2 Korintios 9:1-15
9 Dxus yakh fxiꞌzesa yakhthẽꞌjweꞌsxtxi puꞌçxyaꞌ vxyuu pkhakhwaꞌjaꞌs iꞌkweꞌsxtxi kaayakiꞌjna fxiꞌjwaꞌj peejxmeena sũjuꞌth,
2 txãa paꞌgatey iꞌkweꞌsxaꞌ kĩhtewa waꞌlsameetewa jiith. Txãasath Macedonia kiwesuweꞌsxtxiꞌsaꞌ weçxana naꞌjĩna ptaꞌsx: Akayasuweꞌsxaꞌ jũꞌna anxutey puꞌçxyaꞌ ih ũstaꞌ jĩth. Açaꞌ Macedonia kiwesuweꞌsx maazkuẽesawa iꞌkweꞌsx puꞌçxyaꞌ yaakxniꞌs jiyuçxaꞌ, txãaweꞌsxwa puꞌçxyaꞌ yajkxtxi.
3 Txãꞌwẽtewa naa yakhthẽꞌjweꞌsxtxiꞌ neeweꞌweçthu, kxah adx weꞌweçxaꞌ: Korintoteweꞌsxaꞌ puꞌçxyaꞌ ih ũstaꞌ jĩth txãꞌ ĩsxiini yuumeena. Iꞌkweꞌsxaꞌ kxtey yuukahnthu txãꞌjĩꞌ.
4 Txãꞌwẽmeꞌ, Macedoniajũweꞌsx maaíiaꞌ adx yakh jaꞌdatey yuusaꞌ iꞌkweꞌsx kxtey yuumée ũsiyna kpaakitxna, açaꞌ wala thaame yuhna iꞌkweꞌsx txakwe wala puꞌçxyaꞌ ũstaꞌ jĩnisa txãꞌwẽ kxtey yuumeeteꞌ.
5 Txãa sũhçxath naa yakhthẽꞌjweꞌsxtxi yaçte kaajxaꞌ yajkx iꞌkweꞌsx tasxna, açaꞌ txãaweꞌsx paꞌjçxaꞌ naꞌwẽ puꞌçxwaꞌj pkhakhyaꞌ yajkx iꞌkwe txãꞌsaꞌ pkhakh puꞌçxna jxãꞌkhan. Kxah iꞌkweꞌsx wala pkhakhyaꞌ neeyũuiꞌkwe txãꞌsaꞌ ũçxhiꞌdxmée kãajaꞌjaneꞌkwe, makwe peesweçxtewa.
6 Iꞌkweꞌsxaꞌ peekx jii iꞌkwe: walamée mjĩiteꞌ, ũꞌwa wala meek kasejeꞌ. Nawa wala mjĩiteꞌ, ũꞌwa txãꞌwẽy walak kasejeꞌ.
7 Teeçxsa naꞌwẽçxah iꞌkweꞌsx ũuste makwe peesweçxteꞌ, txãꞌsçxáa kxtey yuuwaꞌjaꞌ. Waꞌlna txãꞌwẽ yũuwaꞌjmeꞌ, txãa paꞌgatey Dxusaꞌ peeygãjaꞌk ũuste weçxana txãꞌwẽ peessaꞌs.
8 Txãꞌwẽ yũuteꞌ, Dxusaꞌ peejimée ũsna nes yuuna iꞌkweꞌsx peejini yuꞌsaꞌ jxuka. Txajíiçxáa iꞌkweꞌsxaꞌ vxitesatxwa ũçxhiꞌdxmée wala puꞌçxyaꞌ ãjãneꞌkwe.
9 Txãꞌsna weꞌweçxak Dxus librute naꞌjĩꞌ:
Jiꞌphmeesatx waꞌlmée weçxana puꞌçxsaꞌs txãꞌwẽ ew yũupaꞌga,
Dxusaꞌ peejxmée ũsna nes yuuna jĩꞌk.
10 Uuhwaꞌj fxiwaꞌs Dxusku ũsuꞌ, saꞌ txãaíiçxáak kbuuçxaꞌjna nuywaláꞌ. Txãa paꞌga iꞌkweꞌsxaꞌ ũꞌwaꞌjaꞌs peejxmée jxuka uyçxaꞌ, vxitesatx peeswaꞌjaꞌswa wala uyuuneꞌkwe.
11 Txãꞌwẽ yũuteꞌ, iꞌkweꞌsxaꞌ kĩjkĩhwa jiꞌphsa yuuçxa waꞌlmée puꞌçxyaꞌ ãjaneꞌkwe. Açaꞌ iꞌkweꞌsx ũçxhiꞌdxmée peesyaꞌ pkhakhniꞌs kweꞌsx jxũna uꞌtheꞌ, jxpaꞌgasa yakhthẽꞌjweꞌsxaꞌ Dxusaꞌs weçxaatxna.
12 Naꞌwẽ yakhthẽꞌjweꞌsxtxi puꞌçxwaꞌj kajaçthaꞌw txãꞌ txãaweꞌsx peejiniçxáꞌs selpiwaꞌjsameꞌ. Txãꞌwẽ yũupaꞌga txãaweꞌsxaꞌ Dxusaꞌs wala weçxakahn txãꞌwẽ puꞌçxhiçthaꞌw.
13 Naꞌwẽ puꞌçxnisaꞌs txãaweꞌsxaꞌ jxpaꞌgaçxaꞌ, Kristo jxkaahniꞌs nwẽeseꞌjsa yuh yuꞌta sũhna jiyutxna, txãasa Dxusaꞌs tuutheꞌjna wala weçxaatxna, txãꞌwẽ iꞌkweꞌsx waꞌlmée peesyaꞌ pkhakhçxa txãaweꞌsxtxi peesna vxitesatxwa peespaꞌga.
14 Dxus puꞌçxte iꞌkweꞌsxaꞌ txãꞌwẽ ew yũupaꞌga, txãaweꞌsxaꞌ iiméh wala weçxana Dxus yakh puutx weꞌwetxna iꞌkweꞌsx paꞌgate.
15 Dxusaꞌs iiméh wala weçxaꞌthaꞌw txajx Nçxiꞌkaꞌs yuu kweꞌsxtxi peespaꞌga.
