Gálatas 1:1-24
1 Adxaꞌ Jesukristo jxkaahnisa Pablo yaaseth. Naa kiwete piçthẽꞌjweꞌsx adxaꞌs txhitxhçxa jxkaahnisameeth, wejxwa Jesukristo vxiteꞌ Dxus kweꞌsx Tata naꞌwẽ uuniijũwa kiꞌ ĩtxi vxitku txãaweꞌsx jxkaahnisath.
2 Adx vxiteꞌ yakhthẽꞌjweꞌsx ayte ũssa txãaweꞌsx yakh naa kartaꞌs fxiꞌjçxa kajaçthu Kristo nasa Galacia kiwesu pkhaakhena ũssaweꞌsxtxi weçxana.
3 Iꞌkweꞌsxtxiꞌ Dxusaꞌ puꞌçxhina ewçxáa kaafxiꞌzeꞌjna vxiteꞌ kweꞌsxtxi jxpeꞌjsa Jesukristo.
4 Txãa Jesukristo íik kweꞌsx pkaltxi khũkhçxa ewmeejũ nweꞌweyaꞌ peekíi yaꞌdukhçxa kweꞌsx paꞌgate uu, Dxus jxthãasniçxáꞌs kxtey yuuna.
5 Txãa paꞌga Dxusaꞌs bagaçxtewa wala weçxawaꞌj jiꞌpthaꞌw.
Dxus yuwe vxite yuꞌ meeaꞌ
6 Iꞌkweꞌsxaꞌ Kristo nweꞌwenijũ txaçxmeyna txuteeçxa Dxus yuwe vxite fxiy kaapiyaꞌjniçxáꞌs nwẽeseꞌjna ũstaꞌ jĩniꞌs jiyuçxaꞌ, adxaꞌ wala kuh yaakiꞌth.
7 Ewte nvxiitwaꞌjsa Dxus yuwe vxite yuꞌ meeaꞌ, nawa iꞌkweꞌsxtxi kaypubaꞌj wẽeçxaçxáa maaíi yuꞌ Kristo kaapiyaꞌjniꞌs yuꞌpthehçxa fxiy kaapiyaꞌjna ũstaꞌ.
8 Nawa kweꞌsx ptaꞌsxthaꞌw txãꞌwẽmée fxiy kaapiyaꞌjna paꞌjatxna Dxus yuweꞌ jĩna açaꞌ txãꞌwẽ yũusatxiꞌ Dxus yuu iiméh seenaꞌ ewmeesataꞌ jĩçxa ivxiituwaꞌthe nvxiitni yuutxna. Meeçxaꞌ adx maꞌth fxiy kaapiyaꞌjna paꞌj meeçxaꞌ cielujũ kĩisa angel maꞌk txãꞌwẽ fxiy kaapiyaꞌjna paꞌj nawa txãꞌwẽ yũusa yuutxiꞌ txãꞌwẽçxaçxáa yuuni yuutxna.
9 Naꞌjĩꞌth naꞌ: Maawa Dxus yuweꞌs ptaꞌsxsathaꞌw jĩçxawa fxiy ptaꞌsxna paꞌjatxna kweꞌsx kaapiyaꞌthaꞌw txãꞌwẽmée açaꞌ txãa nasatxiꞌ Dxus yuu iiméh seenaꞌ ewmeesataꞌ jĩçxa ivxiituwaꞌtheçxáa nvxiitni yuutxna.
10 Naꞌwẽth weꞌweꞌ açaꞌ iꞌkweꞌsxaꞌ peekx mjiyuwe: adxaꞌ naa kiwete piçthẽꞌjweꞌsx adxaꞌs ew weꞌwe jxthãasna ũsmeeth, naasáa Dxus kaaũusutheꞌjniçxáꞌsthu ãate weꞌweꞌ. Saꞌ naa kiwete piçthẽꞌjweꞌsxtxi weçxaa jxthãasna ũsçxaꞌ, Kristona selpiisameeçxa txãꞌwẽ yuꞌnja.
Judiu jiꞌjmée vxite nasatx Dxus yuweꞌs ptaꞌsxsa Pablo
11 Yakhthẽꞌjweꞌsx mjiyuwe: Naꞌwẽ Dxus yuwe ewte nvxiitwaꞌjsaꞌs ptaꞌsxiꞌth txãꞌ piçthẽꞌjweꞌsx ũus yajkxçxa kaapiyaꞌjnisameꞌ.
12 Txãꞌsaꞌ adxaꞌs naa kiwete piçthẽꞌjweꞌsx ũsmeetaꞌ, naasáa Jesukristo yuuçxáak kaajiyuꞌj.
13 Iꞌkweꞌsxaꞌ jiiyãꞌjneꞌkwe adxaꞌ nyafxíꞌ judiuweꞌsx jxkaahniꞌs nwẽeseꞌjna ũsçxaꞌ, maꞌwẽtka fxiꞌzeꞌ, saꞌ maꞌwẽtka seenaꞌ juunaꞌ yuuna Kristo nasatx ahçe ivxiituyaꞌ sũhçxa.
14 Adxaꞌ judiuweꞌsx jxkaahni leyaꞌs kĩhte yuhwa peejxmée jxukath kxtey yuuna ũssa yuꞌ, adx jaꞌdaweꞌsx ũsuꞌtx txãaweꞌsxte jxthaakwe. Saꞌ adx yaçgaweꞌsx kaapiyaꞌjniꞌs adxçxáath iiméh ew kxtey yuusa yuꞌ.
15 Txãꞌwẽ açesatewa, Dxusaꞌ adxaꞌs iiméh wala peeygãhçxa, mama tutxhuh kasehmeyna txhitxhçxa nvxiitnisa neꞌtka yuꞌ.
16 Txãasak txajx Nçxiꞌkaꞌs jiyuwaꞌj en ãhteꞌ, adxaꞌs paꞌyaçxa kaajiyuꞌj txãꞌwẽ txajx yuwe ewte nvxiitwaꞌjsaꞌs judiu jiꞌjmée vxite nasatx ptaꞌsxkahn. Açaꞌ adxaꞌ maa yuhtxwa paapẽjxyaꞌ uꞌjmeeth.
17 Jerusalente Jesukristo jxkaahnisaweꞌsx ũsuꞌtx txãaweꞌsxçxáa yuhtxwa thegyaꞌ uꞌjmeeth. Txãꞌwẽ yũupkaçxte wejxwa Arabia kiwenthu uꞌj, saꞌ txãa eꞌsu sxawedçxaꞌ Damaskonthu uꞌj.
18 Saꞌ tekh anxu skhẽwnijũth Jerusalenna uꞌj, txãasath Pedroꞌs jiyu, saꞌ kxtee ũsuꞌth txãa yakh eꞌz kiꞌsu ãhpkaçx.
19 Nawa Jesukristo jxkaahnisaweꞌsx vxite yuꞌ jwee yuꞌ uymeeth, naasáa Jesukristo nyakh Jakoboçxáꞌsthu uy.
20 Dxus dxiꞌpte isath weꞌweꞌ, naꞌwẽ kim yuhtxwa paapẽjxmeeth jĩna fxiꞌjaçthu txãꞌ ĩsxiinisameꞌ.
21 Txãa eꞌsuꞌ Siria vxiteꞌ Cilicia kiwenthu uꞌj.
22 Açaꞌ Kristo nasa Judea kiwesu ũstaꞌ txãaweꞌsxaꞌ adx yuꞌsaꞌ iiuymeetaꞌ,
23 naasáa naꞌjĩniçxáꞌstxi wẽseꞌj: Kweꞌsxtxi ahçeçxa ivxiitu wẽesaçxawa, ãçxhaꞌ Kristoꞌs jxpaꞌgawaꞌjaꞌs ptaꞌsxna uꞌjuꞌ jĩniꞌstxi wẽseꞌj.
24 Txãꞌwẽ wẽseꞌjçxaꞌ, Dxusaꞌs wala weçxatx adx txãꞌwẽ yũupaꞌga.
