Apocalipsis 1:1-20
1 Naa txãꞌwẽ Dxus kaajiyuꞌjnisaꞌ Jesukristoꞌs, açaꞌ Jesukristoꞌ txãꞌsna selpisaatxku kaajiyuꞌjwaꞌjsa yuꞌ naa ensu seenaꞌ yũuwaꞌjaꞌs, kxajk Jesukristoꞌ txãꞌsna selpisáa Juanaꞌs kaajiyuꞌj teeçx angelaꞌs kweꞌweꞌjçxa.
2 Txãa paꞌgak Juanaꞌ Dxus yuwe isasaꞌs weꞌwe Jesukristo kaavxyaꞌjaꞌthe uyniꞌs jxuka, txãasa ĩsxĩinisameꞌ.
3 Naa paꞌga naꞌsna leeĩsaꞌ nxusmée weçxana yaakxwaꞌjsataꞌ, açaꞌ Dxus yuwe ayte naꞌwẽ fxiꞌjniꞌ txãꞌsna leeĩçte wẽseꞌjsawa isasa yuhna sũhna yajkxçxa kxtey yuusaꞌ weçxana yaakxwaꞌj jiꞌphtaꞌ. Txãꞌwẽmeꞌ kĩhwa seenaꞌ kxtey yuuwaꞌj enaꞌ utxaaçaꞌ.
Dxus nasa siete ahte pkhaakhesatx weçxani
4 Juan yaasesa adxthu fxiꞌjaꞌ Asia kiwete Dxus luuçx siete ahte pkhaakhesaweꞌsxtxi weçxana. Dxus yakh ewçxáa mfxiꞌzewe. Txãꞌ nyafxíiwa txãaíiçxáak yuꞌ, saꞌ ãçxwa txãaíiçxáꞌ, saꞌ txãaíiçxáa bagaçxtewa nes yuuna. Saꞌ Dxus tasxte ũssa siete espiritusaweꞌsx puꞌçxnitxwa mpaꞌgawe.
5 Saꞌ txãꞌwẽy Jesukristo puꞌçxniꞌswa mpaꞌgawe. Txãꞌ Dxus yuweꞌs jxuka ptaꞌsxsaꞌ txãak uuçxawa kiꞌ ĩtxĩ yuu nyafxte, saꞌ ãçxhaꞌ txãa jxkaajxaꞌ ãjãwaꞌjsaꞌ naa kiwete jxkaahsaweꞌsxtxi. Kristoꞌ kweꞌsxtxiꞌs peeygãhçxa kweꞌsx pkaltxiꞌs txajx eeju pkhiꞌkxku.
6 Txãꞌwẽ yũuçxak kweꞌsxtxiꞌs jxkaahsa vxiteꞌ sacerdote vxitçxa nvxiht Dxusaꞌs selpikahn. Saꞌ Kristo yuuçxáa kĩhtewa jxuka ãjãsa jxtuhthe yuuwaꞌjsaꞌ bagaçxtewa.
7 Txãꞌsaꞌ mthegwe, tãaphte yujaꞌ. Txãꞌsaꞌ jxukaysa uyuutxna, txãꞌsna kpãꞌvxit-sawa. Saꞌ uyçxaꞌ naa kiwete nasa jxukaysa ũꞌnetxna. Isath weꞌweꞌ, txãꞌwẽ yuh yuutxna.
8 Kweꞌsxtxi nweꞌwesaꞌ maꞌwẽ yũuwaꞌjaꞌswa ãjãwaꞌjsa weꞌweçxaꞌ: Adxaꞌ naa kiwe meetey ũsyãꞌth yuꞌ, saꞌ bagaçxtewa nes yuuwaꞌjsath pçuwaꞌjsamée jĩꞌk. Txãꞌ nyafxíiwa txãak yuꞌ, saꞌ ãçxwa txãaíiçxáꞌ, saꞌ txãaíiçxáa bagaçxtewa nes yuuna.
Dxus Nçxiꞌk nasa yuusáa vxyaani
9 Adxaꞌ Juan iꞌkweꞌsx yakhthẽꞌth. Txãasa iꞌkweꞌsx naꞌwẽy jaꞌdaçxah pxthaa yuuwaꞌjaꞌswa jxpaꞌgasath, saꞌ Dxus jxkaahni enaꞌswa jxpaꞌgasath iꞌkweꞌsx naꞌwẽy. Saꞌ Jesukristoꞌ kĩhtewa wantãywaꞌjaꞌs ũsku txãꞌsnawa iꞌkweꞌsx naꞌwẽy jxpaꞌgasath. Nawa naasáa Dxus yuweꞌs Jesukristo kaajiyuꞌkh txãꞌsna ptaꞌsxpaꞌga yuuçxáa adxaꞌ preesuth ũsuꞌ kiwe Patmos yaasesa yuꞌpxãhte uꞌpuꞌk kxtee.
10 Saꞌ teeçx kiꞌsen enteꞌ Dxus Espiritu aphniith yuu, saꞌ adx eꞌste trompetaꞌs tukani naꞌwẽ seenaꞌ sus weꞌweni wẽseꞌth.
11 Txãꞌ naꞌjĩꞌk:
—Kĩh yuhwa meetey adxaꞌ ũsyãꞌth yuꞌ, saꞌ bagaçxtewa nes yuuwaꞌjsath. Açaꞌ idx uyuuçgu txãatxiꞌs eçte fxiꞌjçxa mkaah Dxus luuçx siete ahte pkhaakhena ũssa Asia kiweteweꞌsxtxi, Efxeso, Esmirna, Pérgamo, Tiatira, Sardis, Fxiladelfxia, Laodicea txãa çxhabteweꞌsxtxi jĩteꞌ,
12 ¿Kimkiꞌk txãꞌwẽ weꞌwe? sũhçxa yuꞌthegçxaꞌ, uythu bela txaahnisa sietetx ũsuꞌ vxyuu behçxaçxáasa.
13 Saꞌ txãa bela txaahnisa ksxavxyte Dxus Nçxiꞌk nasa yuusáa naꞌwẽsak ũsuꞌ, ropa çxida vxiçte kĩhsa athçxa, jxtudnisawa vxyuu behçxaçxáasa peçxute kãh tapesak jiꞌphuꞌ.
14 Saꞌ dxkhas yuꞌ khas ew çxihme naꞌwẽtx yuꞌ, meeçxawa yãdx naꞌwẽ çxihme. Saꞌ yafx yuꞌ ipx beesa naꞌwẽtx yuꞌ,
15 naapkaçxhaꞌ txajx çxida yuꞌ, çamaꞌs ipxte aaçxaꞌjni naꞌwẽtx zhiçxkwe kwenteteꞌ. Açaꞌ txajx weꞌweni yuꞌ yuꞌwala seenaꞌ susni naꞌwẽk pthũuseꞌ.
16 Txajx kusete yuꞌ siete estrelxatxku jiꞌphuꞌ, naapkaçxhaꞌ txajx yuwesu yuꞌ espada pdxiꞌp seenaꞌ zeksak sẽhna ũsuꞌ. Açaꞌ txajx dxiꞌp yuꞌ sek kweethni naꞌwẽk eenaꞌ khikhyna ũsuꞌ.
17 Açaꞌ txãꞌwẽ uyçxaꞌ, txajx tasxga uuníi naꞌwẽth wete. Nawa txajx kuse paçuweꞌsxaꞌs adx kajkwete peekizeçxa naꞌjĩꞌk:
—Ũukhnu, naa kiwe meetey adxaꞌ ũsyãꞌth yuꞌ, saꞌ bagaçxtewa nes yuuwaꞌjsath pçuwaꞌjsamée.
18 Uuçxawa kiꞌ ĩtxĩ yuusath. Uuwaꞌjaꞌs peena yuꞌ jiꞌphuyaꞌmée adxthu knay, saꞌ uu kiwetewa kaafxiꞌzeꞌjmeꞌnja, txãasa ãçxhaꞌ bagaçxtewa ĩtxĩçxáa nes yuuwaꞌjsath.
19 Naꞌwẽ idx uygu txãatxiꞌ mfxiꞌj, ãçxh uynisa kiꞌ eꞌsu vxite uyuuneꞌga txãatxwa.
20 Adx paçu kusete siete estrelxatx uygu vxiteꞌ bela txaahni sietesatx txãꞌwẽsaꞌ naꞌwẽ kaajiyuꞌjsataꞌ: Txãa estrelxaꞌ Dxus luuçx siete ahte pkhaakhena ũssatx yuwee ptaꞌsxsa angelesweꞌsxtaꞌ, naapkaçxhaꞌ siete bela txaahnisaꞌ Dxus luuçx siete ahte pkhaakhesaweꞌsxtaꞌ jĩꞌk.
