2 Tesalonicenses 3:1-18
3 Nmehteꞌ, yakhthẽꞌjweꞌsxtxi naꞌwẽth neeweꞌweꞌ: Iꞌkweꞌsxwa maꞌwẽkwe Jesukristo ptaꞌsxniꞌs weçxana jxpaꞌga txãꞌwẽy msuuweꞌsxwa jxpaꞌgakahn Dxus yakh mpuutxweꞌwewe kweꞌsx paꞌgate,
2 kxah nasa ewmeesa kuseju iyuꞌnjaꞌw. Txãꞌwẽmeꞌ jxukaysa yuꞌ Dxusaꞌs yaakxsameetaꞌ.
3 Txãꞌwẽtewa Jesukristoꞌ bagaçxte yuhwa iꞌkweꞌsxtxiꞌ nvxihtmée ewmeejũ nweꞌwena kçxhãaçxhaꞌjana.
4 Kweꞌsx ptaꞌsxniꞌs naꞌwẽ yũuna ũsiꞌkwe txãꞌwẽçxáa nes yuukahn Jesukristoꞌ puꞌçxhina sũjuꞌthaꞌw.
5 Saꞌ Dxus peeygãaniꞌs peçxkanamée yaakxkahn, Jesukristoꞌ kaayakiꞌjna nes yuuna txãa naꞌwẽy çxhãçxha fxiꞌzekahn.
Mjĩiwaꞌj jiꞌphaꞌ
6 Yakhthẽꞌjweꞌsxtxi Jesukristo jxkaahniꞌs neeweꞌweçthaꞌw: maa yakhthẽꞌjwa mjĩimeena saꞌ kweꞌsx kaapiyaꞌjniꞌswa kxtey yuumeena açaꞌ txãꞌwẽsa yakhaꞌ pkhaakhenuwe.
7 Iꞌkweꞌsxaꞌ jii iꞌkwe kweꞌsxaꞌ maꞌwẽ yũuna fxiꞌzesatewa. Kweꞌsxaꞌ iꞌkweꞌsx yakh ũsçxaꞌ, mjĩimée yuꞌ fxiꞌzemeethaꞌw.
8 Saꞌ ũꞌaꞌs dukhmée yuꞌ fxiꞌzemeethaꞌw, wejxwa en maꞌk yuu kus maꞌk yuu nawa wala çxhãçxha mjĩithaꞌw iꞌkweꞌsx maa yuhtxwa thãasyaꞌmée.
9 Txãꞌwẽ yũu wẽemeewaçaꞌ, kweꞌsxaꞌ iꞌkweꞌsxtxi puꞌçx thãasyaꞌ ãjawaꞌjsathaꞌw yuꞌ. Nawa txãꞌwẽ puꞌçx thãasmée mjĩithaꞌw, iꞌkweꞌsxwa kweꞌsx naꞌwẽy yũuna fxiꞌzekahn.
10 Txãꞌwẽ yũukahmeníi kweꞌsxaꞌ kxtee ũsçxaꞌ naꞌwẽ yũuwaꞌjaꞌsthaꞌw nvxiht: Mjĩiyaꞌ waꞌlsaꞌ, ũꞌwaꞌjmeꞌ jĩna.
11 Iꞌkweꞌsx yakh ũssa maaíi yuꞌ kĩh yuhwa mjĩimée ewmeeçxáa fxiꞌzena yuwe ksuusuꞌjna fxiꞌzewaꞌjaꞌsçxáatx yaakiꞌ jĩnatx ptaꞌsxiꞌ.
12 Jesukristo jxkaahniꞌsthaꞌw juunaꞌ weꞌwena jxkaajaꞌ txãꞌwẽ yũusatxiꞌ, kxah txãaweꞌsxaꞌ çxhãçxha mjĩiçxa peekx ũꞌwaꞌjaꞌs uyuutxna.
13 Yakhthẽꞌjweꞌsx, iꞌkweꞌsxaꞌ ew yũuwaꞌj yuꞌsaꞌ waꞌlnuwe.
14 Meeçxaꞌ maaíi yuꞌ kxtey yuumeewáatxna naꞌjĩna fxiꞌjaçthaꞌw txãꞌsna açaꞌ maa txãꞌwẽ yũusatewa ew jiyuçxa, txãa yakh pkhaakhenuwe, kxah thaameetxna.
15 Nawa puiisáa naꞌwẽ yuꞌ yuunuwe, wejxwa zhiçxkwe myuꞌkxpehwe, maꞌwẽçxawa yakhthẽꞌjaꞌ naa paꞌga.
Dxus yakhçxáa fxiꞌzewaꞌjaꞌs neeweꞌweni
16 Kweꞌsxtxi jxpeꞌjsa Jesukristoꞌ iꞌkweꞌsx wẽt fxiꞌzewaꞌjaꞌs ũsuna bagaçxtewa, ewçxáa kaafxiꞌzeꞌjna. Dxus yakhçxáa mfxiꞌzewe.
17 Pabloth txãꞌwẽ weçxana fxiꞌjaꞌ adx kuseju. Adx kartatxiꞌ txãꞌwẽçxaçxáath adx yaseꞌs kiꞌpna fxiꞌjaꞌ, txãasath naꞌsnawa txãꞌwẽy fxiꞌjaꞌ.
18 Kweꞌsxtxi jxpeꞌjsa Jesukristoꞌ puꞌçxhina iꞌkweꞌsx jxukaysatx.
