2 Timoteo 1:1-18
1 Adxaꞌ Jesukristo jxkaahnisa Pablo yaaseth. Txãasa Dxus kaahnisath, txãꞌwẽ Kristo Jesusaꞌs jxpaꞌgateꞌ, txãꞌ ĩtxi fxiꞌzewaꞌjaꞌs ũswaꞌjsaꞌ jĩna ptaꞌsxkahn.
2 Adx nçxiꞌk naꞌwẽsa Timoteo idxaꞌs fxiꞌjaçthu, Dxus kweꞌsx Tata vxiteꞌ kweꞌsxtxi jxpeꞌjsa Jesukristo txãaweꞌsx peeygãhçxa puꞌçxteꞌ, idxaꞌ ewçxáa wẽt fxiꞌzeneꞌga.
Jesukristoꞌ nweꞌwesaꞌ jĩna ptaꞌsxwaꞌjaꞌs thaamenu
3 Kus maꞌk yuu en maꞌk yuu nawa bagaçxtewa Dxus yakh puutx weꞌwe iisath idxaꞌs yajkxna Dxusaꞌs weçxáꞌ, adx ũuste kĩh pkal yuhwa jiꞌphmée txãꞌsçxáanath selpiꞌ adx yaçgaweꞌsx maꞌwẽneꞌta selpiꞌ txãꞌwẽy.
4 Idx pxthaa ũꞌnena neeyũuniꞌs wala yaakiꞌth, txãasath idx yakh puutx uywaçaꞌ iiméh wala weçxawaꞌjaꞌs jiꞌphuꞌnjaꞌw sũjuꞌ.
5 Idxaꞌ Dxusaꞌs ũusuh jxukag yaakiꞌ txãꞌsaꞌ jiith, nyafxiiaꞌ iidx neepezx Loida vxiteꞌ iidx mama Eunice txãaweꞌsxtxi txãꞌwẽ yaakxwaꞌjaꞌs jiꞌphuꞌ, nawa ãçxhaꞌ txãꞌwẽ yaakxwaꞌjaꞌs idxwa jiꞌphneꞌga sũjuꞌth.
6 Txãa paꞌgath idxaꞌs yuꞌkxpejeꞌ naꞌwẽ adx idxaꞌs peekizeçxa Dxus yakh puutx weꞌweteꞌ, Dxusaꞌ ũsku idx kĩhtewa sxiigmée fxiꞌzewaꞌjaꞌs, açaꞌ txãatxiꞌ jweeíiçxáa peçxkanamée paꞌpçxuna mfxiꞌze.
7 Dxusaꞌ kweꞌsx ũukhna fxiꞌzewaꞌjaꞌs ũsmeꞌ, wejxwa ũukhmée çxhãçxha yajkxna peeygãhna peekíi ew fxiꞌzewaꞌj txãꞌwẽsatxku ũs.
8 Txãa paꞌga thaamena ũukhnu kweꞌsxtxi jxpeꞌjsa Jesukristoꞌ nweꞌwesa yujaꞌ jĩna ptaꞌsxwaꞌjaꞌs, saꞌ Jesukristoꞌs selpiipaꞌga adx preesu ũsthu txãa paꞌgawa thaamenu. Dxus yuwe ewte nvxiitwaꞌjsaꞌs ptaꞌsxpaꞌga nxuswaꞌj en paꞌthewa txãꞌsaꞌ yajkxmée, Dxusaꞌ adxaꞌs kçxhãaçxhaꞌjana sũhnaçxáa mes.
9 Dxusaꞌ kweꞌsxtxi nweꞌweçxa txhitxku, txajx dxiꞌpte kĩh pkal yuhwa jiꞌphmée fxiꞌzekahn. Nawa txajx dxiꞌpte kweꞌsx ew yũupaꞌga txãꞌwẽ txhitxmeꞌ, naasáa txajx jxthãasniꞌ txãꞌwẽk yuꞌ naa paꞌgaçxáak kweꞌsxtxiꞌ peeygãhçxa txhitxh, txãꞌwẽ Kristo Jesus yakh utxaapaꞌga. Naa kiwe meetey Dxusaꞌ kweꞌsxtxi peeygãjk.
10 Nawa txajx peeygãaniꞌ kweꞌsxtxi nweꞌwesa Jesukristo kĩinijũk isa ãate vxyaa. Txajuk Jesukristoꞌ uuwaꞌjaꞌs knayçxa kiꞌ ĩtxi yuuwaꞌjaꞌs vxit, saꞌ ãate kaajiyuꞌkh bagaçxte yuhwa pçumée ĩtxi fxiꞌzewaꞌjaꞌs. Txãꞌwẽ yũuniꞌsku Kristo yuwe ewte nvxiitwaꞌjsaꞌ ptaꞌsxiꞌ.
11 Açaꞌ txãa Kristo yuweꞌs ptaꞌsxkahnku adxaꞌs Dxusaꞌ nvxiht, judiu jiꞌjmée vxite nasatxwa kaapiyaꞌkhan.
12 Txãa paꞌgath txakwe wala thẽyte fxiꞌzeꞌ. Nawa thaameꞌçmeeth, txãa paꞌgatey jiith kim txãꞌwẽ adx yakh puꞌçxna ũstewa, saꞌ ew jiith Kristo tasxte ũswaꞌj en ãhpkaçx txãꞌ adx neeweꞌweniꞌs kxtey yuuna nes yuuna.
13 Açaꞌ idxaꞌ adx maꞌwẽtka ew kaapiyaꞌj txãꞌwẽçxáa mfxiꞌze, saꞌ Dxusaꞌs ũusuh jxuka yajkxna peeygãawaꞌjaꞌswa ũuste jiꞌphgu Kristo Jesus yakh fxiꞌzepaꞌga txãatxiꞌs peçxkanamée mfxiꞌze.
14 Idxna Dxus neeweꞌweçxa nvxiitniꞌs wala ew mpaꞌyajkx peçxkanamée, açaꞌ Dxus Espiritu kweꞌsx ũuste ũssaꞌ puꞌçxhina.
15 Idxaꞌ jiiyãꞌjneꞌga, Asia kiwesuweꞌsx jxukaysa adxaꞌs thegmée nvxihttxi, vxiteꞌ Fxigelo Hermógenes txãaweꞌsxwa txuteetx.
16 Txãꞌwẽtewa Onesífxoro yuꞌ maz uswa adxaꞌs kvxiisxaꞌkh adx preesu ũstewa thaamemée. Txãa paꞌga Kristoꞌ Onesífxoroweꞌsxtxiꞌ nweꞌwena.
17 Txãasaíik txãꞌ Romate ũsçxaꞌ, adxaꞌs uypkaçx pakwena paꞌj.
18 Txãꞌwẽ ew yũupaꞌga Kristo tasxna uꞌjwaꞌj en ãhteꞌ, Dxusaꞌ deweena. Idxaꞌ ew jiig txãꞌ kweꞌsxtxi wala puꞌçxsaꞌ Efxesote.
