2 Timoteo 3:1-17
3 Nmeh en yuuçteꞌ, en ewmeesa ũukhũukhsa paꞌjana açaꞌ txãꞌwẽ yũuwaꞌjaꞌs jii mfxiꞌze.
2 Nasaꞌ peekx wẽt fxiꞌzewaꞌjçxáꞌs paꞌpçxuçxaꞌ, vxite yuutxiꞌ açesa, vxyuuçxáꞌs wejx yaakxsa, iiwejçx weꞌwena fxiꞌzesa, Dxusaꞌs açeweꞌwesa, neyweꞌsxtxi nwẽeseꞌjmée, ew yũutewa kaꞌtu yuꞌ weçxasamée, Dxusaꞌs yuhwa nwẽeseꞌjyaꞌ yaakxsamée,
3 vxitetx peeygãawaꞌj yuꞌsaꞌ jiꞌphmeesa, ewmée nuyweꞌwesa, peekx kakweju ewmée yũu wẽeniçxáꞌs thaakwe yaakxsa, kĩhwa ewsa yuꞌsaꞌ jxuka ahçeçxa seenaꞌ pkxuusáa,
4 ãate yuꞌ ew weꞌweçxawa eꞌsga yuꞌ kiikheꞌjna fxiꞌzesa, yuwe ewmée kasehwaꞌjsuçxáa weꞌwena fxiꞌzesa, ew ũus yajkxmey kĩhwa yũusáa, iiwejçx yaakxwaꞌjçxáꞌs jiꞌphsa, Dxusna pakwepkaçxte naa kiwete wẽt fxiꞌzeniçxáꞌs pakwesáa,
5 Dxusaꞌs yaakxsa naꞌwẽ yuh yuuna fxiꞌzetxna, nawa isa ũuste yuꞌ Dxusaꞌs jiꞌphmée yuutxna. Nasa txãꞌwẽsatx mpaꞌyajkx.
6 Txãꞌwẽmeꞌ txãaweꞌsxaꞌ maaíi yuꞌ yat-su paꞌjçxa ĩsxiijatxna uꞌy ew fxiꞌzewaꞌj yuꞌsaꞌ jiꞌphmeesa pkalteçxáa fxiꞌzesatx. Txãa uꞌyaꞌ kĩh yũu wẽeniꞌswa jxuka jiyu wẽenite
7 kaapiyaꞌjniꞌs jxpaꞌgaçxawa, isa ewsa yuꞌsaꞌ jiyuyaꞌ ãjaꞌçmeetaꞌ, pkalteçxáa fxiꞌzepaꞌga.
8 Maꞌwẽta dxijxuusáa eꞌzsa Janes Jabres txãaweꞌsxwa Moisesaꞌs ahçe, txãꞌwẽy txãa piçthẽꞌjweꞌsxaꞌ isasa yuꞌsaꞌ açetxna. Txãa paꞌgatey txãaweꞌsx ũus yaakxniꞌ jxuka suweniaꞌ, Dxus yakh fxiꞌzewaꞌj yuꞌsaꞌ jiꞌphmeetaꞌ naa paꞌga.
9 Nawa txãa piçthẽꞌjweꞌsxaꞌ jwee yuꞌ kĩhwa yũuyaꞌ ãjameetxna, txãaweꞌsxaꞌ kĩhwa jiimeesate jiyuyãꞌjçxaꞌ, nasaꞌ jxukaysa jwee yuꞌ nwẽeseꞌjmeetxna naa paꞌga, maꞌwẽta eꞌzsa Moisesaꞌs açesawa kĩhwa yũuyaꞌ ãjamée txãꞌwẽy.
Pabloꞌ Timoteoꞌs nmeh neeweꞌweçxa nvxiitni
10 Nawa idx yuꞌ adx kaapiyaꞌjnitx jxpubamée ũsgu. Idxaꞌ jiig adx ew fxiꞌzeni, Dxusçxáꞌs selpiiyaꞌ yaakxni, Dxusaꞌs peçxkanamée yaakxni, makwe thẽysa vxyaatewa txãatxiꞌ yajkxmée fxiꞌzeni, peeygãhnaçxáa fxiꞌzeni, maꞌwẽtka maa sũhmée wantãyiꞌ txakwe ahçeçxa pkxuuni yuuçxawa.
11 Idxaꞌ peekx jiig Antiokía, Ikonio, Listra çxhabsu adxna pkxuuna açenitxiꞌ. Nawa Dxusaꞌ txãasu jxuka nweꞌwek.
12 Açaꞌ maawa Kristo Jesusaꞌs selpiiyaꞌ utxasaꞌ pkxuuni yuutxna.
13 Naapkaçxhaꞌ ewmeesa ĩsxiisaꞌ jweeíiçxáa ewmée yũuna uꞌjwetxna, açaꞌ yaꞌĩsxiisaꞌ jweeju vxitetxwa ĩsxiina uꞌjwetxna.
14 Nawa idx yuꞌ iidx piyanijũ weh yuhwa txutemée mfxiꞌze, txãa paꞌgatey wala ew jiig idxaꞌs kim kaapiyaꞌthewa.
15 Leꞌçxkuẽjũjx Dxus yuweꞌs jiyug txãꞌ Kristo Jesus yakh fxiꞌzeçxa ewte paꞌjwaꞌjaꞌs kaajiyuꞌjuna.
16 Txãa paꞌgatey Dxus libruꞌ jxuka Dxus kaaũusutheꞌjnisaçxaçxáataꞌ, txãasa seelpisataꞌ ewmée yũukahmén yuꞌkxpejxaꞌ, jxpubamée ewçxáa kaafxiꞌzeꞌjyaꞌ.
17 Kxah Dxus yakh fxiꞌzesaꞌ kĩhtewa sxiigmée piyaçxa ewçxáa yũuna fxiꞌzetxna.
