Gálatas 2:1-21
2 Katorce anxu skhẽwnijũꞌ kiꞌ uꞌth Jerusalenna, Bernabé vxiteꞌ Tito txãaweꞌsxtxi peꞌjçxa.
2 Txãꞌwẽ uꞌjwaꞌjaꞌs Dxusku ptaꞌsx txãa paꞌgath adxaꞌ uꞌj. Saꞌ kxtee Jerusalente jxkaahsaweꞌsxtaꞌ jĩni ũsuꞌtx txãaweꞌsx yakh dudte pkhaakheçxa txãaweꞌsxtxi ptaꞌsxthu naꞌwẽ judiu jiꞌjmée vxite nasatx kaapiyaꞌjaꞌth Dxus yuwe ewte nvxiitwaꞌjsaꞌs txãꞌsna. Txãꞌwẽth ptaꞌsx, txãꞌwẽmeꞌ adx mjĩiniꞌ ewmeek yuꞌ jĩweꞌsxte.
3 Nawa Tito adx yakh kxtee ũsuꞌk txãꞌsçxáa yuhnawa kaacirkuncidaĩꞌjmeetaꞌ, txãꞌ judiu meek yuꞌ naꞌswa.
4 Txãꞌwẽtewa txãa entey kweꞌsx ksxavxyte uꞌkatx kweꞌsxwa yakhthẽꞌjweꞌsxthaꞌw jĩna ĩsxiisa. Txãaweꞌsx yuꞌ Titoꞌs kaacirkuncidaĩꞌj wẽetx. Kweꞌsx txãꞌwẽ yũumeeçxawa, Kristo Jesus yakh kweꞌsx ew fxiꞌzeniꞌs suw wẽeçxatx peetheguꞌjyaꞌ uꞌka, judiuweꞌsx fxiꞌzenitey kaasxweduꞌj wẽeçxa.
5 Txãꞌwẽtewa, weh yuhwa txãaweꞌsx weꞌweniꞌs kxtey yuumeethaꞌw, txãꞌwẽ Dxus yuwe isa ptaꞌsxniçxáꞌs iꞌkweꞌsx nwẽeseꞌjna nes yuukahnthaꞌw txãaweꞌsx weꞌweniꞌs kxtey yuumée.
6 Kweꞌsx txãꞌwẽ nwẽeseꞌjmeetewa, yakhthẽꞌjweꞌsx jxkaahsaweꞌsxaꞌ adxaꞌs kaapiyaꞌjwaꞌj fxiy yuꞌ kĩh yuhwa yuꞌkxpehmeetaꞌ. Makwe txãaweꞌsxaꞌ walasa neꞌta yuꞌ, nawa adxaꞌ txãatxiꞌ thegu jiꞌphmeeth, txãa paꞌgatey Dxus dxiꞌpteꞌ maa yuhwa walasamée teeçxsa naꞌwẽçxaçxáathaꞌw naa paꞌga.
7 Txãꞌwẽ kaapiyaꞌjwaꞌjaꞌs fxiy yuꞌkxpehna ptaꞌsxipkaçxte, wejxwa txãaweꞌsxaꞌ jiyutx Dxus yuh idxaꞌs kaahneꞌ, txajx yuwe ewsaꞌs judiu jiꞌjmée vxite nasatxwa ptaꞌsxkahn. Pedronawa maꞌwẽga judiu jiꞌjçxáatx ptaꞌsxwaꞌjsa nvxiht, txãꞌwẽy neꞌ idxaꞌs vxite nasatx ptaꞌsxwaꞌjsa nvxiht jĩnaçxáatx weꞌwe.
8 Txãa paꞌgatey judiuweꞌsxçxáatx ptaꞌsxwaꞌjsa Pedrona kaahsa Dxus íiçxáak adxnawa kaah judiu jiꞌjmée vxite nasaa ksxavxysu.
9 Txajíiçxáatx Jakobo, Pedro vxiteꞌ Juan txãaweꞌsxaꞌ walasataꞌ jĩnisaçxawa, kweꞌsxtxiꞌsaꞌ maꞌjĩmée Dxus neꞌ txãꞌwẽ iꞌkweꞌsxtxiꞌs mjĩiwaꞌjsa nvxiht jĩçxa weçxana kuse ũstxi adxna vxiteꞌ Bernabeweꞌsxtxi naꞌjĩna: Iꞌkweꞌsxaꞌ judiu jiꞌjmée vxite nasa yakh mjĩineꞌkwe, naapkaçxhaꞌ kweꞌsxaꞌ judiu jiꞌj yakhçxáa mjĩꞌnjaꞌw jĩçxatx txãꞌwẽ kuse ũs.
10 Naasáa yakhthẽꞌjweꞌsx kĩhwa jiꞌphmée peejiina fxiꞌzesa yuutxiꞌ puꞌçxwaꞌjaꞌs peçxkanamée yajkxna fxiꞌzeneꞌkwe jĩnaçxáatx neeweꞌwe, açaꞌ txãꞌsaꞌ wala jxpaꞌyakx kxtey yuꞌth.
Ewte neeyũuyaꞌ judiuweꞌsxwa Kristoꞌs ũuste jxpaꞌgawaꞌjaꞌ
11 Txãꞌwẽ Pedroꞌ walasaꞌ jĩnisatewa, adxaꞌ txãꞌsaꞌ wala juunaꞌ weꞌweth, Antiokíate paꞌjçxaꞌ ewmeek yũuna ũsuꞌ naa paꞌga.
12 Pedroꞌ Antiokíate ũsçxaꞌ, Jerusalenu Jakobo kaahnisaweꞌsx paꞌjmeyna yuꞌ judiu jiꞌjmée vxite nasa yakh pkhaakheçxa txãaweꞌsx yakh waꞌlmeek ũꞌweꞌ. Nawa Jerusalenuweꞌsx paꞌjyãꞌtheꞌ, txuteeçxa pkhaakhemeꞌ, txajx jiꞌj cirkuncidãynisaweꞌsxtxi ũukhçxak txãꞌwẽ yũu.
13 Açaꞌ judiu jiꞌj Dxusna jiisa ũsuꞌtx txãaweꞌsxwa Pedro naꞌwẽytxi yũu. Txãa paꞌga Bernabé yuhwa Pedroweꞌsx yakhku utxáa.
14 Dxus yuwe ewte nvxiitwaꞌjsaꞌ txãꞌwẽ jxkaajaꞌçmeꞌ naꞌs txãꞌwẽ fxiy yuuçteꞌ, adxaꞌ Pedroꞌs wala juunaꞌ weꞌweth pkhaakhesaweꞌsx ksxavxyte naꞌjĩna: Idxaꞌ judiuçxawa, ayte ũsçxaꞌ vxite paꞌjmeyna yuꞌ judiu naꞌwẽmeeg fxiꞌze. Nawa ãçxh vxite paꞌthe yuꞌ, ¿kĩjxaꞌga judiu jiꞌjmée vxite nasa yakhaꞌ utxaawaꞌjmeꞌ jĩsa naꞌwẽ yuꞌ?
15 Kweꞌsxaꞌ mama tutxhuh kasejíi judiu jiꞌthaꞌw yuꞌ, saꞌ Dxusna jiimeesa jiꞌj yuꞌçmeethaꞌw.
16 Makwe judiu jiꞌjçxawa, Moises leyaꞌsçxáa yajkxteꞌ, maa yuhwa yuuwemée ewsa yaꞌyuꞌçmeꞌ, naasáa Jesukristoꞌs ũuste jxpaꞌgate yuuçxáak yuuwemeesa ewte yaꞌneeyũꞌ. Txajíiçxáathaꞌw kweꞌsxaꞌ judiuçxawa, yuuwemée ewte neeyũuyaꞌ sũhçxa Jesukristoꞌs ũusuh jxuka yajkxçxa jxpaꞌga, txãꞌwẽ ley jxkaahni yakhaꞌ yuuwemée ewte yaꞌneeyũꞌçmeꞌ naa paꞌga. Açaꞌ leyaꞌs yaakxsaꞌ naa kiwete kim yuhwa yuuwemée ewte neeyũuwaꞌjsameetaꞌ.
17 Txãasa ew yajkxte yuꞌ, makwe judiuçxawa yuuwemeesa yuuyaꞌ Kristoꞌs ũuste jxpaꞌgameeçxa yuꞌ, pkalsaíiçxáa neꞌtkaꞌw. Txãꞌjĩteꞌ, leyaꞌs nvxihtçxa Kristoçxáꞌs jxpaꞌgaçxa neꞌtkaꞌw yuuwe pkalsa yuu sũjuwáꞌkwe. Weh yuhwa txãꞌwẽmeꞌ.
18 Moises leyaꞌs nwẽeseꞌjmeete ewna jĩçxawa, eꞌsu kiꞌ weꞌweçxaꞌ: Pejka nwẽeseꞌthe ewna jĩna weꞌwesa txãꞌwẽ yuuwesa yuuna.
19 Adxaꞌ Moises leyaꞌs nvxihtçxawa kiꞌ nwẽeseꞌjçxaꞌ yuuwesa yuuyaꞌmée txãa ley yakhaꞌ uusáa naꞌwẽth yuu, Dxusçxáana nwẽeseꞌjyaꞌ.
20 Adxaꞌ leyaꞌs nwẽeseꞌjyaꞌmée Dxus yakhçxáa fxiꞌzeyaꞌ, Kristo yakh jaꞌda uusáa naꞌwẽth yuu, Txãasa ãçxh ĩtxi fxiꞌzeꞌth txãꞌ adx jĩimeꞌ, adxna ĩtxi kaafxiꞌzeꞌjsa Kristo jĩꞌ. Txãasath naa kakwe yakh ĩtxi fxiꞌzeꞌççxawa, naꞌwẽ Dxus Nçxiꞌk adxna peeygãhçxa peekíi yaꞌdukhçxa uuk adx paꞌgate txãa yakh yuuçxáa fxiꞌzeꞌ.
21 Txãa paꞌga Dxus peeygãhçxa ewte nvxiitniꞌs weeçx wẽemeeth. Txãꞌwẽ leyaꞌs nwẽeseꞌphaꞌgaçxáa yuuwemée ewte neeyũuwaçaꞌ, Kristo uuniꞌ kxulneꞌ yuuwaꞌj yuꞌ. Nawa txãꞌwẽ yuumeꞌ.
