2 Korintios 7:1-16
7 Dxusaꞌ txãꞌwẽ ew fxiꞌzewaꞌjaꞌsku jxkaajaꞌ. Txãa paꞌga, yakhthẽꞌjweꞌsx, wala jxpaꞌyakx fxiꞌzewaꞌj jiꞌpthaꞌw, kweꞌsx kakwe maꞌk yuu meeçxaꞌ kweꞌsx ũus maꞌk yuu nawa suwwaꞌjsa yuꞌsaꞌ kaꞌgaꞌjwaꞌj jiꞌphmeethaꞌw. Dxusçxáana yajkxna jxpaꞌyakx fxiꞌzewaꞌj jiꞌpthaꞌw.
Korintoteweꞌsx ewmée yũunijũ sxawedni
2 Adxaꞌs açeyaakxnuwe. Adxaꞌ kim yuhtxwa ĩsxiina kaypubaꞌjna ewmée yũuna ũsmeeth.
3 Açaꞌ iꞌkweꞌsxçxáa yuuwesa iꞌkwe jĩçxa txãꞌjĩꞌçmeeth. Txãꞌwẽ yajkxmeeçxaíith adx peeygãanisa iꞌkwe, txãasa adx yakh jaꞌdaçxah fxiꞌzena txutemey uuwaꞌjsathaꞌw jĩnath weꞌwe.
4 Makwe seenaꞌ nxuswaꞌj ente ũsçxawa, iꞌkweꞌsxtxi yajkxçxa weçxanaçxáath fxiꞌzeꞌ, weh yuhwa ewmée yuꞌ yajkxmée.
5 Macedonia kiwete paꞌjíi leꞌçxkuẽçxáa yuhwa jxkaasewaꞌj jiꞌphumeeth. Kĩhwa jxukak thẽysaçxaçxáa vxyaa, adx pekũhnisu yuꞌ mteewa jxuka. Açesaweꞌsx yakh pdxiꞌpuwaꞌjwa jiꞌphuth, saꞌ ũustewa ũukh yaakxwaꞌj kasejk.
6 Nawa Tito paꞌphaꞌga Dxusaꞌ adxaꞌs kvxiisxaꞌkh, nxusna ũstewa.
7 Nawa Tito yakh puutx uypaꞌgaçxáa adxaꞌs txãꞌwẽ weçxa en paꞌjmeꞌ. Titoꞌ adx tasxte seenaꞌ wala weçxana paꞌkh, iꞌkweꞌsx ew yũuyaꞌ yaakxpaꞌga. Saꞌ ptaꞌsxku txakwe wala ãhmée yũuçxawa idx yakh weçxayaꞌ puutx uy wẽjeꞌtx jĩnisak wejx wala kvxiisxaꞌj.
8 ¿Kĩjxaꞌkiꞌth iꞌkweꞌsxtxi juunaꞌ weꞌwena txãꞌwẽ karta fxiꞌj? sũhna wala kuh yajkxthu txãa ensu yuꞌ. Nawa ãçxhaꞌ txãꞌwẽ yaakiꞌçmeeth. Nyafxíi yuꞌ txãꞌwẽ yaakxkahníi txãa kartaꞌ iꞌkweꞌsxtxi wala kxũusuꞌkh maz en yuꞌ. Txagaçxhíiçxáa juunaꞌ weꞌweniꞌs kuh yajkxçxaꞌ, ãçxhaꞌ adxaꞌ weçxaꞌth.
9 Nawa iꞌkweꞌsxtxi kxũusuꞌjçxa weeçx yajkxna txãꞌwẽ weçxaçmeeth, wejxwa txãa juunaꞌ weꞌwenisaꞌ iꞌkweꞌsxtxi wala selpiik, ewmée yũuniijũ kaasxweduꞌjna, txãa paꞌgaçxáath weçxáꞌ. Açaꞌ iꞌkweꞌsxaꞌ txãa nxus en paꞌphaꞌga ũusçxa yajkxmée Dxus dxiꞌpte ew fxiꞌzewaꞌjçxáꞌs iꞌkwe kxtey yuu. Txãa paꞌgath adxaꞌ kimnawa açesameeth sũjuꞌ.
10 Txãa paꞌgatey ãhmée neꞌtkaꞌw yuu sũhna waꞌlmée Dxus yakh ew fxiꞌzewaꞌjaꞌs pakweteꞌ, ewmée yũuniꞌs nvxihtçxa ewte neeyũuwaꞌjaꞌsku yaꞌjypaꞌgaꞌ. Txãa paꞌga nxuswaꞌj entxiꞌ açewaꞌjmeꞌ. Nawa ãhmée neꞌtkaꞌw yuu sũhwaꞌjaꞌs yajkxmeeteꞌ, vxituwaꞌjçxáak kasejeꞌ.
11 Iꞌkweꞌsxaꞌ Dxusçxáana yajkxna neꞌkwe txãa nxusnisaꞌs ahçemée jxpaꞌga. Açaꞌ txãꞌwẽ yũupaꞌga maꞌwẽga ew fxiꞌzewaꞌj kaseh txãꞌsaꞌ miiyajkxwe naataꞌ: Ãhmée neꞌtkaꞌw yuu sũhna ũukhçxa yuweꞌs pheuꞌjyaꞌ yajkx iꞌkwe, txãa ewmée yũusaꞌs kastigãywaꞌjaꞌs puutx weꞌwena. Txãꞌwẽ yũuçxaꞌ, adx yakh puutx uyyaꞌ yajkx iꞌkwe. Txãasa iꞌkwe yuuwemeesa yuu.
12 Adxaꞌ txãa kartaꞌs fxiꞌjçxaꞌ, txãa ewmée yũusaꞌs açeyajkxna txãꞌwẽ yũumeeth, saꞌ ewmée yũute nxussaꞌswa yajkxna txãꞌwẽ fxiꞌjmeeth, naasáa iꞌkweꞌsxtxiꞌ wala yuh yaakiꞌth Dxus dxiꞌpte txãꞌsaꞌ iꞌkweꞌsx jiyukahnçxáath txãꞌwẽ fxiꞌj.
13 Txãasath iꞌkweꞌsx kxtey yuuteꞌ wala weçxawaꞌjaꞌs jxpaꞌga.
Nawa naꞌwẽ weçxawaꞌjaꞌs jiꞌphuth txãajũ jweeíiçxáath wala weçxawaꞌj jiꞌphu iꞌkweꞌsxaꞌ Titoꞌs wala ewçxáa jxpaꞌgaçxa ewçxáa neꞌkwe jxpeꞌjna ũsuꞌ açaꞌ weçxanak sxawed naa paꞌga.
14 Adxaꞌ Titoꞌs kajaççxaꞌ iꞌkweꞌsxtxi weꞌwena: Wala ewsataꞌ jĩth txãꞌ ĩsxiini kasehmeꞌ. Iꞌkweꞌsxaꞌ adx yaakxniꞌs kxtey iꞌkwe yuu, Titoꞌs ew jxpaꞌgana. Txãasa adx weꞌweniꞌ bagaçxtewa isasaçxaçxáataꞌ.
15 Iꞌkweꞌsxaꞌ maꞌwẽneꞌkwe ewkuẽçxáa jxpaꞌgaçxa txajx weꞌweniꞌs kxtey nwẽeseꞌj txãꞌwẽ ew yũuniꞌs yajkxçxak Titoꞌ jweeíiçxáa iꞌkweꞌsxtxiꞌs wala weçxáꞌ.
16 Iꞌkweꞌsxtxiꞌs kĩhte yuhwa ewmée yaakxwaꞌj jiꞌphmeeth, txãasath weçxáꞌ.
