Fxilemón 1:1-25
1 Adxaꞌ Jesukristo jxkaahni yuwe ewsaꞌs ptaꞌsxpaꞌgaçxáa preesu ũsthu, nawa naa kartaꞌs fxiꞌjaçthu yakhthẽꞌj Timoteo yakh, kweꞌsx yakh mjĩisa Fxilemon idxaꞌs weçxana.
2 Vxiteꞌ kweꞌsx npeꞌsx Apia vxiteꞌ yakhthẽꞌj Arkipo kweꞌsx yakh mjĩisa vxiteꞌ iidx yatte pkhaakhesaweꞌsx txãaweꞌsxtxi weçxanath fxiꞌjaꞌ.
3 Dxus kweꞌsx Tata vxiteꞌ kweꞌsxtxi jxpeꞌjsa Jesukristo txãaweꞌsx puꞌçxni wẽt mfxiꞌze.
Fxilemonaꞌ Kristoꞌs ũusuh jxuka yajkxna vxitetxwa peeygãani
4 Bagaçxtewa Dxus yakh puutx weꞌwe iisath idxaꞌs yajkxna Dxusaꞌs weçxáꞌ.
5 Txãꞌwẽ Jesukristoꞌs yuuçxáa yajkxna yakhthẽꞌjweꞌsx jxukaysatxku peeygãhna fxiꞌzeꞌ jĩniꞌs jiyuçxath txãꞌwẽ weçxáꞌ.
6 Idx txãꞌwẽ Dxus yakh fxiꞌzepaꞌga vxitewa Dxusaꞌs jxpaꞌgasa ũstaꞌ txãaweꞌsxwa Kristo Jesus kĩhtewa jxuka puꞌçxniꞌs ew jiyukahnthu Dxusaꞌs neeweꞌweꞌ.
7 Adxaꞌs iiméh wala weçx weçxa ũusuthek yakhthẽꞌj iidx peeygãaniꞌs jiyuteꞌ, txãa paꞌgatey txãꞌwẽ iidx paꞌgaçxáa vxitewa txãaweꞌsx ũuste wẽt-saꞌs jxpaꞌgatx naa paꞌga.
Pablo Fxilemonaꞌs neeweꞌweni Onesimoꞌs ewçxáa jxpaꞌgakahn
8 Adxaꞌ Kristo kaahnisath naꞌ idxaꞌs juunaꞌ jxkaajxaꞌ ãjawaꞌjsath.
9 Nawa idx txãꞌwẽ ewsate jiiçxaꞌ, juunaꞌ weꞌwemée peeygãhnaçxáath weꞌweꞌ, adxaꞌ Kristo Jesusna selpiipaꞌga preesu ũsthu thẽꞌkhwe yãꞌjsa.
10 Txãasath idxaꞌs puꞌçx jxthãasuꞌ Onesimoꞌs ewçxáa yũuna. Txãꞌsaꞌ adx nçxiꞌk naꞌwẽsath Dxus jĩi knay ay karcelte ũsçxawa.
11 Nyafxíi yuꞌ idxna selpisáa Onesimoꞌ seelpimeesak yuu. Nawa ãçxhaꞌ wala seelpisaꞌ adx yakh vxiteꞌ idx yakhwa.
12 Txãꞌsna iidx tasxte kiꞌ kajaçthu açaꞌ miipaꞌga adx yuu kxtee paꞌjaç naꞌwẽ.
13 Adxaꞌ Dxus yuweꞌs ptaꞌsxpaꞌga ay karcelte ũsthu açaꞌ adxna piꞌkxna ũswaꞌjsa Onesimoꞌs kaahmeewaç wejx ewna, idxaꞌ adx yakh piꞌkxna ũsyaꞌ ãjaꞌçmeeg açaꞌ Onesimo ũskahn.
14 Nawa txãꞌwẽ yũu wẽemeeth, idxna kaajiyuꞌjmey yuꞌ, kxah idx adxna puꞌçx wẽeçxaꞌ puꞌçxhineꞌga Onesimoꞌs kaapiꞌkiꞌjna. Nawa idxaꞌs txãꞌwẽ myũu jĩna yuꞌ jxthãasuçmeeth.
15 Onesimoꞌ iidx tasxu maz en yuꞌ txuteeneꞌ, naajũyãꞌjaꞌ peena yuꞌ bagaçxte yuhwa txuteeyaꞌmée.
16 Nawa ãçxhaꞌ selpiisáa naꞌwẽmée, wejxwa selpiisaate jxthaakwe yakhthẽꞌj peeygãanisa naꞌwẽ ew idx jxpeꞌkhan neꞌ txãꞌwẽ yũu. Adxaꞌ Onesimoꞌs wala peeygãjaꞌth, açaꞌ idxaꞌ wejx jxthaakwe peeygãawaꞌj jiꞌphgu, Onesimoꞌ iidx jxpeꞌjnisak yuꞌ nawa ãçxhaꞌ txãꞌwẽçxáamée, iidx yakhthẽꞌjaꞌ Kristoꞌs jiisapaꞌga.
17 Idxaꞌ adxaꞌs namiku naꞌwẽ dxih yaakiççxaꞌ, Onesimoꞌs miipaꞌga, adx paꞌjwaç maꞌwẽ weçxana jxpaꞌgakiꞌg txãꞌwẽ yajkxna miipaꞌga.
18 Idxaꞌs ãhmée wáꞌ yuu, meeçxaꞌ yuulwáana açaꞌ adxna yuulaꞌs pẽyineꞌga.
19 Yuulaꞌs dukheꞌnja jĩna Pablo adx kuseju fxiꞌjniꞌs uyçxaꞌ, wejx yuuwa adx txãꞌwẽ Pabloꞌs yuulthu ew yũupaꞌga sũjuneꞌga.
20 Yakhthẽꞌj, txãꞌwẽ adx neeweꞌweniꞌs kxtey meen yuu, Onesimoꞌs jxpaꞌgana Dxusaꞌs jiisa naꞌwẽ. Txãꞌwẽ yũuçxaꞌ, adx ũuste wẽtwẽt kaayakiꞌjineꞌga.
21 Txãꞌjĩnath fxiꞌjaꞌ. Idxaꞌ kxtey yuuneꞌga saꞌ adx jxthãasnite jxthaakwe ew yũuwaꞌjaꞌs jiiçxath txãꞌjĩꞌ.
22 Txãꞌwẽçxáa yũumée, adx paꞌjwaꞌjaꞌswa ũythasna mes. Iꞌkweꞌsx txãꞌwẽ Dxus yakh puutx weꞌwena ũsteꞌ, Dxusaꞌ kajawáana açaꞌ maa enteyaꞌ sxaweduꞌnja iꞌkweꞌsxtxi thegyaꞌ.
Yuwe weçxaa kaahnitx ptaꞌsxna fxiꞌjni
23 Kristo Jesusna selpiipaꞌga karcelte adx yakh piꞌkxna ũssa Epafxraswa yuwe weçxaa kajaꞌk,
24 vxiteꞌ Markos, Aristarko, Demas, Lukas txãaweꞌsxwa mjĩi puꞌçxsataꞌ saꞌ weçxaa kajaꞌtx.
25 Kweꞌsxtxi jxpeꞌjsa Jesukristoꞌ iꞌkweꞌsxtxi puꞌçxhina.
