2 Korintios 5:1-21
5 Txajíiçxáa kweꞌsxaꞌ ew jiithaꞌw naa kiwete ĩtxĩ fxiꞌzenisa kakwe pçuutewa, vxite kakwe bagaçxte yuhwa pçuwaꞌjsamée thaakwe ewsa kweꞌsx jĩi pheuꞌjni jiꞌphaꞌ Dxusaꞌ cielute. Txãꞌ pçuwaꞌjsa naa kiweteweꞌsx naꞌwẽsameꞌ.
2 Txahthaꞌw naa kakwete nxusna nee ĩtxĩ fxiꞌzeççxaꞌ, dud cielute ũswaꞌj kakweꞌs jxpaꞌgawaçaꞌ sũhna yaakiꞌ.
3 Txãjũ yuuçxaꞌ, kakwe jiꞌphmée yuꞌ ũsmée, kakwe jiꞌph neeyũꞌnjaꞌw.
4 Naa kakwete nee ĩtxĩ fxiꞌzeççxaꞌ, nxus yajkxnathaꞌw fxiꞌzeꞌ. Nawa naa kakwe ĩisxsaꞌs ahçeçxa dud uuwaçaꞌ sũhçxa txãꞌwẽ nxus yaakiꞌçmeethaꞌw, naasáa naa kakweꞌs dud phuꞌseꞌjni yuuteꞌ, kweꞌsx kakwe pçuwaꞌjsaçxawa kxtee uꞌse yuuna paꞌjana sũhçxathaꞌw txãꞌwẽ yũuwaꞌjaꞌs dud jxthãasuꞌ.
5 Txãꞌwẽ yũuwaꞌjaꞌs Dxusku pheuꞌj, txãasak txãꞌwẽ yũuwaꞌjaꞌs jxpaꞌgawaꞌjsa yujiꞌkwe jĩçxa nyafxte txajx Espirituꞌs khuẽꞌy ũs.
6 Pejka txãꞌwẽ yũuwaꞌjsa yuhthaꞌw, nawa naa kakwe yakh nee ĩtxĩ ũsíi yuꞌ, cielute kweꞌsxtxi jxpeꞌjsa Jesukristo ũsna kxtee ãçxhíi yuꞌ ũsyaꞌ ãjãꞌçmeethaꞌw.
7 Nawa pejka kxtee paꞌjwaꞌjsa yuhthaꞌw sũhnaçxáathaꞌw fxiꞌzeꞌ.
8 Txãꞌwẽ kweꞌsxtxi jxpeꞌjsa tasxte paꞌjwaꞌjaꞌs jiithaꞌw, txãasathaꞌw naa kakwete ĩtxĩ fxiꞌzeniꞌs nvxihtçxa txãa yakh ũsyaꞌ uꞌj wẽjeꞌ.
9 Txãasa naa kakwe yakh nee ũsíi mthaꞌw yuu, khĩmeeçxaꞌ naa kakweꞌs jiꞌphmée yãꞌjmthaꞌw yuu, nawa Kristo dxiꞌpte ew fxiꞌzewaꞌjaꞌs yuuçxáathaꞌw paꞌpçxuꞌ.
10 Txãꞌwẽ jxpaꞌyakxmeeteꞌ, Kristo tasxte jxukaysa kuutxaꞌjnisa yuꞌnjaꞌw. Naa kiwete ew mthaꞌw selpiisáa yuu, meeçxaꞌ ewmée mthaꞌw selpiisáa yuu nawa teeçxsa naꞌwẽçxah peekx selpiiniꞌs jxpaꞌgawaꞌjsathaꞌw.
Dxus yakh yuuwemée neeyũuniꞌs ptaꞌsxni
11 Txãꞌwẽ Kristo tasxte utxaaçxa maꞌwẽ selpiisaçxawa txãꞌsaꞌ paswaꞌj jiꞌpthaꞌw, txãasath Dxusna yuuçxáa selpiꞌ iꞌkweꞌsx dxiꞌpte. Adx maꞌwẽ selpiniꞌswa Dxusaꞌ jiiyãꞌjaꞌ, açaꞌ iꞌkweꞌsxwa adx kĩh yũusatewa jiyuwaçaꞌ ewna sũjuꞌth.
12 Adxaꞌ thaakwe ew selpisaath jĩna iiwejçx weꞌwena ũsmeeth, naasáa adx ew selpiniꞌs iꞌkweꞌsx yaakxkahnçxáath txãꞌjĩꞌ. Txãꞌwẽ adx ew selpiniꞌs iꞌkweꞌsxaꞌ jii ũsçxa íiçxáa, adxna ewmée nuyweꞌwesaweꞌsxtxiꞌ pasyaꞌ ãjãneꞌkwe.
13 Adxaꞌ luuku naꞌwẽ wáꞌntka weꞌweꞌ, nawa txãꞌ Dxus jĩꞌ. Açaꞌ luuku naꞌwẽmée weꞌweçxa yuꞌ, iꞌkweꞌsxtxi neꞌtka weꞌweꞌ jiyukahn.
14 Kristoꞌ jxukaysa paꞌgate peeygãhçxa uuk, açaꞌ txãa peeygãaniꞌs yajkxteꞌ, txãꞌsna selpiwaꞌj yuuçxáak kasejeꞌ, naꞌwẽ yajkxna:
15 Kristoꞌ jxukaysa paꞌgate uupaꞌga, maawa txãa yakh ũssaꞌ jxukaysa uusáa naꞌwẽsathaꞌw yuu sũhna. Açaꞌ txãa yakh fxiꞌzesaweꞌsxaꞌ maꞌwẽwa fxiꞌzemée, wejxwa naꞌwẽ txãaweꞌsx paꞌgate uuçxa kiꞌ ĩtxĩ yuuk txãꞌsçxáana selpiina fxiꞌzewaꞌjsataꞌ.
16 Txãa paꞌga ãçxhũyãꞌjaꞌ vxite maꞌwẽsatewa txãatx thegna ũusteçxáa yuhwa yaakxwaꞌj jiꞌphmeethaꞌw. Adxaꞌ nyafxíi yuꞌ wala neꞌtka jxpuba, txãasaíith Kristoꞌs naa kiwete kweꞌsx naꞌwẽysaíiçxáꞌ sũhna yaakxni jiꞌphuꞌ. Nawa ãçxhaꞌ txãꞌwẽ yaakxniꞌs yuꞌpthehwaꞌjaꞌ,
17 txãa paꞌgatey maawa Kristo tasxte utxasáꞌ jxuka yuꞌpthehnik yuꞌ. Nyafxíi yajkxna fxiꞌzeniꞌs nvxihtçxa, uꞌsesaçxaçxáak yaꞌjypaꞌgaꞌ.
18 Txãꞌwẽ uꞌse yuuwaꞌjaꞌs Dxusçxaçxáak vxituꞌ, txãasak txãa yakh ew fxiꞌzewaꞌjaꞌswa vxituꞌ, kweꞌsx paꞌgate Kristoꞌs uuwaꞌj vxitçxa. Dxusaꞌ txãꞌwẽ yũuçxak adxaꞌs neeweꞌweçxa nvxiht, txãa yakh ew fxiꞌzewaꞌjaꞌs jxukaysatx ptaꞌsxkahn.
19 Ew jiyute yuꞌ, Dxusaꞌ naa kiwete nasaa pkaltxi jxuka peltunãyçxa txãa yakh ew fxiꞌzewaꞌjaꞌs pheuꞌjyaꞌk txãꞌwẽ Kristoꞌs uuwaꞌj vxitna ũsuꞌ. Dxus txãꞌwẽ yũuniꞌs ptaꞌsxkahnku adxaꞌs neeweꞌweçxa nvxiht.
20 Txãa paꞌga adxaꞌ Kristo nweꞌweniꞌs ptaꞌsxyaꞌ Dxus kaahni yuhth. Txãasath Dxus yuu weꞌweꞌç naꞌwẽ adxaꞌ iꞌkweꞌsxtxi jxkaajaꞌ naꞌjĩna: Dxus tasxte mutxaawe, txãa yakh fxiꞌzeyaꞌ.
21 Kristoꞌ kĩh pkal yuhwa jiꞌphuꞌçmeꞌ, nawa kweꞌsx ewmeesapaꞌgaçxáa txãak Dxus kastigoꞌs jxpaꞌga. Açaꞌ kweꞌsxaꞌ Kristoꞌs jxpaꞌgaçxaꞌ, ewmeesaçxawa Dxus dxiꞌpte yuuwemeesa yuukahnku txãꞌwẽ yũu.
