Gálatas 6:1-18
6 Yakhthẽꞌjweꞌsxtxi neeweꞌweꞌth: Maa yakhthẽꞌjwa ãhmée yũuniꞌs jiyuçxaꞌ, txãꞌsaꞌ myuꞌkxpehwe, iꞌkweꞌsxaꞌ Dxus yakh çxhãçxha yãꞌj fxiꞌzesaiꞌkwe naa paꞌga. Nawa wala jxpaꞌyakx weeçx weꞌwemée myuꞌkxpehwe. Txãꞌwẽmeꞌ iꞌkweꞌsxtxiwa wetewaꞌj en paꞌjawáana.
2 Teeçxsa naꞌwẽçxah puutx yaꞌmpuꞌçxwe thẽyte fxiꞌzeniꞌs. Txãꞌwẽ yũuçxa Kristo jxkaahniꞌs kxtey yuusáa yuuneꞌkwe.
3 Kĩhtewa jwee yuꞌ thaakwe ewsameeçxa txãꞌwẽ iiwejçx yajkxçxaꞌ, ĩsxiisa yuuna.
4 Txãa paꞌga peekx fxiꞌzeniꞌs khuẽꞌy yaakxwaꞌj jiꞌphaꞌ ¿maꞌwẽsakiꞌth? sũhna. Txãꞌwẽ peekx fxiꞌzeni ewtewa jiyuçxa, wẽtwẽt yaakxwaꞌjaꞌ, nawa vxitesa fxiꞌzeniꞌs weeçxwaꞌj jiꞌphmeꞌ.
5 Teeçxsa naꞌwẽçxah peekx fxiꞌzeniçxáꞌs wala jxpaꞌyakxwaꞌjaꞌ.
6 Kristo jxkaahniꞌs kxtey yuuna kaapiyaꞌjsaꞌs puꞌçxwaꞌj jiꞌphaꞌ peekx jiꞌphuni kĩh yakhçxáawa.
7 Iꞌkweꞌsxaꞌ yaꞌjypubanuwe naa sũhna: Kĩhwa yũutewa, Dxusaꞌ txakwe yuꞌ jiyumeena sũhna. Dxusaꞌs kim yuhwa txãꞌwẽ yuꞌ yajkxna weeçxmeena. Iꞌkweꞌsx kĩh yũuçxawa txãꞌwẽysaíiçxáa jxpaꞌganeꞌkwe.
8 Meeçxawa peekx ũus yaakxni ewmeesaçxáꞌs kxtey yuusaꞌ, uuwaꞌjaꞌsçxáa jiꞌphuna txãꞌwẽ yũupaꞌga. Nawa Dxus Espiritu kaaũusutheꞌjniꞌs kxtey yuusaꞌ bagaçxte yuhwa pçumée ĩtxi fxiꞌzewaꞌjaꞌs jiꞌphuna.
9 Txãa paꞌga ew yũuwaꞌjçxáꞌs wahtxmée kxtey yuuna fxiꞌzewaꞌj jiꞌpthaꞌw. Txãꞌwẽ ew yũuwaꞌjaꞌs waꞌlmée kxtey yuuna ũsçxaꞌ, ewsaꞌs jxpaꞌgawaꞌj en ãhteꞌ, jxpaꞌgaꞌnjaꞌw.
10 Txãasa maꞌwẽn entewa vxitetx ew yũunaçxáa fxiꞌzewaꞌj jiꞌpthaꞌw, saꞌ Dxus yakh fxiꞌzesa kweꞌsx yakhthẽꞌjweꞌsx yuutxiꞌ wejx txãꞌwẽ ew yũuwaꞌj jiꞌpthaꞌw.
Peekx kakweteweꞌsxaꞌs yajkxmée Kristoçxáꞌs weçxani
11 Mthegwe, adx kuseju yuu ew ãate fxiꞌjaçthu, iꞌkweꞌsx jiyukahn.
12 Kristo kluuste uuniꞌs ptaꞌsxpaꞌga yaaçeni fxiꞌze wẽemeeçxaçxáa, txãꞌwẽ iꞌkweꞌsxtxiꞌ kaacirkuncidaĩꞌj wẽena ũstaꞌ.
13 Txãaweꞌsxaꞌ makwe yaꞌcirkuncidãyçxawa, ley jxkaahniꞌs jxuka yuꞌ kxtey yuꞌçmeetaꞌ. Nawa iꞌkweꞌsx yuutxiꞌ cirkuncidãykajaꞌtx, txãꞌwẽ kaacirkuncidaĩꞌthaꞌw sũhna weeçx weeçx yaakx wẽeçxatx txãꞌwẽ yuꞌ.
14 Nawa adxaꞌ kĩh yuhnawa weeçx weeçx yaakx wẽemeeth, naasáa kweꞌsxtxi jxpeꞌjsa Jesukristo kluuste uuni yuuçxáak adx ũuste wẽtwẽt kaaũusutheꞌjeꞌ. Kristo kluuste uupaꞌga adx yakhaꞌ naa kakweteweꞌsxaꞌ seelpisameꞌ. Txãasa adxaꞌ naa kakweteweꞌsxaꞌs nwẽeseꞌj wẽemeeth, uusáa naꞌwẽ.
15 Txãa paꞌgatey Kristo Jesus yakh fxiꞌzesa yakhaꞌ cirkuncidãyni maꞌk yuu meeçxaꞌ cirkuncidãynimée maꞌk yuu nawa txãꞌ kĩhwa meesaꞌ, naasáa ewmée ũus yaakxniꞌs yuꞌpthehçxa fxiꞌzenisaçxáa seelpisaꞌ.
16 Naꞌwẽth jxkaajaꞌ txãꞌsaꞌ kxtey yuuna fxiꞌzesaꞌ Dxus peeygãani ew fxiꞌzewaꞌjaꞌs jxpaꞌgatxna Dxus luuçx jxukaysaweꞌsx.
17 Ãçxhaꞌ naajũꞌ peena yuꞌ kimwa kuçx yuuni peejxmeeth. Kuçx yuukahmeníi adxaꞌ Jesusaꞌs selpisaath, txãa paꞌga pkxuuni kakwete snxal jiꞌpthu.
18 Yakhthẽꞌjweꞌsx, kweꞌsxtxi jxpeꞌjsa Jesukristoꞌ iꞌkweꞌsx jxukaysatx puꞌvxitumée puꞌçxhina.
