꞌ, Jesus kaapiyaꞌjniꞌs ptaꞌsxpaꞌga. Txãa paꞌgak ĩtxĩ yuusáa Kristo puꞌçxniꞌ vxyaana nes yuꞌ.
12 Txãasathaꞌw kweꞌsxaꞌ ikh wẽeniçxáꞌs jxpaꞌgana fxiꞌzeꞌ, naapkaçxhaꞌ iꞌkweꞌsxaꞌ Dxus yakh fxiꞌzewaꞌjaꞌs iꞌkwe jxpaꞌgana fxiꞌzeꞌ.
13 Dxus libruteꞌ naꞌjĩnak weꞌweꞌ: Dxus puꞌçxwaꞌjaꞌs jiith yuꞌ, txãasath txãꞌwẽ weꞌweꞌ jĩꞌk. Açaꞌ kweꞌsxwa txãꞌwẽy Dxus puꞌçxwaꞌjaꞌs ew jiithaꞌw, txãasathaꞌw ptaꞌsxiꞌ.
14 Saꞌ Dxusaꞌ kweꞌsxtxi naꞌwẽ yũuwaꞌjaꞌswa jiithaꞌw: Jesus uutewa kiꞌ ĩtxĩ vxitku, saꞌ kweꞌsxtxiwa txãꞌwẽy kiꞌ ĩtxĩ vxituna. Txãꞌwẽ yũuçxa txajx ũsnite peꞌjna uꞌjwena petx iꞌkweꞌsx yãꞌjçxa Jesus yakh fxiꞌzepaꞌga.
15 Kweꞌsxaꞌ pkxuuni nxustethaꞌw fxiꞌzeꞌ, nawa iꞌkweꞌsx ewte fxiꞌzewaꞌjaꞌs uykahnthaꞌw txãꞌwẽ yuꞌ, kxah maazkuẽesawa Dxus peeygãaniꞌs jxpaꞌgaçxaꞌ, kxaazkuẽesay Dxusaꞌs weçxana tuutheꞌjetxna.
16 Txãasathaꞌw kweꞌsxaꞌ bagaçxtewa ũukhmée Dxusçxáꞌs çxhãçxha yaakiꞌ. Makwe kweꞌsx kakwete çxhãçxhasa yuꞌ pçuuna uꞌjweçtewa, Dxus yakh weçxana fxiꞌzewaꞌj yuꞌ jweeíiçxáak een isa çxhãçxha yaꞌfxiꞌzeꞌ.
17 Txãa paꞌgatey naa kiwete nxuste fxiꞌzenisaꞌ dudteweꞌsxçxáa, txaçxmey skhẽwwaꞌjsaꞌ. Açaꞌ txãa skhẽwniijũꞌ bagaçxte yuhwa skhẽwwaꞌjsamée iiméh ewsaꞌsku cielute yaꞌjiꞌphuꞌ.
18 Naa kiweteweꞌsxaꞌs yaakxwaꞌj jiꞌphmeethaꞌw, cieluteweꞌsxçxáꞌs yaakxwaꞌj jiꞌpthaꞌw. Txãa paꞌgatey naa kiweteweꞌsxaꞌ txaçxmey skhẽwwaꞌjsataꞌ, nawa cieluteweꞌsxaꞌ bagaçxte yuhwa skhẽwwaꞌjsa meetaꞌ.
