2 Timoteo 4:1-22
4 Kweꞌsxtxi jxpeꞌjsa Jesukristo jxkaahsa yuuçxa yuhna ĩtxisatx vxiteꞌ uusaatx pkhakhçxa kĩh yũusatewa weꞌweyaꞌ txajx dxiꞌpte vxiteꞌ Dxus dxiꞌpte wala ew neeweꞌweçthu
2 Dxus yuweꞌs ptaꞌsxwaꞌjaꞌs. Bagaçxtewa ptaꞌsxna nes myuu. Ptaꞌsxwaꞌj en yuꞌsaꞌ ivxiitunu, kaajiyuꞌjna, ewmée yũukahmén weꞌwena, yuꞌkxpehna. Bagaçxtewa waꞌlmée mkaapiyaꞌj.
3 Txãꞌwẽmeꞌ, en ãjana, açaꞌ txãjũyãꞌjaꞌ nasaꞌ jxpaꞌgayaꞌ waꞌlutxna Dxus yuwe ewsaꞌs makwe ptaꞌsxtewa. Naasáa txãaweꞌsx ũus pẽyniꞌs kaapiyaꞌjwaꞌjsaçxáa maazkuẽewa pakweetxna.
4 Isa kaapiyaꞌjni yuꞌsaꞌ eꞌskhẽ nvxihtçxa, kĩhwa naa kiwete kwentuꞌjniçxáꞌs nwẽeseꞌjetxna.
5 Nawa idxaꞌ jxpubamée fxiꞌzewaꞌjaꞌs mpaꞌyajkx, nxussa paꞌthewa çxhãçxha mfxiꞌze. Saꞌ Dxus yuweꞌs ptaꞌsxwaꞌthe yuuçxáa mfxiꞌze, iidx mjĩiaꞌs weh yuhwa nvxiitnu.
6 Txãꞌwẽmeꞌ, adxaꞌ ãçxhaꞌ ikhwaꞌjçxáa yãꞌj ũsthu, adx uu enaꞌ utxa ũsaꞌ.
7 Nawa adxaꞌ ewmeesa yakh puiiwaꞌjaꞌs adx yuh knaythu, Dxus neeweꞌweni adx ptaꞌsxwaꞌjaꞌs jxuka kxtey yuuth, saꞌ Dxusaꞌs yaakxwaꞌjaꞌs leꞌçxkwe yuhwa ivxiitumeeth.
8 Txãꞌwẽ Dxus dxiꞌpte ew selpiina fxiꞌzepaꞌga peeswaꞌj cielute jxaawni ũsaꞌ txãꞌ adxaꞌs ũythasna ũsaꞌ. Txãꞌsaꞌ kweꞌsxtxi jxpeꞌjsa khuẽs ewsa txajx kĩiwaꞌj en ãhte, adxaꞌs ũsuna. Saꞌ adxçxáana ũsmeena; txajx kĩiwaꞌj enaꞌs weçxana ũythasna ũssa yuutxiꞌ jxukaysatx ũsuna.
Timoteoꞌs Pablo yuu kaahni
9 Maꞌwẽtewa en kutxiꞌjçxa dud myuh adxaꞌs thegyaꞌ.
10 Txãꞌwẽmeꞌ, Demasaꞌ adxaꞌs thegmée uꞌkh Tesalónikan, txãꞌ naa kiweteweꞌsxçxáꞌsku wejx wedxiꞌ txãasak txãꞌwẽ yũu. Krescenteꞌ Galacia kiwenku uꞌj, naapkaçxhaꞌ Titoꞌ Dalmacia kiwenku uꞌj.
11 Açaꞌ Lukas yuuçxáa adx yakh ũsaꞌ. Markosaꞌs pakweçxa peꞌjçxa myuh, ayte adxaꞌs mjĩi puꞌçxkahn.
12 Tíkikoꞌs Efxeso çxhabnath kaah.
13 Idxaꞌ yuhçxaꞌ, adx atxh Troas çxhabte Karpo yatte nvxihtthu txãꞌsaꞌ jxũçxa yuweeneꞌga. Saꞌ librutx vxiteꞌ fxiꞌjni eçtxi wejx peçxkanamée jxũneꞌga.
14 Çam tuça Alejandroꞌ adxaꞌs wala ewmée yũuk. Nawa txãꞌwẽ yũupaꞌga txãꞌsaꞌ Dxus jiina.
15 Idxaꞌ mpaꞌyajkx txãa piçthẽꞌjaꞌs. Txãꞌwẽmeꞌ, txãꞌ wala açesa yuuk kweꞌsx ptaꞌsxniꞌs.
16 Adxaꞌ nyafxçxah adx maꞌwẽsaçxawa khuẽsweꞌsx tasxna pasyaꞌ uꞌtheꞌ, kim yuhwa adx juꞌgu yuumeetaꞌ, adxçxáanatx nvxiht. Txãꞌwẽ yũutewa, txãaweꞌsxtxiꞌ Dxusaꞌ peltunãywaçaꞌ sũjuꞌth.
17 Makwe txãꞌwẽ yũutewa, Dxusaꞌ adxaꞌs puꞌçxku nxuskahmén, kxahth Kristo yuwe ewte nvxiit-saꞌs ptaꞌsxyaꞌ ãjaçxa judiu jiꞌjmée vxite nasa maazkuẽesatxwa kwẽeseꞌjyaꞌ ãja. Dxusaꞌ txãꞌwẽk adxaꞌs nweꞌwe león yuweju.
18 Saꞌ txãꞌwẽçxaçxáa ewmeejũ jxuka nweꞌweçxa jxaawuuna cielute txajx jxkaahna ũsniteweꞌsx. Wala yuh weçxa yujaꞌ txãꞌwẽ ew yũupaꞌga.
Pablo yuwe weçxaa kaahni
19 Ãçxhaꞌ yuwe meen weçxa Priska vxiteꞌ Akila vxiteꞌ Onesífxoroweꞌsxtxi.
20 Erastoꞌ Korintote neeyũuk, açaꞌ Trofximoꞌs Miletoteth nvxiht ãçaꞌk txãa paꞌga.
21 Nus paꞌjwaꞌj en ãhmeyna yujxaꞌ mpaꞌpçxu. Idxaꞌs yuwe weçxaa kajaꞌtx Eubulo vxiteꞌ Pudente vxiteꞌ Lino vxiteꞌ Klaudia vxiteꞌ yakhthẽꞌjweꞌsx jxukaysa.
22 Kweꞌsxtxi jxpeꞌjsa Jesukristoꞌ idx yakh nes yuuna, açaꞌ Dxusaꞌ iꞌkweꞌsx jxukaysatx puꞌçxhina.
