2 Tesalonicenses 1:1-12
1 Pablo yaasesa naa kartaꞌs fxiꞌjaçthu Silwano vxiteꞌ Timoteo txãaweꞌsx yakh, yakhthẽꞌjweꞌsx Tesalónika çxhabte pkhaakhena ũssaweꞌsxtxi weçxana. Iꞌkweꞌsxaꞌ Dxus kweꞌsx Tata vxiteꞌ kweꞌsxtxi jxpeꞌjsa Jesukristo txãaweꞌsx yakh txutemée wala ew fxiꞌzena ũsiꞌkwe.
2 Iꞌkweꞌsxtxiꞌ Dxusaꞌ puꞌçxhina vxiteꞌ kweꞌsxtxi jxpeꞌjsa Jesukristo, txãa paꞌga Dxus yakhçxáa mfxiꞌzewe.
Kristoꞌ sxawedna kĩhçxa Dxusna nwẽeseꞌjsameeweꞌsxtxi kastigaĩna
3 Yakhthẽꞌjweꞌsx, iꞌkweꞌsx paꞌgate pejka Dxusaꞌs weçxawaꞌj jiꞌph yuhthaꞌw, txãꞌwẽ yũuniꞌ kxulsameꞌ naa paꞌga. Txãa paꞌgatey iꞌkweꞌsx ũusuh Dxusaꞌs yaakxnisaꞌ een isa jwee íiçxáa walaana uꞌjweçaꞌ, naapkaçxhaꞌ teeçxsa naꞌwẽçxah puutx yaꞌpeeygãhna fxiꞌzewaꞌjwa jwee íiçxáa pehnana uꞌjweçaꞌ.
4 Txãa paꞌgathaꞌw kweꞌsxaꞌ msuuwa Dxus luuçx pkhaakhena ũsnisu wẽt weçxana ptaꞌsxiꞌ iꞌkweꞌsx ew fxiꞌzeniꞌs. Txãꞌwẽ yuukahníi iꞌkweꞌsxaꞌ txakwe wala pkxuuni yahçena ũsçxawa, Dxus yakh jxpubamée fxiꞌzewaꞌj yuꞌsaꞌ waꞌlmeeiꞌkwe ãate kaavxyaꞌjaꞌjaꞌ.
5 Dxusaꞌ iiméh wala ewsaꞌ naꞌ txãasa neꞌ txãꞌwẽ ew fxiꞌzewaꞌjaꞌs iꞌkweꞌsxtxi kaavxyaꞌjaꞌjaꞌ, txãa paꞌga iꞌkweꞌsxaꞌ pkxuuni yahçena ũsçxawa txajx jxkaahna ũsnite paꞌjwaꞌjsaiꞌkwe.
6 Nawa iꞌkweꞌsxtxi pkxuusáa yuutxiꞌ kaꞌtuwa Dxus kastigãyni yuh yuutxna,
7 saꞌ iꞌkweꞌsx nxuste fxiꞌzesa yuutxiꞌ jxkaasewaꞌjaꞌs ũsuna kweꞌsx yãꞌjçxa, txãꞌwẽ Jesukristoꞌ txajx angelesweꞌsx yãꞌjçxa cielujũ kĩhçxa,
8 Dxusna nwẽeseꞌjmeeçxa kweꞌsxtxi jxpeꞌjsa Jesukristoꞌs ptaꞌsxniꞌswa nwẽeseꞌjsameetx kastigãyyaꞌ seenaꞌ ipx wala yakh kĩhçxa txãꞌwẽ kweꞌsxtxi jxkaasewaꞌjaꞌs ũsuna.
9 Txãaweꞌsxtxiꞌ Dxus jxkaahna ũsni tasxu txuhdeçxa bagaçxte yuhwa peena yuꞌ Dxus yakh puutx uywaꞌjmeete nxuste kastigãyni yuutxna.
10 Naapkaçxhaꞌ naꞌwẽ kweꞌsx ptaꞌsxniꞌs iꞌkweꞌsx jxukaysa jxpaꞌgaiꞌkwe txãa yãꞌjçxa vxiteꞌ Dxus luuçx jxukaysa yakh wala weçxana Jesukristoꞌs jxpaꞌgasa yuuneꞌkwe txajx sxawedna kĩi enteꞌ.
11 Txãa sũhçxathaꞌw iꞌkweꞌsx paꞌgate Dxus yakh puutx weꞌwena nes yuꞌ, Dxusaꞌ iꞌkweꞌsxtxi paꞌyayãꞌjçxaꞌ txajx kusete jxpeꞌjna nes yuukahn. Saꞌ txãꞌwẽy Dxus yakh puutx weꞌweꞌthaꞌw, Dxusaꞌ iꞌkweꞌsxtxi peeygãawaꞌjaꞌs puꞌvxitumée kxtey yuuçxa txãa yakh jxpubamée fxiꞌzewaꞌjaꞌswa jxuka puꞌçxkahn,
12 kxah kweꞌsxtxi jxpeꞌjsa Jesukristoꞌs tuutheꞌjsa yuuneꞌkwe, naapkaçxhaꞌ iꞌkweꞌsxaꞌ Jesukristo tuutheꞌjni yuuneꞌkwe naasáa kweꞌsx Dxus vxiteꞌ Jesukristo peeygãapaꞌga yuuçxáa.
