Gálatas 3:1-29
3 Galacia kiwesuweꞌsx, wala yuh jiimeesa yuuiꞌkwe. Iꞌkweꞌsxtxiꞌ ¿kimga txakwe wala ĩsxii açkwe Dxus yuwe isasaꞌs nvxiht? Iꞌkweꞌsx txãꞌwẽ yuukahmeníi thaꞌw kweꞌsxaꞌ ãate ptaꞌsx Jesukristo kluuskhẽ uusáa kimtewa.
2 Mpeetaꞌsxwe: Iꞌkweꞌsxaꞌ ¿Moises ley jxkaahniꞌs nwẽeseꞌjçxakwe Dxus Espirituꞌs jxpaꞌgaꞌ? Meeçxaꞌ ¿kweꞌsx ptaꞌsxniꞌs nwẽeseꞌjçxakwe Dxus Espirituꞌs jxpaꞌgaꞌ?
3 Iꞌkweꞌsxaꞌ pejka txakwe yuꞌ wala jxpubawaꞌjmeetena Dxus Espiritu iꞌkweꞌsx ũuste puꞌçxyaꞌ takhniꞌs ¿maꞌwẽ iꞌkweꞌsx kakweju paꞌpçxuçxa Dxus Espiritu takhniꞌs jxãꞌjakiꞌkwe?
4 Dxus yuweꞌs wẽseꞌphaꞌga nakwe wala pkxuuni yuuiꞌkwe nawa Dxus yuwe isa ptaꞌsxniꞌs nvxihtçxaꞌ, kxulteçxáa pkxuunisa yuuneꞌkwe. Txakwe kxulteçxáa yuꞌ pkxuuni yuumeewaç wejx ewna.
5 Dxusaꞌ txajx Espirituꞌs ũsçxaꞌ, kim yuhwa ãjanimeesaꞌs kĩjkĩhwa kaavxyaꞌjaꞌjaꞌk iꞌkweꞌsxtxi ew jiyukahn puꞌçxna saꞌ ¿ley jxkaahniꞌs kxtey yuupaꞌgaga txãꞌwẽ yuuáꞌ? Meeçxaꞌ ¿kweꞌsx ptaꞌsxniꞌ isasa yuhna sũhna jxpaꞌgate wáꞌ txãꞌwẽ yuu?
Abrahan yakh Dxus puutx weꞌweni
6 Abrahanaꞌs miiyajkxwe: Txãꞌ ũusuh yuuçxáak Dxusaꞌs jxuka yajkxna nwẽeseꞌj. Açaꞌ txãꞌwẽ yũuteçxáa Dxusaꞌ Abrahanaꞌs yuuwemée ewsak vxit.
7 Txãa paꞌga iꞌkweꞌsxaꞌ mjiyuwe: Dxusaꞌs ũusuh yuuçxáa jxuka yajkxna nwẽeseꞌjsa yuuçxáa Abrahan jiꞌj yuutxna.
8 Txãꞌwẽ judiu jiꞌjmée vxite nasawa Dxusaꞌs ũusuh jxuka yajkxna nwẽeseꞌtheçxáa txãaweꞌsxtxiwa yuuwemée ewsa vxitwaꞌjaꞌs dxiikhẽy ptaꞌsxnik yuu Abrahanaꞌs naꞌjĩna: Maa nasawa jxuka ewsa yuutxna iidxpaꞌga yuuçxáa jĩꞌk Dxus librute.
9 Txãa paꞌga maawa Dxusaꞌs ũusuh yuuçxáa yajkxçxa nwẽeseꞌjsaꞌ Abrahan naꞌwẽy yuuwemée ewsataꞌ ãçxweꞌsxwa.
10 Açaꞌ Moises ley jxkaajaꞌk txãꞌsçxáana kxtey yuusaꞌ: Iiméh seenaꞌ ewmeesataꞌ jĩna Dxus yuu weꞌweçxaꞌ, ivxiituwaꞌthe nvxiitni ũstaꞌ. Txajíik Moises ley íiwa naꞌwẽ weꞌweꞌ: Maawa ley jxkaahnitx jxuka kxtey yuusameꞌ, ivxiituwaꞌthe nvxiitni yuutxna jĩꞌk.
11 Açaꞌ txãꞌwẽ leyaꞌsçxáa nwẽeseꞌjsaꞌ kim yuhwa Dxus dxiꞌpte yuuwemée ewsa yuꞌ meetaꞌ. Txajíik ãate naꞌwẽ ptaꞌsxiꞌ Dxus libruteꞌ: Dxusaꞌs ũusuh jxuka yajkxteçxáa Dxus dxiꞌpte yuuwemeesa yuuwaꞌjaꞌs yaꞌjiꞌphuna jĩꞌk.
12 Açaꞌ Moises leyaꞌ Dxusaꞌs ũusuh yaakxwaꞌjaꞌs weꞌweꞌçmeꞌ. Txãꞌwẽ ũusuh yaakxwaꞌjaꞌs weꞌwemeeçxa íik naꞌwẽçxáa weꞌweꞌ: Maawa jxkaahna fxiꞌjçxa nvxiitnisaçxáatx jxuka kxtey nwẽeseꞌjwaꞌjaꞌ ĩtxi fxiꞌzeyaꞌ jĩꞌk.
13 Txãꞌwẽ leyaꞌs jxukamée nwẽeseꞌphaꞌga iiméh seenaꞌ yuuwesathaꞌw yuꞌ, txãa paꞌga Kristok kweꞌsx iiméh seenaꞌ yuuwesa paꞌgate uu, ley kastigãyni kweꞌsxtxi nweꞌweyaꞌ. Txãꞌwẽ iiméh seenaꞌ yuuwesaꞌs kastigãyni uuwaꞌjaꞌs naꞌwẽk ptaꞌsxiꞌ Dxus librute: Iiméh seenaꞌ yuuwesaꞌs maawa fxtũukhẽ aꞌkxçxa ikhni yuuna jĩꞌk.
14 Txãꞌwẽ Kristo Jesus kweꞌsx paꞌgate uupaꞌgathaꞌw judiu jiꞌjmeeçxawa Dxusaꞌs ũusuh jxuka yajkxna nwẽeseꞌphaꞌga yuuwemée ewsa yuuçxa Dxus Espirituꞌs jxpaꞌgawaꞌjsa yuu. Txãꞌwẽ yuuwaꞌjaꞌsku Dxusaꞌ Abrahan yakh puutx weꞌwe txãꞌ kxtey yuuk.
15 Yakhthẽꞌjweꞌsx, naꞌwẽ yũuniꞌs miiyajkxwe: Kweꞌsxaꞌ kĩh yũuyaꞌ puutx weꞌweçxawa txãꞌsaꞌ peçxkanamée kxtey yuuyaꞌ jxuka eçte fxiꞌjçxa peekx yaseꞌs kiꞌpçxak yaꞌnvxiituꞌ. Açaꞌ txãꞌwẽ yũuniꞌs kim yuhwa ĩsxiiniꞌ jĩyaꞌ ãjaꞌçmeetaꞌ, saꞌ yuꞌpthejxaꞌwa ãjaꞌçmeetaꞌ.
16 Txãꞌwẽy Dxuswa Abrahan yakh ew puutx weꞌweçxa nvxiitniꞌs kim yuhwa yuꞌpthejxaꞌ ãjameetxna vxiteꞌ Abrahan jiꞌj yakh puutx weꞌweniꞌs. (Dxus weꞌweçxaꞌ: Iidx jiꞌjweꞌsx jĩꞌçmeꞌ, naasáa teeçxçxáak kxsusuꞌ: Iidx jiꞌj jĩnaçxáa. Txãa yuꞌ Kristoꞌs weꞌweçxak txãꞌjĩꞌ.)
17 Naꞌjĩꞌth naꞌ: Dxusaꞌ ũswaꞌjaꞌs kxtey yuuyaꞌ Abrahan yakh ewku puutx weꞌweçxa neeyũu, açaꞌ txãa puutx weꞌweni kuatrocientos treinta anxu skhẽwnijũk Moises leyaꞌ kasehna ũsuꞌ. Naa paꞌga txãa leyaꞌ Dxus ew puutx weꞌweçxa nvxiitniꞌs yuꞌpthejxaꞌ ãjawaꞌjsameꞌ, eꞌsu kasehsaꞌ naa paꞌga.
18 Moises leypaꞌga ewte neeyũuwaꞌjaꞌs jxpaꞌgawaꞌjsawaçaꞌ, dxiikhẽy Dxus puutx weꞌweniꞌ selpiwaꞌjmée neꞌ yuꞌ. Nawa txãꞌwẽ yũumée, ewte neeyũuwaꞌjaꞌs Dxusaꞌ Abrahan yakh ew puutx weꞌweçxa neeyũuk txãꞌ Moises leypaꞌgaméek jxpaꞌgawaꞌj yuꞌ.
Leyaꞌ naꞌwẽçxáa yuusaꞌ
19 Txãꞌwẽteꞌ, Moises leyaꞌ ¿kĩhtega selpiꞌ? Ewmée yũuna fxiꞌzepaꞌga yuꞌkxpehna fxiꞌjçxa nvxiitnisaçxáak yuꞌ. Saꞌ Dxus Abrahan yakh puutx weꞌweçxaꞌ: Iidx jiꞌj jĩk txãa paꞌphkaçxçxáak txãa leyaꞌ jxkaahwaꞌjsa yuꞌ. Txãa leyaꞌs fxiꞌjçxa nvxiit-sa yuꞌ Dxus angelesweꞌsxçxáatx yuꞌ, açaꞌ Moisesku jxpaꞌgaçxa jweeju yuꞌ nasatx kaapiyaꞌj.
20 Nawa ewte neeyũuwaꞌjaꞌs Dxus puutx weꞌwek txãꞌsaꞌ angelesweꞌsx jxpaꞌgaçxa peena Abrahanaꞌs ũsmeetaꞌ. Txãꞌwẽ yũumée, Dxus yuuk txajx yuweju ewte neeyũuwaꞌjaꞌs puutx weꞌwe.
21 Txãꞌjĩteꞌ, Moises ley yakh Dxus puutx weꞌwenisa yakhaꞌ utxaayaꞌ ãjawaꞌjsamée iipuiisatxna sũjuwáꞌkwe. Txãꞌwẽsameetaꞌ. Açaꞌ ley txãꞌwẽ ewte neeyũuwaꞌjaꞌs ũsyaꞌ ãjawaꞌjsawaçaꞌ, leyaꞌs nwẽeseꞌjsa yuꞌ jxuka ewte yãꞌj ũs yuꞌnjaꞌw.
22 Nawa txãꞌwẽmeete íik leyíi weꞌweçxawa: Jxukaysa pkalte yuuçxáa ũstaꞌ jĩꞌ. Txãa paꞌga Jesukristoꞌs ũusuh jxuka yajkxçxa yuuçxáa kweꞌsx ewte neeyũuwaꞌjaꞌs Dxus puutx weꞌwek txãꞌsaꞌ jxpaꞌgawaꞌjsathaꞌw.
23 Txãꞌjĩteꞌ, Moises leyaꞌ Dxus puutx weꞌweniꞌs açesana sũjuwáꞌkwe. Weh yuhwa açesameꞌ. Wejx yuuwa leyaꞌ kweꞌsxtxi jxaawna ũssak yuꞌ Jesukristoꞌs ũuste jxpaꞌgaçxa ewte neeyũukahn.
24 Leyaꞌ naasáa Kristo kĩhpkaçx kweꞌsxtxi jxpeꞌjsaçxáak yuꞌ, kxah Kristo kĩhteꞌ, txãꞌsaꞌ ũuste jxpaꞌgaçxaꞌ yuuwemée ewte neeyũuwaꞌjaꞌs jiꞌphukahn.
25 Ãçxhaꞌ Kristoꞌs ũuste jxpaꞌgawaꞌj en ãjk, açaꞌ txãa ley kweꞌsxtxi jxpeꞌjsaꞌs peena yuꞌ yaakxwaꞌj jiꞌphmeethaꞌw.
26 Txãa paꞌga iꞌkweꞌsxaꞌ Kristoꞌs ũusuh jxuka yajkxçxa nwẽeseꞌphaꞌgaçxáa Dxus luuçx yuuiꞌkwe.
27 Iꞌkweꞌsx jxukaysa Kristo yakh fxiꞌzeyaꞌ sũhçxa yuꞌte yaꞌbautisãysaꞌ txajx kusete jxpeꞌjni ũsiꞌkwe.
28 Ãçxhaꞌ maa yuhwa puutx iiwejçx yaakxwaꞌjmeꞌ. Judiu maꞌk yuu meeçxaꞌ judiumée maꞌk yuu, patron jiꞌphsa maꞌk yuu meeçxaꞌ patron jiꞌphmeesa maꞌk yuu, piçthẽꞌj maꞌk yuu meeçxaꞌ uꞌy maꞌk yuu nawa maa yuhwa puutx iiwejçx yaakxwaꞌjmeꞌ, txãa paꞌgatey Kristo Jesus yakh fxiꞌzesaꞌ maa yuhwa thaakwemée jxukaysa puutx txãa naꞌwẽçxaçxáa iꞌkwe.
29 Iꞌkweꞌsxaꞌ Kristoꞌs jxpaꞌgasaçxaꞌ, Abrahan jiꞌjçxa txãꞌwẽ yuuneꞌkwe, saꞌ ewte neeyũuwaꞌjaꞌs puutx weꞌwek txãꞌsaꞌ jxpaꞌgawaꞌjsaiꞌkwe.
