2 Pedro 2:1-22
2 Txãꞌwẽtewa, ĩsxiisawa ũsuꞌtx Dxus yuwe ptaꞌsxsathaꞌw jĩsa Israelweꞌsx ksxavxysu, saꞌ iꞌkweꞌsx ksxavxysuwa txãꞌwẽy ĩsxiisa kasejetxna. Txãaweꞌsxaꞌ kaypubaꞌjwaꞌjçxáꞌs yajkxçxa iꞌkweꞌsx jiyunimeete kaapiyaꞌjatxna. Txãꞌwẽ yũuna nweꞌwesa Kristoꞌs yuu açesa yuutxna. Nawa txãꞌwẽ yũusaꞌ peekíiçxáa wala dud vxituwaꞌj jiꞌphutxna.
2 Txãꞌwẽ yũuteꞌ, maazkuẽesawa txãaweꞌsx ewmeesaꞌs kaapiyaꞌjniçxáꞌs kxtey yuuna fxiꞌzetxna, açaꞌ txãaweꞌsx paꞌgaçxáa Dxus yuwe isasa yuꞌ açeweꞌweni yuuna.
3 Txãaweꞌsxaꞌ iꞌkweꞌsxtxi vxyuu wala kutxiꞌj wẽeçxa kĩhçxáawa ĩsxiina kaapiyaꞌjatxna. Nawa txãaweꞌsx vxituwaꞌj en paꞌjana. Txãa enteꞌ iyumeetxna. Txãꞌwẽ ewmeete paꞌjwaꞌtheçxáa yãꞌj nvxiitni ũstaꞌ nyafxíi.
4 Dxusaꞌ txajx angelesweꞌsx yuhtxwa peltunaĩmeꞌ ewmée yũusa yãꞌtxhiꞌs. Txãasaíik infxierno iiméh seenaꞌ wala çxhiꞌdxte nvxihtna ũsuꞌ kastigãywaꞌj en ãhteweꞌsx.
5 Dxusaꞌ nyafxíi enteywa peltunaĩmeꞌ nasa ewmeesaweꞌsxtxiꞌ. Txãasaíik nasa ewmeesaweꞌsxtxi ivxiituyaꞌ nus kaahna ũsuꞌ. Naasáa Dxus yuwe ptaꞌsxsa Noé yuuçxáanak nweꞌwe vxiteꞌ txajx yatteweꞌsx sietesa yãꞌjçxa.
6 Txãꞌwẽy Dxusaꞌ Sodoma vxiteꞌ Gomoçxa çxhabtxi kastigãyçxa jxuka khuuççxáa yuupkaçxku ivxiitu. Txãꞌwẽ yũunisa yuꞌ maawa nasa ewmeesa yuutxiꞌ txãꞌwẽçxaçxáa kastigaĩꞌnja jĩna ptaꞌsxnisak yuꞌ.
7 Nawa Lot yuꞌsaꞌ nweꞌwek, txãa piçthẽꞌjaꞌ Dxus dxiꞌpte wala ew fxiꞌzesa yuꞌk, txãasak iiméh wala ewmée fxiꞌzesatx uyçxaꞌ, wala nxusna fxiꞌzeꞌ.
8 Txãa piçthẽꞌj ew fxiꞌzesaꞌ seenaꞌ ewmeesaweꞌsx yakh ũsçxaꞌ, txãaweꞌsx ewmée weꞌweniꞌs wẽseꞌjna ewmée yũuna fxiꞌzeniꞌswa uyçxa een isak txajx ũuste wala nxusna fxiꞌzeꞌ.
9 Txãꞌwẽk Kristoꞌ nweꞌweꞌ, txãa yakh utxaaçxa txutemée fxiꞌzesa nxuste fxiꞌzesatxiꞌs, saꞌ ewmée yũuna fxiꞌzesatxiꞌs kastigãywaꞌj vxitçxak nvxiituꞌ kastigãywaꞌj en ãhteweꞌsx.
10 Saꞌ Dxusaꞌ txãꞌwẽçxaçxáa kastigaĩna ewmée yaakxniçxáꞌs nwẽeseꞌjçxa kazx yũuna fxiꞌzesatxiꞌs. Txãꞌwẽ yũukahníi txãaweꞌsxaꞌ Kristo jxkaahniꞌs weeçxna nwẽeseꞌjmée juunaꞌçxáa yũusaataꞌ, saꞌ ũukhmeetx wẽesxuꞌ maꞌwẽsatxwa jxuka.
11 Naapkaçxhaꞌ angelesweꞌsxaꞌ txãa wẽesxusaate jxthaakwe çxhãçxha juunaꞌsataꞌ naa yuhwa txãa wẽesxusaatxiꞌs wẽesxuna Dxus dxiꞌpte ewmeete nvxiituꞌçmeetaꞌ.
12 Txãꞌwẽtewa txãa nasaꞌ tajkx naꞌwẽsaçxáataꞌ ew eenaꞌ yaakxwaꞌj yuꞌsaꞌ jiꞌphmeetaꞌ, saꞌ maꞌwẽsawa uweçxa ikhkahn upxsaçxáataꞌ. Dxusaꞌs açeweꞌwepaꞌga tajkx naꞌwẽçxáa uutxna.
13 Vxitetx pkxuupaꞌga txãaweꞌsxwa pkxuuni uutxna. Weeçx weeçxtxi yaakiꞌ naa kiwete pçuwaꞌjsa yakhçxáa ũsçxawa. Saꞌ txãaweꞌsxaꞌ iꞌkweꞌsx yakh ũsçxaꞌ, iꞌkweꞌsxtxi kaythameꞌjna yuwe susnatx fxiꞌzeꞌ iꞌkweꞌsx pkhaakhenite paꞌjçxa.
14 Txãaweꞌsx ũuste ewmée yajkxmée yuꞌ neeyũꞌçmeetaꞌ uꞌy puꞌjykhẽwçxaꞌ. Pkal yũuwaꞌjaꞌs watxiꞌçmeetaꞌ. Peekx kakweꞌs açxamée çxhãçxha paꞌyakxsatxiꞌs thẽymeetx pkalte kweeteꞌjeꞌ. Vxyuaꞌs iiméh wala jiꞌphu wẽesaçxáataꞌ. Txãaweꞌsxaꞌ Dxus dxiꞌpte vxituwaꞌjsataꞌ.
15 Ewsaꞌs nvxihtçxa jxpubana ũstaꞌ, Beor nçxiꞌk Balaan naꞌwẽy yũusaçxáataꞌ. Txãa Balaanaꞌ ewmée yũuçxak vxyuꞌs wala jiꞌphu wẽe.
16 Naa paꞌga txajx aꞌjni jibaꞌ nasa naꞌwẽk juunaꞌ weꞌwe txajx pkal yũu wẽeniꞌs. Txãꞌwẽ yũuçxak Balaan ewmée yaakxniꞌs kaanvxiituꞌj.
17 Txãa nasaꞌ pusu yuꞌ jiꞌphmeesa naꞌwẽsataꞌ, saꞌ tãaphnawa maꞌwẽga wejxa jxũna uꞌjweꞌ txãꞌwẽysaçxáataꞌ. Txãaweꞌsxaꞌ infxierno iiméh seenaꞌ wala ũukhũukh çxhiꞌdxte ũswaꞌjsataꞌ.
18 Txãaweꞌsxaꞌ selpiiwaꞌjmeesaçxáana wala iiwejçx weꞌweꞌtx, saꞌ txãaweꞌsx kakwe pkal yũu wẽeniçxáꞌs nwẽeseꞌjni yakh vxitetx pkalte kweeteꞌjeꞌtx, jxpubana fxiꞌzenijũ kasehçxa ũssatxwa.
19 Txãaweꞌsxaꞌ kĩh yuhnawa nwẽeseꞌjmée fxiꞌzewaꞌjaꞌ jĩꞌtx, nawa txãaweꞌsxíi yuuwa kxtey yuumée ewmée pkal yuꞌsaꞌ pejka yuhtx nwẽeseꞌjna fxiꞌzeꞌ. Txãa paꞌgatey nasa maawa kĩjaꞌs wejx yaakina naꞌ txãꞌsna nwẽeseꞌjna selpisaaçxa txãꞌwẽ yuuna.
20 Txãꞌwẽ nweꞌwesa Jesukristoꞌs jiyuçxa naa kiwete ewmée yũuna fxiꞌzenijũ kasehsaçxawa, kiꞌ txãatxiçxáa nwẽeseꞌjyaꞌ sxaweduuna. Açaꞌ txãꞌwẽ yũusaꞌ nyafxíi fxiꞌzenite jxthaakwe ewmeetek wetena paꞌjaꞌ.
21 Txãaweꞌsxaꞌ isa kaapiyaꞌjniꞌs jiyumeewaçneꞌ wejx ew yuꞌ, txãꞌwẽ Dxus jxkaahniꞌs jiyuçxa kiꞌ txuteena ũsyaꞌmée.
22 Txãꞌwẽ yũusatx weꞌweçxak naꞌjĩꞌ: Alkuꞌ pugaçxawa, kiꞌ sxawedku txajx puganitey. Açaꞌ kuçxiꞌ ew ateçxawa, txitx khũçxtek pẽw jĩꞌk.
