2 Korintios 6:1-18
6 Txãasa adxaꞌ Dxusna selpisaath. Txãa paꞌgath iꞌkweꞌsxtxi yuꞌkxpejeꞌ: Dxus peeygãaniꞌs jiyuyãꞌjçxaꞌ, waꞌlmée jxpaꞌgakahn.
2 Dxus peeygãawaꞌj enaꞌs naꞌwẽk ptaꞌsxiꞌ Dxus librute:
Juꞌgu yuuwaꞌj en ãhteꞌ, wẽseꞌth,
Saꞌ puꞌçxthu ewte neeyũukahn jĩꞌk.
Txãa paꞌga ãçxhaꞌ txãꞌwẽ yũuwaꞌj en ãjk, açaꞌ naa ensuꞌ ewte neeyũuwaꞌj ente ũsthaꞌw.
3 Adx mjĩiniꞌs ewmée nuyweꞌwekahmen, kim yuhtxwa ewmée yũuna ũsmeeth.
4 Makwe wala pxthaa yuuna, wantãyna, kĩhtewa pejiina, thẽyte fxiꞌzena ũsçxawa, Dxusna selpiinisaçxáꞌsthu kaavxyaꞌjaꞌjna fxiꞌzeꞌ.
5 Adxaꞌs pãpaçxa karcelte txaahnisath yuu. Wẽesxuna pkxuuni wala thẽyte fxiꞌzeꞌth. Çxhãçxha mjĩiweete deewaꞌj en yuhwa uymée, wẽenath fxiꞌzeꞌ.
6 Nawa Dxus dxiꞌpte naꞌwẽ ew yũuniçxáꞌsthu kaavxyaꞌjaꞌjna fxiꞌzeꞌ: açeweꞌweçtewa kaꞌtu yuꞌ ew yũuna, Dxus Espiritu adx yakh fxiꞌzeniꞌs kaajiyuꞌjna, ũusuh jxuka peeygãaniꞌs kaavxyaꞌjaꞌjna,
7 isasaçxáꞌs ptaꞌsxna, Dxus puꞌçxniꞌs kaavxyaꞌjaꞌjna. Saꞌ açeweꞌwesatx paswaꞌj maꞌk yuu meeçxaꞌ pkxuuçte paswaꞌj maꞌk yuu nawa kĩhtewa ewçxáa paswaꞌjaꞌsçxáath yajkxna fxiꞌzeꞌ.
8 Saꞌ kiꞌkinteꞌ wedxnith fxiꞌzeꞌ, nawa maa enteyaꞌ açenith fxiꞌzeꞌ. Vxite ensuy yuꞌ ew weꞌwena kiꞌ ewmée weꞌwenith fxiꞌzeꞌ. Kiꞌkinteyaꞌ ĩsxiisaꞌ jĩna nuyweꞌweni, nawa maa enteyaꞌ isasaꞌs ptaꞌsxsaꞌ jĩna weꞌwenith fxiꞌzeꞌ.
9 Maa enteyaꞌ nasa jiyunimeesa thastxi adxaꞌs weꞌweꞌ, nawa maa entey yuꞌ, adxaꞌs wala namiku naꞌwẽtx ew weꞌweꞌ. Maa enteyaꞌ uuwaꞌtheçxáa yãꞌth fxiꞌzeꞌ, nawa uꞌç yuꞌ meeth. Wala pkxuuni yuuçxawa, ikhni yuꞌ yuꞌçmeeth.
10 Makwe wala kxũusuꞌjni ũsçxawa, weçxanath fxiꞌzeꞌ. Naa kiwete kĩhwa jiꞌphmeesaçxawa, maazkuẽesatxwa jiꞌphsath vxituꞌ Dxus dxiꞌpte. Makwe jiꞌphmeesaçxawa, kĩh yuhwa peejii yuꞌ meeth fxiꞌzeꞌ.
11 Korintote yakhthẽꞌjweꞌsxtxi ĩsxiiçxa txãꞌjĩꞌçmeeth, adx ũuste ũusutheniꞌs jxuka ãateth weꞌweꞌ.
12 Iꞌkweꞌsx yuꞌ adxaꞌs açeyaakiꞌneꞌkwe, nawa adxaꞌ kaꞌtu yuꞌ iꞌkweꞌsxtxiꞌ açeyaakiꞌçmeeth.
13 Neyaꞌ luuçxtxiꞌs maꞌwẽga peeygãhna weꞌweꞌ, adxwa iꞌkweꞌsxtxiꞌ txãꞌwẽythu peeygãhna weꞌweꞌ. Iꞌkweꞌsx ũus yaakxniꞌs paaçteçxáa jiꞌphumée ãate weꞌwekahnthu adx ũus yaakxniꞌs ãate weꞌweꞌ.
Dxus ĩtxisa ũswaꞌjçxáathaꞌw
14 Dxusaꞌs jiimeesaweꞌsx yakhaꞌ ptamuwaꞌjmeꞌ. Txãꞌwẽmeꞌ kxteeçxah txãaweꞌsx naꞌwẽy yũuna fxiꞌzeyaꞌ ãjameeneꞌkwe. Ewsaꞌ ewmeesa yakh fxiꞌzewaꞌjsameꞌ. Eenaꞌsaꞌ çxhiꞌdxsa yakh kxteeçxah ũsyaꞌ ewuꞌçmeetaꞌ.
15 Kristoꞌ eçxthẽꞌj yakhaꞌ puutx utxaꞌçmeetaꞌ. Dxusaꞌs jiisaꞌ Dxusaꞌs jiimeesa fxiꞌzenite fxiꞌzewaꞌjmeꞌ.
16 Dxus ũsniteꞌ Dxus ĩtxĩmeesaꞌ ũswaꞌj jiꞌphmeetaꞌ. Iꞌkweꞌsxaꞌ Dxus ĩtxĩsa ũswaꞌjçxáa iꞌkwe. Txajíik Dxusaꞌ naꞌjĩna weꞌwe:
Adxaꞌ txãaweꞌsx Dxus yuꞌnja,
Txãaweꞌsx ũuste fxiꞌzewaꞌjsa.
Açaꞌ txãaweꞌsxaꞌ adx luuçx yuutxna jĩꞌk.
17 Saꞌ vxite ajkhẽwa naꞌjĩnak weꞌwe:
Ewmeesaweꞌsx ksxavxyu kasehçxa utxaanuwe,
Saꞌ ewmeesaꞌs jxaꞌdxnuwe.
18 Txãꞌwẽ yũuteꞌ, iꞌkweꞌsxtxi adx jxpaꞌgaçxa
Ney naꞌwẽ yuꞌnja.
Açaꞌ iꞌkweꞌsxaꞌ adx luuçx yuuneꞌkwe jĩꞌk kĩhtewa jxuka ãjãsa Dxusaꞌ.
