2 Pedro 3:1-18
3 Yakhthẽꞌjweꞌsx, naa kartaꞌ eꞌsu fxiꞌjnisa yãꞌjaꞌ. Nawa eꞌz kartatey iꞌkweꞌsxtxi yuꞌkxpehna fxiꞌjaçthu, ew jxpaꞌyakx ũskahn.
2 Naꞌwẽ Dxus yuwe ptaꞌsxsaweꞌsx nyafxiitey weꞌwetx nasa ewmeesa paꞌjwaꞌjaꞌs, naapkaçxhaꞌ Jesus jxkaahnisaweꞌsxaꞌ Jesukristo jxkaahniꞌs iꞌkweꞌsxtxi kaapiyaꞌjtx txãatx peçxkanamée ũskahn yuꞌkxpejeçthu.
3 Naꞌwẽ yũuwaꞌjaꞌs khuẽꞌy mpaꞌyajkxwe. Nmeh en yuuçteꞌ, nasa kasejetxna txãaweꞌsx kakwe pkal yũu wẽeniçxáꞌs nwẽeseꞌjçxa Dxus jĩi yuꞌsaꞌ açesa.
4 Saꞌ naꞌjĩna weeçxna paapẽyitxna: Kristoꞌ sxaweduꞌnja jĩçxaꞌ, ¿mteega yuu? Saꞌ naa kiwewaçwa kĩh yuhwa yuꞌpthehnimée ũsaꞌ, nyafxíi maꞌwẽneꞌ pheuꞌjni yuu txãꞌwẽesa ũsaꞌ ãçxpkaçx jĩtxna.
5 Txãaweꞌsxaꞌ yaakiꞌçmeetaꞌ naꞌwẽ yuꞌpthehni yuuk txãꞌsaꞌ. Nyafxíi entey Dxus jxkaahnite pheuꞌjni yuutx cielu, kiwe, vxiteꞌ yuꞌ. Açaꞌ eꞌsu yuꞌpthehçxa yuꞌaꞌs fxiik nvxiht kiwenawa txãꞌwẽy.
6 Saꞌ vxite enteꞌ Dxusaꞌ weꞌwena jxkaahçxaꞌ nusaꞌsku kaah, açaꞌ kiwe txãa enteweꞌsxaꞌ vxituk yuꞌte. Txãꞌsnatx jiyumeeçxa yuꞌpthehnimeꞌ jĩꞌ.
7 Saꞌ ãçxh neeyũusáa ũstaꞌ cielu vxiteꞌ kiwe txãatxiꞌ Dxusíik weꞌweçxa nvxiht nasa ewmeesatx jxuka naa kiwete ivxiituwaꞌj ente ipx naa kiweꞌs jxuka kabuna jĩna.
8 Yakhthẽꞌjweꞌsx, vxite naꞌwẽsaꞌswa mjiyuwe: Kristo yakhaꞌ teeçx ensaçxáa maꞌk yuu meeçxaꞌ mil anxusa maꞌk yuu nawa txaçxsa yuꞌ meeaꞌ, txãa naꞌwẽçxaçxáataꞌ.
9 Txãa paꞌgatx maaíiaꞌ naa sũjuꞌ: Kristoꞌ sxaweduꞌnja jĩçxawa iiméh wala txaçx jxthẽeyuuçaꞌ jĩnatx weꞌweꞌ. Nawa Kristoꞌ txãꞌwẽ jxthẽeyuuçmeꞌ. Txãꞌ teeçxçxáa yuhwa vxitumée ewmée yũuna fxiꞌzenijũ dud sxawedwaçaꞌ sũhna ũythasnaçxáa ũsaꞌ.
10 Txãasa Kristo kĩiwaꞌj enaꞌ ãhçxáa yuuna yajkxmée ũsiyna, pesweewa maꞌwẽga kus yaakxnimeete paꞌjaꞌ txãꞌwẽy. Naapkaçxhaꞌ cieluꞌ jxuka suweetxna seenaꞌ susniite, açaꞌ kĩjkĩhwa jxuka ipxte çxhavxyna pçuutxna. Kiwewa txãꞌwẽy çxhavxiina kxtee kĩhçxah ũstxna txãa jxuka.
11 Txãꞌwẽ seenaꞌ jxuka pçuwaꞌjsaꞌ txãa paꞌga iꞌkweꞌsxaꞌ iiméh wala ew fxiꞌzewaꞌj jiꞌphiꞌkwe, Dxus yakh utxaaçxa bagaçxte yuhwa txutemée.
12 Iꞌkweꞌsxaꞌ Dxus kĩiwaꞌj enaꞌs wala paꞌpçxuna mũythaswe. Txãꞌwẽmeꞌ txãa enteꞌ cieluꞌ jxuka vxitutxna ipxte, naapkaçxhaꞌ kĩjkĩhwa jxuka yuꞌwatxna ipx açxate.
13 Naapkaçxhaꞌ kweꞌsxaꞌ cielu uꞌsesa kiwewa uꞌsesaꞌsthaꞌw ũythasuꞌ, Dxusaꞌ txãꞌwẽsaꞌs ũsyaꞌ neeyũuk txãꞌsna. Kxteeaꞌ kĩhwa jxuka ewsaçxáa ũs yuuna.
14 Txãa paꞌga txãꞌwẽ yũuwaꞌjaꞌs ũythasna ũsçxaꞌ, wala jxpaꞌyakx meswe, kxah iꞌkweꞌsxaꞌ Dxus dxiꞌpte yuuwemeesa ew fxiꞌzesa yuuneꞌkwe txãa enteꞌ.
15 Peçxkananuwe naꞌwẽ kweꞌsxtxi jxpeꞌjsa Kristo jxthẽeyuuçaꞌ nawa txãa yuꞌ maawa ewte neeyũuwaꞌjaꞌs pakwekahn txãꞌwẽ ũythasna jxthẽeyuuçaꞌ. Kweꞌsx yakhthẽꞌj Pablowa txãꞌwẽyçxáak weꞌwena fxiꞌj Dxus kaaũusutheꞌjniꞌs.
16 Txajx fxiꞌjni karta jxuka naatxiçxáak weꞌwena fxiꞌj, nawa maaíi yuꞌ wala thẽytaꞌ jiyuwaꞌj, açaꞌ açxamée Dxus yakh çxhãçxha fxiꞌzesaꞌ jiyumeeçxatx txãa jiyunimeesatx txãaweꞌsx ũuste fxiy yajkxçxa yuꞌpthejeꞌ, txãasatx Dxus libru maꞌsnawa yuꞌpthejeꞌ, açaꞌ txãꞌwẽ yuꞌpthehnisaíiçxáa selpiꞌk txãaweꞌsx vxituwaꞌjaꞌs.
17 Txãa paꞌga, yakhthẽꞌjweꞌsx, wala mpaꞌyajkxwe dxiikhẽy ptaꞌsxni neeyũuçiꞌkwe txãꞌwẽsatx, txãꞌwẽ ewte yãꞌj fxiꞌzenijũ txuteeçxa ewmeesa ĩsxiina kaapiyaꞌjnite weteyaꞌmée,
18 wejxwa jweeíiçxáa kweꞌsxtxi nweꞌwesa Jesukristoꞌs ew jiyuçxa peeygãawaꞌjçxáana jiꞌphuyaꞌ mpaꞌpçxuwe. Txãꞌsaꞌ bagaçxtewa weçxana nes yuuwaꞌjsathaꞌw.
