2 Timoteo 2:1-26
2 Adx nçxiꞌk naꞌwẽsa idxaꞌ Kristo Jesus puꞌçxniꞌs jxpaꞌgaçxa Dxus yakh çxhãçxha mfxiꞌze.
2 Nasa maazkuẽesa ksxavxyte adx maꞌwẽneꞌtka ptaꞌsx txãa ptaꞌsxniꞌsíiçxáa mkaapiyaꞌj Dxus yakh ew fxiꞌzesatx, kxah txãaweꞌsxwa vxitetx txãꞌwẽyçxáa kaapiyaꞌjatxna.
3 Idxaꞌ Jesukristoçxáꞌs nwẽeseꞌjsa yãꞌjçxaꞌ, nxuswaꞌj en thẽysa paꞌthewa txãatxiꞌ ũukhmée çxhãçxha myajkx.
4 Soldauwa maꞌwẽga vxitesu yuꞌ nwẽeseꞌjmée soldau npiiçthẽꞌj jxkaahniçxáꞌs nwẽeseꞌjeꞌ txãꞌwẽy myũu.
5 Txãꞌwẽy knayyaꞌ pweesaꞌsawa maꞌwẽ jxkaatheꞌ kxtey nwẽeseꞌjna paꞌpçxumeeçxa yuꞌ, kĩh yuhwa knaymeena.
6 Mjĩisawa nyafxteꞌ mjĩiwaꞌjaꞌs khuẽꞌy çxhãçxha mjĩiwaꞌj jiꞌphaꞌ uuthasx thẽꞌtheꞌ ũꞌwaꞌj uyyaꞌ.
7 Adx weꞌwenitxiꞌs jiyuyaꞌ ũus myajkx, açaꞌ Jesukristoꞌ kaajiyuꞌjuna jxuka.
8 Ãçxhaꞌ Jesukristoꞌ jxkaahsa Davxid jiꞌj uuçxawa kiꞌ ĩtxi yuuk txãꞌsna myajkx. Adxaꞌ txãꞌsnath ptaꞌsxiꞌ ewte nvxiitwaꞌjsaꞌ jĩna.
9 Txãꞌwẽ Kristo yuwe ewsaꞌs ptaꞌsxpaꞌga yuuçxáa preesu ũsthu yuuwesa naꞌwẽ tudni pxthaa yuuna. Nawa Dxus yuwe yuꞌs tud-yaꞌ ãjameetxna.
10 Txãꞌwẽ Dxus yuweꞌs yup-yaꞌ ãjawaꞌjmeꞌ açíiçxáath adx nxuswaꞌjaꞌs ũukhmée Dxus yuweꞌs ptaꞌsxiꞌ Dxus txhitxnisa nweꞌwewaꞌj ũstxna txãaweꞌsxtxi peeygãhçxa, kxah Kristo Jesus yakh utxaapaꞌga txãaweꞌsxwa jiꞌphutxna pçuwaꞌjmée weçxana ewte ũswaꞌjaꞌs.
11 Naꞌwẽ yũuwaꞌjaꞌs ptaꞌsxnisaꞌ ĩsxiinisameꞌ:
Kristoꞌs ũuste jxpaꞌgaçxa uuçxaꞌ, txãa naꞌwẽy ĩtxi fxiꞌzeꞌnjaꞌw.
12 Makwe nxuste fxiꞌzewaꞌjaꞌs jiꞌphuçxawa, cielute txãa yakh jxkaahwaꞌj yuꞌsaꞌ ivxiitumeꞌnjaꞌw.
Txãꞌwẽ yũumée waꞌluwáꞌnjaꞌw açaꞌ txãawa kweꞌsxtxiꞌ jxpaꞌgameena.
13 Meeçxaꞌ kweꞌsxaꞌ txãa yakh kxtey yuumeewáꞌnjaꞌw, nawa txãꞌ txajx puutx weꞌweniꞌs kxtey yuuna nes yuuna.
Txãa paꞌgatey Dxusaꞌ txajx puutx weꞌweniꞌs ĩsxiiwaꞌjsameꞌ.
Kĩhte yuhwa sxiigmée fxiꞌzewaꞌjçxáꞌs paꞌpçxuni
14 Yakhthẽꞌjweꞌsxtxi yuꞌkxpehniꞌs mkaayakiꞌj Dxus dxiꞌpte, kxah selpiwaꞌjmeesu weꞌweniçxáꞌs ũusçxa pasna fxiꞌzemeetxna. Txãꞌwẽsaꞌ selpiꞌçmeꞌ, naasáa wẽseꞌjsatx kaypubaꞌjsaçxáꞌ.
15 Dxus dxiꞌpte kĩhte yuhwa sxiigmée wala ew fxiꞌzewaꞌjçxáꞌs mpaꞌpçxu, Dxus yuweꞌs jxpubamée ptaꞌsxna, mjĩisawa maꞌwẽga ew mjĩiçxaꞌ thaameꞌçmée txãꞌwẽy myũu.
16 Selpiwaꞌjmeesuçxáa weꞌwena kaapiyaꞌjnitx mpaꞌyajkx. Txãꞌwẽmeꞌ txãꞌwẽ kaapiyaꞌjsaꞌ jweeíiçxáatx een isa jxpubana ewmeete wetena uꞌjweꞌ.
17 Naapkaçxhaꞌ txãaweꞌsx kaapiyaꞌjni yuꞌ jweeíiçxáa mteewa jxuka suwna uꞌjwena. Himeneo vxiteꞌ Fxiletoweꞌsxaꞌ txãꞌwẽ yũusatx yuꞌ.
18 Txãasatx isa ptaꞌsxnijũ yuꞌ jxpubaçxa uusaaweꞌsx ĩtxi yuuwaꞌj enaꞌ skhẽwyãꞌkh jĩna kaypubaꞌjna ũstaꞌ Dxus yakh fxiꞌzesatx maaíitxiꞌs.
19 Nawa maaçxah txãa jĩitewa ew jiyukahn Dxusíi naꞌjĩna weꞌweçxak nvxiht: Dxusaꞌ jiiaꞌ maaçxah txãa jĩitewa jĩꞌk. Saꞌ: Jxukaysa Dxus yakh fxiꞌzesaꞌ ewmeejũ jxuka txutewaꞌjsataꞌ jĩꞌk.
20 Miiyajkx: Teeçx yatteꞌ iijxũnisa vxyuu beh vxyuu çxihme txãꞌwẽ ewsaçxáa ũsmeetaꞌ. Kxteeaꞌ açxamée selpisáa fxtũu, kiwe mitxhwa ũstaꞌ. Nawa iijxũni ewsaꞌ ewsaçxáꞌs selpiwaꞌjsaꞌ, açaꞌ açxamée ewsaꞌ ewmeesuçxáa selpiwaꞌjsataꞌ.
21 Txãꞌwẽ Dxus kusete ew selpi wẽeçxaꞌ, ewmeejũ jxuka txuteeçxa bagaçxte yuhwa pkalte wetemée Dxus yakh yuuçxáa fxiꞌzewaꞌjaꞌ. Txãꞌwẽ yuuçxáa selpiiyaꞌ yaꞌãjana kĩhtewa ew yũuwaꞌjaꞌs.
22 Idxaꞌ piçtakxweꞌsx ewmée yajkxna fxiꞌzenijũ txuteeçxa kĩhte yuhwa jxpubamée ewçxáa mfxiꞌze, Dxusçxáana yajkxna, maa yakhwa ewçxáa fxiꞌzena peeygãhna Dxusaꞌs ũusuh jxuka neeweꞌwesaweꞌsx yakh utxaaçxa.
23 Yuwe kĩhtewa selpiwaꞌjmeesatxiꞌ nwẽeseꞌjnu, yuwe txãꞌwẽsatxiꞌ jiiyãꞌjg puiiwaꞌjçxáak kasejeꞌ.
24 Txãa paꞌgatey Dxusaꞌs selpisáꞌ puiisu fxiꞌzewaꞌjmeꞌ, wejxwa jxukaysa yakh ewçxáa yũuna fxiꞌzewaꞌjaꞌ. Saꞌ ew kaapiyaꞌjsa yuuwaꞌjaꞌ, ewmée nuyweꞌwenitx yajkxmée.
25 Txãꞌwẽ ũusuh jxuka peeygãhna açesatx yuꞌkxpehwaꞌjaꞌ, Dxusaꞌ txãaweꞌsx ewmée yaakxnitx yuꞌpthehçxa ewsaꞌs kaajiyuꞌjwaçaꞌ sũhna.
26 Kxah eçxthẽꞌj kusete fxiꞌzeniꞌs jiyuçxaꞌ, txãajũ iyuyaꞌ ãjatxna. Txãꞌwẽmeꞌ eçxthẽꞌjaꞌ maꞌwẽwa suwyaꞌ ũsaꞌ.
