Apocalipsis 11:1-19
11 Txajũꞌ isani khĩh ũsçxa naꞌwẽk jxkaah:
—Dxuus yat vxiteꞌ altal txãa makwetewa jiyuyaꞌ miisa, saꞌ Dxusna neeweꞌweyaꞌ kxtee uꞌkasa maazkuẽetewa jiyuyaꞌ miisa.
2 Nawa Dxus yatte patxu ekajuweꞌsx yuꞌsaꞌ isanu. Txãꞌwẽmeꞌ txajuweꞌsxaꞌs vxite nasatxku ũsni yuu, açaꞌ txãaweꞌsxaꞌ jxuka suwuutxna Dxus çxhab atesaꞌs kuarenta y dos aꞌte ãhpkaçx.
3 Naapkaçxhaꞌ adxna selpisáa eꞌz kajaꞌnja, adx yuweꞌs mil doscientos sesenta en ãhpkaçx ptaꞌsxna ũskahn. Txãaweꞌsxaꞌ nasa uute nxusna athnisa ropa khũçxsa jiꞌph yuutxna.
4 Txãa eꞌzsaweꞌsxaꞌ eꞌz oliwo fxtũ tasx ũsuꞌtx txãꞌwẽsataꞌ, vxiteꞌ bela txaahni eꞌz ũsuꞌtx naa kiwete Dxus tasxte txãꞌwẽsaíiçxáataꞌ.
5 Txãaweꞌsxtxiꞌ maaíi yuꞌ pkxuu wẽjẽwáatxna, nawa txãaweꞌsx yuwesu ipx kasehçxa jxuka kabuna açesaweꞌsxtxiꞌs. Açaꞌ txãꞌwẽ yũuteꞌ, maawa pkxuu wẽesaꞌ uu en jiꞌphutxna.
6 Açaꞌ txãa selpisaaweꞌsxaꞌ cieluꞌs aphyaꞌ ãjãwaꞌjsataꞌ, Dxus yuweꞌs ptaꞌsxwaꞌj en pçuupkaçx nus paꞌkhamen. Saꞌ yuꞌaꞌswa eeçxaçxáa vxit-yaꞌ ãjãçxa seenaꞌ wala kxũusuꞌjwaꞌjsataꞌ naa kiwete kĩh weewa nuypaꞌjna, txãaweꞌsxtxi maꞌwẽ yũuweçxtewa txãꞌwẽ yũutxna.
7 Nawa txãaweꞌsx mjĩiaꞌs jxãꞌjaçpkaçxhaꞌ, eçx iiméh seenaꞌsa kafx seenaꞌ dxiijũ kãhçxa txãaweꞌsxtxi puiiçxa knayçxa ikhena.
8 Txãaweꞌsx uuníi kakweꞌs naꞌwẽ kweꞌsxtxi jxpeꞌjsa kluuste uuk txãa çxhab wala klxiikhunsu wãataani yuutxna. Txãa çxhabaꞌs Sodoma vxiteꞌ Egipto naꞌwẽsaꞌ jĩꞌtx.
9 Açaꞌ tekh en ẽepxãh ãhpkaçx nasa maa çxhabuweꞌsx, maꞌwẽsa fxiyfxiy weꞌwesa, maa kiwejuweꞌsxwa jxukasa txãa uuníi kakwetxiꞌs uyuutxna, nawa kaapedaꞌj yuꞌ meetxna.
10 Txajũꞌ nasa naa kiweteweꞌsxaꞌ seenaꞌ wala weçxaatxna txãꞌwẽ uupaꞌga, saꞌ txãꞌwẽ weçxaweete txãaweꞌsx jiꞌphuniꞌs puutx peesutxna. Txãaweꞌsx yakh yuꞌ iiméh seenaꞌ wala ewmeesa naꞌwẽsa yuutxna txãa eꞌz piçthẽꞌjsa Dxus yuweꞌs ptaꞌsxna ũssaweꞌsxaꞌ, txãa paꞌga uuteꞌ wala weçxaatxna.
11 Nawa uuníi tekh en ẽepxãh skhẽwniijũꞌ, Dxusaꞌ ĩtxĩ vxitku açaꞌ kiꞌ kiitetx. Txãꞌwẽ yũuteꞌ, iiméh seenaꞌ wala ũukhtxi jxukaysa uyna ũssaweꞌsxaꞌ.
12 Txajũꞌ txãa eꞌz selpisaaweꞌsxaꞌ wẽseꞌjtx seenaꞌ sus weꞌweni cielujũ naꞌjĩna:
—Ayte cielute ẽete myuhwe jĩçpkaçxhaꞌ, tãaph pxãhte uꞌjçxa cielute tejkatx, txãaweꞌsxtxi açesaweꞌsx uyna ũste.
13 Txãꞌwẽ yuuçpkaçxhaꞌ, seenaꞌ wala ehd uꞌjçxa txãa çxhabaꞌs maꞌwẽ yuꞌ suwçxa ejx jxũna uꞌkh, açaꞌ siete mil nasatx uu txãa ehd uꞌphaꞌga. Txãꞌwẽ yũuteꞌ, nasa neeyũusaꞌ iiméh seenaꞌ wala ũukhçxa Dxus cielute ũssaꞌs pxthaa weꞌwena tuutheꞌjtx.
14 Txajũꞌ Juan weꞌweçxaꞌ: Seenaꞌ ũukhũukhsa eꞌzteweꞌsx yuꞌ skhẽwku, nawa jxthẽeyuumeena tekhteweꞌsxwa jĩꞌk.
Trompeta sieteteweꞌsx
15 Txajũꞌ Dxus angel sieteteweꞌsxwa txajx trompetaꞌs tujkak, açaꞌ seenaꞌ sus weꞌwenisa pthũuseꞌtx cielujũ naꞌjĩna:
Naa kiwete jxkaahna ũsnisaꞌ jxuka kweꞌsx Tata vxiteꞌ txajx Txhitxhnisa Kristo txãaweꞌsx jĩiçxaçxáatx yuuna paꞌj.
Açaꞌ ãçxhaꞌ txãaçxaçxáa jxkaajana bagaçxtewa jĩnatx weꞌwe.
16 Txajũꞌ Dxus luuçxtxi jxkaahsa weintikuatrosaweꞌsx Dxus jxkaahna ũsnite ũssaꞌ kiwete kĩiçhuçxa Dxusaꞌs neeweꞌwetx naꞌjĩna:
17 Kweꞌsxtxi jxpeꞌjsa idxaꞌs weçxaꞌthaꞌw, Dxus iiméh seenaꞌ walasag.
Idxaꞌ nyafxíiwa idxíiçxáag yuꞌ, saꞌ ãçxwa txãaíiçxáag, saꞌ bagaçxtewa idx yuuçxáa nes yuuwaꞌjsag.
Txãa paꞌgatey kĩhtewa jxuka ãjãwaꞌjaꞌs idxçxaçxáa jiꞌphgu,
Txãasa ãçxhaꞌ jxkaahna ũsgu.
18 Naa kiwete nasaꞌ idxaꞌs ahçetx, nawa txãaweꞌsxtxi kastigãywaꞌj enaꞌ ãjk.
Açaꞌ txãꞌwẽy uusaaweꞌsxtxiwa kastigaĩneꞌga.
Saꞌ walasa maꞌtx yuu meeçxaꞌ leꞌçxkwesa maꞌtx yuu nawa idx yakh txutemée fxiꞌzeçxa iidx yaseꞌs açeweꞌwesameeweꞌsxtxiꞌ deweeneꞌga ew yũuna iidx yuweꞌs ptaꞌsxna selpiina fxiꞌzepaꞌga.
Naapkaçxhaꞌ naa kiwete suwna ũssaweꞌsxtxiꞌs kaꞌtuꞌ ivxiituneꞌga jĩnatx weꞌwe.
19 Txajũꞌ cielute Dxus ũsni phatek, açaꞌ naꞌwẽ Dxusaꞌ nasa yakh puutx weꞌwek txãa puutx weꞌweniꞌs fxiꞌjçxa kajate jxaawni yuuk txãa kajaꞌ vxyaak. Naapkaçxhaꞌ kpiꞌsx kwehneçxa seenaꞌ susku kwetuba seenaꞌ wala ãsxna, açaꞌ ehdwa uꞌkh.
