2 Pedro 1:1-21
1 Jesukristoꞌs selpisáa Simon Pedro yaaseth, txajx jxkaahnisa. Txãasa naa kartaꞌs fxiꞌjaçthu, iꞌkweꞌsxwa kweꞌsx naꞌwẽyçxáa iꞌkwe Dxusaꞌs yaakxwaꞌjaꞌs jiꞌphu naa paꞌga. Txãꞌwẽ yuukahníi kweꞌsxtxi nweꞌwesa Jesukristo nweꞌwek.
2 Dxusaꞌs jiyuiꞌkwe saꞌ kweꞌsxtxi jxpeꞌjsa Jesusaꞌswa jiyupaꞌga, wala ew mfxiꞌzewe.
Dxus maꞌwẽsateꞌ txãa naꞌwẽysa yuuna paꞌjyaꞌ naꞌwẽsatx mpaakwewe
3 Txãa paꞌgatey kweꞌsxtxi paꞌyasaꞌs jiyupaꞌga txãꞌ jxuka ũsku kweꞌsx kĩh peejiniꞌswa, saꞌ kĩh pkal yuhwa jiꞌphmée fxiꞌzewaꞌjaꞌswa txãꞌwẽy.
4 Txãꞌwẽ Dxusaꞌ kĩhte yuhwa sxiigmée puꞌçxwaꞌjaꞌs jiꞌphçxa íiçxáak kweꞌsxtxiꞌs nweꞌweyaꞌ puutx weꞌwe. Txãꞌwẽ yũuteꞌ, iꞌkweꞌsxaꞌ naa kiwete jxuka ewmeesa kazx yajkxna fxiꞌzenijũ txuteeçxa, txãa maꞌwẽsateꞌ txãa naꞌwẽysa íiçxáa yuuna paꞌkhanku txãꞌwẽ yũu.
5 Txãa paꞌga Dxusaꞌ puꞌçxhina sũhwaꞌjaꞌs jiꞌphçxaꞌ, jweeíiçxáa ew fxiꞌzewaꞌjaꞌs mjiꞌphuwe. Saꞌ ew fxiꞌzewaꞌjaꞌs jiꞌphuçxaꞌ, Dxusaꞌs jweeíiçxáa ew jiyuwaꞌjaꞌs mpaakwewe.
6 Dxusaꞌs ew jiyuwaꞌjaꞌs jiꞌphuçxaꞌ, peekx kakwe ewmée yũuyaꞌ yaakxniꞌs nwẽeseꞌjmée fxiꞌzewaꞌjaꞌs mjiꞌphuwe. Peekx kakweꞌs nwẽeseꞌjmée fxiꞌzewaꞌjaꞌs jiꞌphuçxaꞌ, nxuswaꞌj paꞌthewa çxhãçxha fxiꞌzewaꞌjaꞌs mpaakwewe. Saꞌ txãꞌwẽsana jiꞌphuçxaꞌ, Dxusaꞌsçxáa neeweꞌwena fxiꞌzewaꞌjaꞌs mpaakwewe.
7 Dxusaꞌsçxáa neeweꞌwena fxiꞌzewaꞌjaꞌs jiꞌphuçxaꞌ, yakhthẽꞌjweꞌsx yakh ewçxáa wẽt fxiꞌzewaꞌjaꞌs mpaakwewe. Txãꞌwẽsaꞌs jiꞌphuçxaꞌ, peeygãawaꞌjaꞌs mjiꞌphuwe.
8 Txãꞌwẽsatx iꞌkweꞌsxaꞌ jxpaꞌgaçxa jxuka nwẽeseꞌjçxaꞌ, kweꞌsxtxi jxpeꞌjsa Jesukristoꞌs kxulteçxáa jiyuçxa en ivxiit-sa yuumeeneꞌkwe.
9 Nawa maawa txãꞌwẽsatx jiꞌphmeesaꞌ uyyaꞌ ãjasamée naꞌwẽsa yuuna, saꞌ Dxusaꞌ pkaltxiꞌs peltunãytewa peçxkanasa yuuna.
10 Txãa paꞌga Dxusaꞌ iꞌkweꞌsxtxi txhitxhçxa paꞌyayãꞌtheꞌ, txãꞌwẽsatx iꞌkweꞌsx ũuste bagaçxtewa jiꞌphuwaꞌjçxáꞌs mpaꞌpçxuwe. Txãꞌwẽ yũuçxaꞌ bagaçxte yuhwa Dxus tasxu txutemeeneꞌkwe.
11 Txãꞌwẽ yũusatxiꞌ thẽymée ũsni yuuna Jesukristo kweꞌsxtxi nweꞌwesa tasxte uꞌkawaꞌjaꞌs. Kxteeaꞌ bagaçxte yuhwa pçuwaꞌjsameꞌ.
12 Iꞌkweꞌsxaꞌ txãꞌwẽ yũuwaꞌjaꞌs ew jiiçxa ãçxh naa ensu isa ptaꞌsxnijũ txutemée ũsneꞌkwe, nawa adxaꞌ txãꞌwẽ yũuwaꞌjaꞌs kaayakiꞌjna nes yuꞌnja.
13 Adx uumeyçxáawa iꞌkweꞌsxtxiꞌ yuꞌkxpehna nes yuuni ewna sũjuꞌth peçxkanaweꞌsxte.
14 Txãꞌwẽmeꞌ, txaçxmeyna adx uuwaꞌjaꞌs kaajiyuꞌkh kweꞌsxtxi jxpeꞌjsa Jesukristoꞌ.
15 Txãa paꞌga nee uumey txãꞌwẽ yũuwaꞌjaꞌs yuꞌkxpehna nes yuꞌnja, kxah adx uutewa iꞌkweꞌsx ũuste neeyũuteꞌ, peçxkanamée kxtey yuuna nes yuuneꞌkwe.
Jesukristo txakwe seenaꞌ walasaꞌs uysáa
16 Kweꞌsxtxi jxpeꞌjsa Jesukristo kĩhtewa jxuka ãjasa sxawedna kĩiwaꞌjaꞌs ptaꞌsxthaꞌw txãꞌ ũus yajkxçxa ĩsxiinisameek yuꞌ. Txãa paꞌgatey kweꞌsx yafxju yuu uythaꞌw txakwe seenaꞌ zhiçxkwe walasa yuuçxa vxyaate.
17 Txãꞌwẽ Dxus kweꞌsx Tataꞌ Jesukristoꞌs weçxana zhiçxkwe eenaꞌ kweethniꞌsthaꞌw uy, saꞌ Dxusaꞌ naꞌwẽk weꞌwe: Naꞌ adx Nçxiꞌk wedxnisaꞌ, txãa paꞌga wala weçxana ũsthu jĩꞌk.
18 Cielujũ txãꞌjĩna weꞌweniꞌs kweꞌsx yuuthaꞌw wẽseꞌj, thãꞌj vxiçte Dxus vxyaak kxte kweꞌsxtxi jxpeꞌjsa Jesukristo yakh ũsçxaꞌ.
19 Txãꞌwẽçxáamée, vxite jiꞌpthaꞌw txãak wejx ãate ptaꞌsxiꞌ. Txãꞌ eꞌsu Dxus maꞌwẽ yũuwaꞌjaꞌswa dxiikhẽy ptaꞌsxna fxiꞌjçxa nvxiitnisaꞌ. Txãa ptaꞌsxnisaꞌs iꞌkweꞌsxaꞌ nwẽeseꞌjçxaꞌ, ew yũusáa yuuneꞌkwe. Txãaíi kus çxhiꞌdxtewa eenaꞌ kweethsaꞌ, khikhiiçte estrelxa naꞌwẽsa iꞌkweꞌsx ũuste pkiꞌtapkaçx.
20 Nawa iꞌkweꞌsxaꞌ ew mjiyuwe: Dxus yuwe dxiikhẽy ptaꞌsxna fxiꞌjçxa nvxiitnisaꞌ maa yuhwa peekx ũusuhçxáa yajkxçxa fxiꞌjnisa yuumeetaꞌ.
21 Txãa paꞌgatey Dxus kĩh yũuyaꞌwatewa dxiikhẽy ptaꞌsxsaweꞌsxaꞌ Dxus yakh fxiꞌzesatx yuꞌ, saꞌ peekx ũusuhçxáa yajkxçxa weꞌwemée, Dxus Espiritu kweꞌweꞌthetx txãꞌwẽ fxiꞌjna ũsuꞌ.
