3 Juan 1:1-14
1 Thẽꞌj jĩna kxsusuꞌtx txãath fxiꞌjaꞌ naa kartaꞌs adx peeygãanisa Gayoꞌs weçxana.
2 Yakhthẽꞌj peeygãanisa, adxaꞌ iidx paꞌgate Dxus yakh puutx weꞌwena ũsthu kĩhtewa ewçxáa ãçaꞌmée fxiꞌzekahn, maꞌwẽga Dxus yakh çxhãçxha fxiꞌzeꞌ txãꞌwẽy.
3 Idxaꞌ Dxus weꞌweni isasaꞌs jxpubamée Dxus yakh ew fxiꞌzeniꞌs yakhthẽꞌjweꞌsx paꞌjçxa ptaꞌsxteꞌ, wala weçxath.
4 Adxaꞌ kĩh yuhnawa txãꞌwẽ yuꞌ weçxaꞌçmeeth, naasáa adx luuçxweꞌsx txãꞌwẽ Dxus weꞌweni isasaꞌs jxpubamée ũstaꞌ jĩna ptaꞌsxni yuuçxáak jxthaakwe yaꞌweçxaꞌ.
5 Yakhthẽꞌj peeygãanisa idxaꞌ bagaçxtewa puꞌvxitumée selpiina ũsgu vxite kiweju yakhthẽꞌjweꞌsx kxtee paꞌjsatx puꞌçxna.
6 Txãaweꞌsxaꞌ ayte yakhthẽꞌjweꞌsx pkhaakhenite ptaꞌsxtxi iidx peeygãhna puꞌçxniꞌs. Txãasa bagaçxtewa meen puꞌçx txãaweꞌsx dxiꞌthe uꞌjwaꞌj peejiniꞌs Dxus weçxakahn.
7 Txãaweꞌsxaꞌ kasehtx Jesukristo kaapiyaꞌjniꞌs ptaꞌsxna uꞌjuyaꞌ, nawa dxiꞌthe uꞌjwaꞌj peejiniꞌs pẽyiꞌçmeetaꞌ Dxusaꞌs jiimeesa yuutxiꞌs.
8 Txãa paꞌga kweꞌsxaꞌ kĩh peejiiçtewa puꞌçxhi jiꞌpthaꞌw Dxus weꞌweni isasaꞌs ptaꞌsxsatxiꞌ. Txãꞌwẽ yũunisa Dxus yuweꞌs jxukaysa jaꞌdaçxah mjĩini yaaseꞌ.
Diótrefxes ewmée yũuna fxiꞌzeni
9 Adxaꞌ teeçx karta fxiꞌth kxtee pkhaakhesaweꞌsxtxi, nawa Diótrefxes yuꞌ nwẽeseꞌjmeꞌ kweꞌsx weꞌweniꞌs txãaçxáa jxkaahna ũs wẽeçxa.
10 Txãa paꞌga adxaꞌ paꞌjçxa txãꞌsaꞌ paꞌyaçxa weꞌweꞌnja, txãꞌwẽ yuwe susna kweꞌsxtxi nuyweꞌwena uꞌjupaꞌga. Txãꞌwẽçxáa yũumée, vxite ekaju yakhthẽꞌjweꞌsx paꞌjsatx jxpaꞌgaꞌçmeꞌ, saꞌ vxite jxpaꞌga wẽesa yuutxiꞌs ahçeçxa txãa pkhaakhenijũ kutxiꞌjiꞌk.
11 Yakhthẽꞌj peeygãanisa, ewmeesa naꞌwẽy yuꞌ fxiꞌzewaꞌjmeꞌ, naasáa ewsa maꞌwẽ fxiꞌzeçteꞌ, txãꞌwẽ yuuçxáa fxiꞌzewaꞌjaꞌ. Ew yũuna fxiꞌzesaꞌ Dxus yakh fxiꞌzesaꞌ. Nawa ewmée yũusaꞌ, Dxus yakhmée fxiꞌzesaçxa txãꞌwẽ yuuna.
Demetrio ew fxiꞌzeni
12 Demetrioꞌ wala ewsaꞌ jĩnatx weꞌweꞌ jxukaysa. Txãꞌwẽ ew fxiꞌzeteꞌ, txajx ew fxiꞌzeni íiçxáa nweꞌweꞌk. Açaꞌ kweꞌsxwa jiithaꞌw txãꞌwẽ ew fxiꞌzeniꞌs. Iꞌkweꞌsxaꞌ peekx jii iꞌkwe kweꞌsx isa weꞌweniꞌs.
Nmehte weꞌwena fxiꞌjni
13 Adxaꞌ wala puutx weꞌwewaꞌj jiꞌpthu, nawa fxiꞌjçxa kajaçmeeth,
14 dud puutx uyçxa puutx weꞌweꞌnja sũhçxa.
1:15 Ayjxuweꞌsx namiku idxaꞌs wala yuwe weçxaa kajaꞌtx. Kxsũ namikuweꞌsxtxiwa teeçxsa naꞌwẽçxah yuwe meen weçxa. Dxus yakh mfxiꞌze.
