2 Korintios 8:1-24
8 Ãçxhaꞌ yakhthẽꞌjweꞌsxtxi ptaꞌsxiꞌth Dxus luuçx Macedonia kiwesuweꞌsxaꞌ puꞌçxwaꞌjaꞌs ãate kaavxyaꞌjaꞌjtx Dxus kaayakiꞌthe.
2 Txãaweꞌsxtxiꞌ txakwe wala thẽyte fxiꞌzewaꞌj paꞌjçxawa, Dxus yakh jweeíiçxáa çxhãçxha fxiꞌzekahnku txãꞌwẽ yũu, txãa paꞌga wala weçxana fxiꞌzeꞌtx. Txãasatx wala jiꞌphmeesaçxawa ũçxhiꞌdxmée pees.
3 Txãaweꞌsx jiꞌphuni yuꞌsaꞌ waꞌlméetx pees, saꞌ maꞌwẽçxáawa yũuna pakweçxatx txãꞌwẽ yũu. Txãꞌwẽ yũuniꞌs adxaꞌ ew jiith.
4 Txãaweꞌsx weꞌweçxaꞌ: Kweꞌsxaꞌ yakhthẽꞌjweꞌsxtxi puꞌçxyaꞌ vxyuu pkhakh wẽjeꞌthaꞌw açaꞌ idxaꞌ ¿maꞌjĩkiꞌg? jĩnatx weꞌwe.
5 Açaꞌ adxaꞌ kxtee paꞌj yuꞌ yuumeetxna sũjuꞌneꞌthka. Nawa nyafxteꞌ txãaweꞌsx kakwe yuunatx Dxus kusete dukh Dxus jxthãasniçxáꞌs kxtey yuuyaꞌ. Txãꞌwẽ yũuçxatx kweꞌsx maꞌwẽ jxkaathewa kxtey yuuyaꞌ yajkx. Txãꞌwẽ yũuniꞌsthu ptaꞌsxiꞌ.
6 Açaꞌ Tito nyafxíi iꞌkweꞌsx yakh ũsçxaꞌ, vxyuu pkhakhyaꞌ takhku txãꞌsaꞌ pkhakhna kãajaꞌkhan Titoꞌs neeweꞌweçthu kiꞌ yujaꞌ naa paꞌga.
7 Iꞌkweꞌsxaꞌ kĩhtewa jxuka ãjãsa iꞌkwe Dxusçxáana yajkxna, waꞌlmée kaapiyaꞌjna, wala jiisa iꞌkwe, dud paꞌpçxuwaꞌjaꞌswa nwẽeseꞌjna adxnawa ahçemée peeygãasa iꞌkwe. Txãasa puꞌçxwaꞌj vxyuu pkhakhwaꞌjaꞌswa txãꞌwẽy myũuwe.
8 Juunaꞌ jxkaahna txãꞌjĩꞌçmeeth, naasáa vxitesa paꞌpçxuniꞌs jiyuçxaꞌ, iꞌkweꞌsxwa isa peeygãjaꞌççxaꞌ, txãꞌwẽy puꞌçxhiwáꞌkwe sũhçxaçxáath txãꞌjĩꞌ.
9 Iꞌkweꞌsxaꞌ peekx jii iꞌkwe kweꞌsxtxi jxpeꞌjsa Jesukristo peeygãaniꞌs. Txãꞌ jiꞌphsak yuꞌ, nawa kweꞌsxtxi wala peeygãhçxa jiꞌphmeesak yuu, txajx jiꞌphuniꞌs kweꞌsxtxi ũsyaꞌ.
10 Iꞌkweꞌsxaꞌ jũꞌna anxutey puꞌçxyaꞌ takhiꞌkwe, nawa jxkaatheçxáa txãꞌwẽ yũumée, peekx yuu iꞌkwe txãꞌwẽ puꞌçxyaꞌ yajkx, açaꞌ txãꞌwẽ yũunisaꞌ ewsa yujaꞌ jĩnath yuꞌkxpejeꞌ adxaꞌ.
11 Nyafxíiwa maꞌwẽkwe weçxana peesna ũsuꞌ iꞌkweꞌsx jiꞌphuni yuꞌsaꞌ, ãçxwa txãꞌwẽyçxáa myũuwe kãajaꞌphkaçx.
12 Txãa paꞌgatey maꞌwẽkuẽçxáa jiꞌphçxawa, waꞌlmée weçxana peesniꞌs Dxusaꞌ jxpaꞌgaꞌk. Dxusaꞌ jiiaꞌ, jiꞌphmeetewa.
13 Txãꞌwẽ iꞌkweꞌsxaꞌ vxitesatx puꞌçxteꞌ, txãaweꞌsxçxáa peejimée fxiꞌzeteꞌ, iꞌkweꞌsx yuꞌ jiꞌphmée thẽyte fxiꞌzekahn txãꞌjĩꞌçmeeth.
14 Puutx yaꞌpuꞌçxna jaꞌdaçxah peejimée fxiꞌzekahnthu txãꞌjĩꞌ. Ãçxh naa ensuy yuꞌ iꞌkweꞌsxaꞌ kĩhwa jiꞌphiꞌkwe vxite peejiina fxiꞌzesatx puꞌçxwaꞌj. Nawa vxite ensuꞌ iꞌkweꞌsx jiꞌphmée peejiina fxiꞌzeçpkaçxhaꞌ, txãaweꞌsx iꞌkweꞌsx peejiniꞌs puꞌçxhitxna. Txãꞌwẽ yũuna puutx peejimée yaꞌfxiꞌzena.
15 Txãꞌwẽ puutx puꞌçxwaꞌjaꞌs ptaꞌsxçxak Dxus librute naꞌjĩꞌ: Wala pkhakhtewa kijxaameꞌ, saꞌ leꞌçxkuẽe pkhakhsanawa peejimeꞌ jĩꞌk.
Tito yakh vxite kaapiꞌkiꞌjçxa kaahni
16 Dxusaꞌ Titoꞌs kaayakiꞌjneꞌ adx naꞌwẽy iꞌkweꞌsxtxiꞌs peeygãawaꞌjaꞌs.
17 Txãa paꞌga ãçxhaꞌ iꞌkweꞌsxtxiꞌs thegyaꞌ yujaꞌ kimwa jxkaahmeete, txajx ũuste peeygãawaꞌjaꞌs yajkxçxa, saꞌ adx neeweꞌweniꞌs kxtey yuuyaꞌ yujaꞌ.
18 Titoꞌs piꞌkxna teeçx yakhthẽꞌj kajaçthu. Txãꞌsaꞌ Dxus luuçx msuuweꞌsxwa wala neeweꞌweꞌtx Dxus yuweꞌs wala ptaꞌsx puꞌçxsaꞌ jĩna.
19 Saꞌ txãꞌwẽçxáa neeweꞌwemée, txãa yakhthẽꞌjaꞌs txhitxhtxi. Naꞌwẽ Dxus dxiꞌpte kselpiꞌjiꞌjwaꞌj vxyuu pkhakhna ũsthaꞌw txãꞌsna adx dukhyaꞌ Jerusalenna uꞌjweçte piꞌkxna uꞌjwaꞌjsa jĩçxatx txhitxh.
20 Adxaꞌs ewmée nuyweꞌweweꞌsxte, txãa yakhthẽꞌjaꞌ adx yakh jaꞌda yuuwaꞌjsaꞌ, naꞌwẽ peeswaꞌj pkhakhna ũstaꞌ txãꞌsna jxũna uꞌjweçte.
21 Kĩhtewa jxuka ewçxáa yũuyaꞌ ũsthu, Dxus dxiꞌpteçxáamée, nasaa dxiꞌptewa txãꞌwẽy.
22 Titoweꞌsx txãa eꞌzsaçxáamée, vxite yakhthẽꞌjaꞌswa kajaçthu, txãꞌ ew yũuwaꞌj yuꞌsaꞌ kĩhtewa jxukak paꞌpçxuna fxiꞌzeꞌ, saꞌ ãçxhaꞌ iꞌkweꞌsx yuutxiꞌsaꞌ wejxku wala thaakwe weçxana yaakiꞌ.
23 Tito kxtee paꞌtheꞌ, iꞌkweꞌsxtxi pẽyiwáatxna ¿Titoꞌ kimna? jĩna, açaꞌ Pablo yakh mjĩi puꞌçxsaꞌ ayte kweꞌsxtxi selpisáa jĩneꞌkwe. Meeçxawa vxite yakhthẽꞌjweꞌsxtxi wáa ¿kimtxna? jĩna pẽyitxna açaꞌ Dxus luuçx neeweꞌweçxa kaahnisataꞌ, Kristoꞌs selpisáa jĩneꞌkwe.
24 Ãçxhaꞌ iꞌkweꞌsx peeygãaniꞌs ãate mkaavxyaꞌjaꞌjwe txãa yakhthẽꞌjweꞌsxtxi ew jxpaꞌgana, kxah Dxus luuçx vxite ahsu pkhaakhesaweꞌsxwa iꞌkweꞌsx peeygãaniꞌs jiyutxna, açaꞌ iꞌkweꞌsxtxi adx weꞌweçxaꞌ: Ewsataꞌ jĩꞌth txãawa kxtey kasejena.
