Apocalipsis 10:1-11
10 Txajũꞌ Dxus angel vxite uythu seenaꞌ çxhãçxhasa cieluju tãaph pxãhte kĩjaçte, saꞌ dxikthete yuꞌ kxthũusku jiꞌphuꞌ. Txajx dxiꞌpaꞌ sek naꞌwẽk kweetheꞌ, saꞌ txajx çxida yuꞌ ipx naꞌwẽçxaçxáatx yuꞌ.
2 Kusete yuꞌ libru leꞌçxkwesaꞌsku phadeçxa jiꞌphuꞌ, saꞌ paçu çxidaju yuꞌ martek yuju, saꞌ jebu çxidajuꞌ kiwetek yuju.
3 Txãꞌwẽ yũuçxak sus weꞌwe león pebeeçxa maꞌwẽ sus seenaꞌ pebeekx txãꞌwẽ. Saꞌ txãꞌwẽ seenaꞌ pebeeçpkaçxhaꞌ, siete kpiꞌsx weꞌwenik pthũuse.
4 Txãꞌwẽ siete kpiꞌsx weꞌweniꞌs jiyuçxaꞌ, fxiꞌjyaꞌwath yuꞌ. Nawa cielujũ naꞌjĩna weꞌweniꞌsthu wẽseꞌj:
—Txãa siete kpiꞌsx weꞌwenitx jiyug txãatxiꞌs kim yuhtxwa ptaꞌsxna fxiꞌjnu jĩꞌk.
5 Txãjũꞌ txãa Dxus angel marte vxiteꞌ kiwete yujuçxa ũssaꞌ paçu kuseꞌs cielute kiisçxa
6 jurãyku bagaçxte yuhwa uumée ĩtxĩ fxiꞌzewaꞌjsa naꞌwẽ kĩjkĩhtxwa jxuka vxitku txajx yaseꞌs kxsusçxa naꞌjĩna:
—Ãçxhaꞌ jwee yuꞌ jxthẽeyuumeena.
7 Dxus angel sieteteweꞌsx txajx trompetaꞌs tujkayaꞌ takheçpkaçxhaꞌ, nmeh ente maꞌwẽ yũuwaꞌjaꞌs neꞌ Dxusaꞌ pheuꞌjçxa jiꞌphuꞌ txãꞌ jxuka kxtey yuuna. Saꞌ Dxus yuweꞌs ptaꞌsxna selpisaaweꞌsxtxi maꞌwẽneꞌ ptaꞌsx txãa yuꞌ jxuka kxtey yuuna jĩk.
8 Cielujũ weꞌweçxaꞌ eçte kuçx fxiꞌjnu jĩk txãꞌ kiꞌ weꞌwek adx yakh naꞌjĩna:
—Dxus angel naꞌwẽ paçu çxidaꞌs marte txahçxa vxite çxidaꞌs kiwete txahçxa ũssaꞌ kusete libru jiꞌphaꞌ txãa libruꞌs jxpaꞌgayaꞌ meꞌj jĩteꞌ,
9 Dxus angel tasxte utxaaçxa txãa libruꞌs pẽjxthu. Açaꞌ naꞌjĩnak ptaꞌsx:
—Jxpaꞌgaçxa mẽꞌ. Nawa iidx yuwete yuꞌ mil naꞌwẽ nxusxa pẽethejena, naapkaçxhaꞌ iidx tutxhte yuꞌ, wala seenaꞌ yajana jĩꞌk.
10 Txajũꞌ Dxus angel kuseju jxpaꞌgaçxa libruꞌs ũꞌth, açaꞌ adx yuwete yuꞌ mil naꞌwẽk nxusxa pẽetheeh, nawa adx tutxhte yuꞌ seenaꞌ wala yaak.
11 Txajũꞌ naꞌjĩnak jxkaah adxaꞌs:
—Naꞌwẽ Dxus kaajiyuꞌkh txãꞌsaꞌ ptaꞌsxyaꞌ kiꞌ uꞌjweneꞌga, çxhaab iisa, nasa msuuweꞌsxwa, fxiyfxiy weꞌwesa, jxkaahsaweꞌsx txãꞌwẽsatx jĩꞌk.
