2 Tesalonicenses 2:1-17
2 Nawa ãçxhaꞌ kweꞌsxtxi jxpeꞌjsa Jesukristo kweꞌsxtxi pkhakhyaꞌ kĩiwaꞌjaꞌs ptaꞌsxiçthu, yakhthẽꞌjweꞌsxtxi wala neeweꞌwena.
2 Iꞌkweꞌsxaꞌ thẽymée yuꞌpthehna ũsnuwe, isa yuhwáana sũhna ũukhna, txãꞌwẽ Jesukristo kĩiwaꞌj enaꞌ ãjxãꞌkh jĩniꞌs, meeçxawa Dxusku vxyaaçxa txãꞌjĩkajaꞌ jĩwáatxna, meeçxaꞌ Pablok txãꞌwẽ ptaꞌsxkajaꞌ jĩwáatxna, nmehteꞌ kartawa kweꞌsx fxiꞌjni naꞌwẽysaçxawa ĩsxiinisa paꞌjawáana.
3 Nawa weh yuhwa jxpubanuwe ĩsxiiniꞌs. Txãꞌwẽ jxpubakahmén Kristo kĩiwaꞌj en ãhmeyna nyafxteꞌ Dxusaꞌs uy wẽemée ahçeçxa txãa yakh puiiwaꞌj en khuẽꞌy uꞌpuna, naapkaçxhaꞌ teeçx piçthẽꞌj eçxthẽꞌj naꞌwẽy iiméh seenaꞌ kazx pkalsa infxiernote akhni yuuwaꞌjsawa vxyaana.
4 Txãꞌ kĩhnawa jxuka açesa yuuna Dxus yaseꞌs kxsuusni yuꞌsaꞌ, saꞌ dxuus yatte uꞌkaçxa kaçxhiina, adxaꞌ Dxusthu jĩna jxkaajxaꞌ.
5 Adxaꞌ kxtee iꞌkweꞌsx yakh nee ũsiy ptaꞌsxthu txãꞌwẽ Dxusaꞌs açesa paꞌjwaꞌjaꞌs, açaꞌ ¿yaakiꞌçmeekweꞌ?
6 Txãꞌwẽ yũuwaꞌj en ãhmeyna, txãa ewmeesa kasehweꞌsxte kĩh txãꞌwẽ yupna ũstewa txãꞌsaꞌ jii iꞌkwe iꞌkweꞌsxaꞌ.
7 Txãa ewmeesaꞌ paaçte mjĩina yãꞌj ũsaꞌ, açaꞌ naasáa txãa ewmeesaꞌs yupna neewesaꞌs kutxiꞌjwaꞌjçxáa yãꞌj peejxaꞌ.
8 Txajũ isa txãa ewmeesaꞌ ãate vxyaana, nawa Jesukristoꞌ txajx weꞌwenijuçxáa naa dudte ikhena, saꞌ peena yuꞌ kaavxyaꞌjaꞌjmeena eenaꞌ kweethna kĩini yakh.
9 Txãa kazx ewmeesaꞌ eçxthẽꞌj kaahni txãꞌwẽ paꞌjana, txãasa kim yuhwa ãjanimeesaꞌs kaavxyaꞌjaꞌjana ĩsxiina kaypubaꞌjna.
10 Saꞌ Dxus yuwe isasaꞌs ptaꞌsxniꞌs jxpaꞌgasameetxiꞌ thẽymée kaypubaꞌjana ewmeesaçxáꞌs kaavxyaꞌjaꞌjçxa.
11 2:11-12 Txãꞌwẽ Dxus yuwe isasaꞌs ptaꞌsxtewa jxpaꞌgamée ĩsxiina ptaꞌsxniçxáꞌs nwẽeseꞌphaꞌga, Dxusaꞌ txãaweꞌsxtxiꞌ jxpubakahn nvxiituna vxituwaꞌjsa yuukahn.
12 —
Ewte neeyũuwaꞌjsatx Dxus txhitxhnisa
13 Nawa kweꞌsxaꞌ bagaçxtewa Dxusaꞌs weçxawaꞌj jiꞌpthaꞌw iꞌkweꞌsx ew fxiꞌzepaꞌga. Iꞌkweꞌsxaꞌ Jesukristo peeygãanisaiꞌkwe, txãa paꞌgatey Dxusaꞌ nyafxiitey txhitxhku iꞌkweꞌsx ewte neeyũuwaꞌjsatx, açaꞌ Dxus Espirituꞌ pkal jiꞌphmeesak vxitna paꞌj yuwe ewsaꞌs jxpaꞌgapaꞌga.
14 Txãꞌwẽ yuuyaꞌk Dxusaꞌ paꞌya yuwe ewsa kweꞌsx ptaꞌsxpaꞌga, kxah kweꞌsxtxi jxpeꞌjsa Jesukristo ũsnite paꞌjyaꞌ ãjakahn.
15 Txãa paꞌga, yakhthẽꞌjweꞌsx, weh yuhwa jxpubamée meswe, naꞌwẽ iꞌkweꞌsx yakh ũsçxa kaapiyaꞌthaꞌw saꞌ kartatewa fxiꞌjna ptaꞌsxthaꞌw txãatx peçxkanamée.
16 Kweꞌsxtxi jxpeꞌjsa Jesukristo vxiteꞌ Dxus kweꞌsx Tata peeygãhçxa bagaçxte yuhwa pçuwaꞌjmée weçxana ũswaꞌjaꞌs ũsku
17 txãa iꞌkweꞌsx ũustxi kçxhãaçxhaꞌjana, açaꞌ kĩhwa ewçxáa yũuna fxiꞌzeneꞌkwe, weꞌwewaꞌj maꞌk yuu nawa ewsaçxáꞌs puutx weꞌwena.
