Gálatas 4:1-31
4 Ãçxhaꞌ naꞌsna mjiyuwe: Luuçxaꞌ ney uuteꞌ, leꞌçxkuẽy yuꞌ vxite thẽꞌjsa kusetek jxpeꞌjni fxiꞌzeꞌ walaaçxa yuꞌ, ney nvxiitniꞌs jxuka txãaçxaçxáa jxpaꞌgawaꞌjsaçxawa.
2 Açaꞌ leꞌçxkuẽy yuꞌ thẽꞌjsatx thegna jxpeꞌjeꞌ, makwe txaçxpkaçx neꞌ neyaꞌ neeweꞌweçxa thẽꞌjsa kusete jxpeꞌkhan nvxiht txãa en ãhpkaçx.
3 Kweꞌsxwa txãꞌwẽysathaꞌw yuꞌ. Luuçxwa maꞌwẽga leꞌçxkuẽy yuꞌ thẽꞌjsa jxpeꞌjni fxiꞌzeꞌ, txãꞌwẽythaꞌw nyafxíi yuꞌ ley jxkaahni txajx kusete fxiꞌzena ũsuꞌ.
4 Nawa makwe txaçxpkaçx neꞌtkaꞌw jxpeꞌjni fxiꞌzewaꞌjsa yuꞌ txãa en pçuuteꞌ, Dxusaꞌ txajx Nçxiꞌkaꞌs kaakh, teeçx uꞌy kakwete kasehçxa judiuweꞌsx naꞌwẽy leyaꞌs nwẽeseꞌjwaꞌjsa.
5 Açaꞌ kweꞌsxaꞌ ley jxpeꞌjni ũstewa, txãꞌwẽ yũuçxak txãajũ kutxiꞌjçxa Dxus luuçx yuuwaꞌjaꞌs ũs.
6 Txãa paꞌga iꞌkwe Dxus luuçx yuuna paꞌj, açaꞌ Dxusaꞌ txajx Espirituꞌs iꞌkweꞌsx ũuste kaakh, ãçxhaꞌ Dxus luuçxthaꞌw sũhwaꞌjaꞌs jiꞌphukahn. Txajk Dxus Espirituꞌ iꞌkweꞌsx ũuste kaaũusutheꞌjeꞌ Dxusaꞌ kweꞌsx Tataꞌ sũhwaꞌjaꞌs.
7 Txãa paꞌga ãçxhaꞌ iꞌkweꞌsxaꞌ ley jxpeꞌjnisamée, Dxus luuçxiꞌkwe. Açaꞌ txajx luuçx yuupaꞌga Dxusaꞌ txãa jĩꞌs kĩhnawa jxuka iꞌkweꞌsx jĩiçxaçxáa nvxiituna Kristo nweꞌwepaꞌga.
Ley jxkaahnite kiꞌ sxawedsatx yuꞌkxpehni
8 Iꞌkweꞌsxaꞌ nyafxíi yuꞌ Dxusaꞌs jiimeeçxaꞌ, Dxusmeeçxáatx iꞌkwe selpiina fxiꞌzesa yuꞌ.
9 Nawa ãçxhaꞌ Dxusaꞌs jiisa yãꞌjiꞌkwe meeçxawa Dxusaꞌ iꞌkweꞌsxtxi jiiaꞌ açaꞌ ¿kĩjxaꞌçxáa kiꞌ sxawedukiꞌkwe piçthẽꞌjweꞌsx kaapiyaꞌjni açxamée seelpisate fxiꞌzeyaꞌ?
10 Txãꞌwẽ Dxusaꞌs jiiyãꞌjçxaꞌ, ley jxkaahni entxi kiꞌsna, aꞌtetxwa kiꞌsna, anxutxwa kiꞌsna nwẽeseꞌjwaꞌj jiꞌphmeeiꞌkwe.
11 Txãa paꞌgath txãꞌwẽ yũuçte uyçxa wala yaakiꞌ: Kxulçxáa wáꞌntka iꞌkweꞌsxtxi kaapiyaꞌj sũhna.
12 Txãasath yakhthẽꞌjweꞌsxtxi neeweꞌweꞌ, adxwa maꞌwẽtka ley kaapiyaꞌjniꞌs jxuka nvxihtçxa iꞌkweꞌsx naꞌwẽy ley jxkaahnimée fxiꞌzena ũsuꞌ txãꞌwẽy yuukahn.
13 Txãꞌwẽ adxaꞌ kxtee uuyaꞌ ũsçxaꞌ, iꞌkweꞌsxtxi nyafxçxah Dxus yuweꞌs ptaꞌsxteꞌ,
14 ãçaꞌna ũstewa ahçemée wejxwa Dxus angel meeçxawa Jesukristo thasiꞌkwe weçxana jxpaꞌga adxaꞌs.
15 Nawa txagaçxtey wẽt weçxana yaakxnisaꞌ ¿mteega yuu? Naꞌjĩꞌth naꞌ: Txagaçxhíi yuꞌ adxna peeygãaweeteçxáa iꞌkweꞌsx yafxtxi kutxiꞌjçxa adxna ũsyaꞌ ãjawaçaꞌ, txãꞌwẽ yũuwaꞌjneꞌkwe yuꞌ.
16 Nawa ãçxhaꞌ isasaꞌs ptaꞌsxsa yuꞌs açesa naꞌwẽ yuuna ũsiꞌkwe adxaꞌs.
17 Kxsũ iꞌkweꞌsxtxi kaapiyaꞌjsaweꞌsxaꞌ iꞌkweꞌsxtxi txãaweꞌsx juꞌgutx tuphi jxthãasuꞌ. Nawa ew yajkxçxa txãꞌwẽ yuꞌçmeetaꞌ, naasáa adx kaapiyaꞌjnijũ txude wẽeçxaçxáa txãꞌwẽ yũuna ũstaꞌ, iꞌkweꞌsxaꞌ txãaweꞌsx yakh uꞌkhan.
18 Txãꞌwẽ vxitesatx peekx juꞌgu tuphywaꞌj yujaꞌ, nawa bagaçxtewa ew yũuwaꞌjçxáꞌs yajkxçxa txãꞌwẽ yũuwaꞌjaꞌ, saꞌ adx kxtee iꞌkweꞌsx yakh ih ũsteçxáa txãꞌwẽ ew yũusáa naꞌwẽ fxiꞌzewaꞌjmeꞌ.
19 Luuçxweꞌsx, adxaꞌ iꞌkweꞌsx txãꞌwẽ yũupaꞌga iiméh wala akate nxusna ũsthu, uꞌy nasate yaakasáa naꞌwẽ. Saꞌ nxusna nes yuꞌnja iꞌkweꞌsxaꞌ Kristo naꞌwẽy fxiꞌzeyaꞌ ãjapkaçx.
20 Adxaꞌ ãçxhíith kxtee iꞌkweꞌsx yakh ũs wẽjeꞌ, iꞌkweꞌsx jxpubana yaakxniꞌs yuꞌpthejxaꞌ. Nawa jiimeeth iꞌkweꞌsxtxi maꞌwẽ puꞌçxwaꞌjaꞌswa.
Sara Agar yakh kaajaꞌdaꞌjni
21 Iꞌkweꞌsxaꞌ ewte neeyũuyaꞌ sũhçxaꞌ Moises leyaꞌs iꞌkwe yaakiꞌ, saꞌ txãa leyaꞌ naꞌwẽsaçxáꞌ txãꞌsaꞌ jiyuꞌçmeewáꞌkwe.
22 Txãꞌsaꞌ jiyukahn naꞌwẽ fxiꞌjni ũsaꞌ Dxus librute: Abrahanaꞌ eꞌz luuçxku jiꞌphu jĩꞌk. Teeçxsaꞌ peekx nyuuteweꞌsxmée, yatte selpisáa uꞌyteweꞌsxku yuꞌ, açaꞌ vxite nçxiꞌkaꞌ peekx nyuuteweꞌsxku yuꞌ.
23 Açaꞌ yatte selpisaate kasehsaꞌ kĩhwa meesa peekx vxyaasaçxáak yuꞌ. Nawa peekx nyuute kasehsaꞌ naꞌwẽ Dxusaꞌ Abrahan yakh puutx weꞌweçxaꞌ: Luuçx jiꞌphuneꞌkwe jĩk txãak yuꞌ.
24 Txãa eꞌz uꞌyaꞌ naꞌwẽsataꞌ: Naꞌwẽ Dxus eꞌzsa yakh puutx weꞌwek Abrahan vxiteꞌ Moises yakh txãataꞌ txãa eꞌz uꞌysaꞌ. Dxus puutx weꞌweni teeçxsaꞌ Sinaí vxiç walatek yuu, açaꞌ kxtee puutx weꞌweniꞌ Agarwa maꞌwẽga vxitee jxkaahni selpiina fxiꞌze txãꞌwẽsaꞌ. Txãasa íitx txãa puutx weꞌwenijũ upxsaꞌ ley jxkaahnitx selpiina fxiꞌzeyaꞌ kasejeꞌ.
25 Agaraꞌ Arabia kiwesu Sinaí vxiç wala naꞌwẽsaꞌ; txãꞌwẽy naa ensu Jerusalen ũsaꞌ txãawa txãa Sinaí naꞌwẽysaꞌ. Txajíiçxáa txãa çxhabte ũssa judiuweꞌsxaꞌ vxitee kusete jxkaahnisaweꞌsxtaꞌ.
26 Naapkaçxhaꞌ cielute Jerusalen çxhabteweꞌsxaꞌ vxitee jxkaahni fxiꞌzesameetaꞌ. Kweꞌsxaꞌ kxteeweꞌsxthaꞌw thaakwesa.
27 Txãꞌsna weꞌweçxak Dxus librute naꞌjĩꞌ:
Uꞌy nasa jiꞌphuwaꞌjmeesaçxawa, nxusmée wẽt miiyajkxwe.
Weçxana sus mweꞌwewe, nasate yaakaniꞌs jiimeeçxawa.
Txãa paꞌgatey luuçx jiꞌphuwaꞌjmeesaçxawa,
Luuçx jiꞌphuwaꞌjsate jxthaakwe luuçx jiꞌphuna jĩꞌk.
28 Yakhthẽꞌjweꞌsx, kweꞌsxaꞌ Dxus puutx weꞌweçxaꞌ: Luuçx jiꞌphuneꞌkwe jĩk txãateweꞌsxthaꞌw Isaak naꞌwẽsa.
29 Txãa entewa maꞌwẽga selpiina fxiꞌzesa luuçxaꞌ Dxus puutx weꞌwenite kasehsa luuçxaꞌs ahçena kiite, ãçxhwa txãꞌwẽyçxáa yũuna ũstaꞌ.
30 Txãa ente txãꞌwẽ açepaꞌgak naꞌwẽ yũuniꞌs Dxus librute ptaꞌsxiꞌ: Txãa uꞌy selpisaꞌs pçxiꞌk íitx mkuutxiꞌj. Txãꞌwẽmeꞌ selpisáa nçxiꞌkaꞌ peekx nyuute nçxiꞌk yakh jaꞌdaçxah jxpaꞌgayaꞌ ãjameena ney nvxiitniꞌs jĩꞌk.
31 Nawa kweꞌsxaꞌ selpisáa nçxiꞌk naꞌwẽsameethaꞌw, wejxwa nyuute nçxiꞌk naꞌwẽsathaꞌw.
