Apocalipsis 12:1-17
12 Txajũꞌ ẽe walaju naꞌwẽk seenaꞌsa vxyaa: teeçx uꞌy txajx kakwete yuꞌ sekçxaçxáa jiꞌphsa aꞌtete yujuçxak ũsuꞌ, saꞌ dxikthete yuꞌ teeçx korona doce estrelxa jiꞌphsaꞌsku jiꞌphuꞌ.
2 Txãa uꞌyaꞌ nasatek ãçãꞌaç yuꞌ, saꞌ seenaꞌ wala pxthaa yakana pebeꞌk.
3 Txãa eꞌsuꞌ ẽe walaju kiꞌ vxite naꞌwẽk vxyaa: eçx behsa iiméh seenaꞌsa siete dxikthé jiꞌphsa, diez kaaçxuk jiꞌphuꞌ, saꞌ dxikthé iisa teeçx koronak jiꞌphuꞌ.
4 Txajx mezu yuꞌ estrelxatx puupxãhn ãatuwku suwçxa naa kiwekhẽ pũsx. Saꞌ txãa eçx seenaꞌsa yuꞌ uꞌy nasa kasejxaꞌ ũsuꞌk txãa yaçtek ũythasna yuju, nasa kasejeçpkaçxhaꞌ luuçxaꞌs ũꞌyaꞌ.
5 Txajũꞌ txãa uꞌyaꞌ teeçx luuçx pihçku jiꞌphu, txãak naa kiwete jxuka jxkaahwaꞌjsa yuꞌ iiméh wala juunaꞌ. Txajũꞌ txãa luuçxaꞌs kusaꞌjçxa, Dxus jxkaahna ũsnitek jxũna uꞌjni yuu.
6 Açaꞌ txãa uꞌyaꞌ nasa uꞌpnimée kiwetek ũphna uꞌj, txãa jĩi Dxus pheuꞌjçxa jiꞌphuneꞌ kxtee ũsyaꞌ. Kxtee paꞌtheꞌ, mil doscientos sesenta en ãhpkaçx sãꞌjĩni ũswaꞌjsaꞌ.
7 Txãa eꞌsuꞌ cielute puiiwaꞌkh uꞌpuꞌ, açaꞌ Dxus angel npiiçthẽꞌjsa Migwelaꞌ txajx angelesweꞌsx yakh puiitx eçx seenaꞌsa yakh. Açaꞌ eçx seenaꞌsawa txãa yakh ũssaweꞌsx yakh kasejk puiiyaꞌ.
8 Nawa eçxaꞌ knaymeꞌ, saꞌ txãaweꞌsxaꞌ cielute ũswaꞌj jiꞌphmeetx neeyũu.
9 Txãa paꞌga eçx seenaꞌsaꞌs ekaju wãataanik yuu, txãaíik txãniitey ul jĩnisa yuꞌ, naa kiweteweꞌsx jxukaysatx ĩsxĩina kaypubaꞌjsa Eçxthẽꞌkh yaase yuꞌ. Txãa eçxthẽꞌj vxiteꞌ txãa yakh ũssa jxukaysatx naa kiwekhẽ wãataanitx yuu.
10 Txajũꞌ cieluju sus weꞌwena naꞌjĩniꞌsthu wẽseꞌj:
—Ewte neeyũuwaꞌj en paꞌkh, kweꞌsx Dxus txãaçxaçxáa jxkaahwaꞌj en vxiteꞌ Dxus txhitxhnisa Kristowa txãꞌwẽy jxkaahwaꞌj en. Txãa paꞌgatey kweꞌsx yakhthẽꞌjweꞌsxtxi ewmeesataꞌ jĩna pãatxhĩꞌkhna ũssaꞌs ekaju wãataanik yuu, txãaíik bagaçxtewa puꞌvxitumée nes yuꞌ kweꞌsxtxi pãatxhĩꞌkhna.
11 Txãꞌwẽtewa, kweꞌsx yakhthẽꞌjweꞌsxaꞌ eçx ewmeesaꞌs knaytxi, naꞌwẽ Piisxakuẽ jĩnisa ikhni uuk txajx eeju vxiteꞌ txajx kaapiyaꞌjniꞌs puꞌvxitumée ptaꞌsxna fxiꞌzepaꞌga. Txãaweꞌsxaꞌ Kristoꞌs selpiipaꞌga uu en paꞌthewa txãꞌsaꞌ nxusmée uuyaꞌçxáatx ũsuꞌ.
12 Txãꞌwẽ ewmeesaꞌs knaypaꞌga weçxweçxa miiyajkxwe, cielute fxiꞌzesaweꞌsx jxuka. Nawa seenaꞌ yuh wala ũukhũukhaꞌ naa kiwete mteeweꞌsxwa jxukaysa yakhaꞌ. Txãꞌwẽ ũukhũukh yuukahníi eçxthẽꞌjaꞌ iꞌkweꞌsxtxi pkxuuyaꞌ kĩjk seenaꞌ wala ũusaçxana, saꞌ kuh enmée ũswaꞌjaꞌs jiiaꞌ txãasa txãꞌwẽ ũusaçxana ũsaꞌ.
13 Saꞌ txãa eçx seenaꞌsaꞌ kiwekhẽ wãataani yuuçxaꞌ, txãa uꞌy luuçx jiꞌphusaꞌs ikhyaꞌ pakwek.
14 Nawa txãa uꞌyaꞌs uuh wala fxu kuꞌta naꞌwẽsaꞌs ũsnik yuu, eçx seenaꞌsa tasxu iyuna uꞌjçxa nasa uꞌpnimée kiwete txajx ũswaꞌthe fxuhna uꞌkhan, kxteeaꞌ tekh anxu pxãhtepkaçx sãꞌjĩnik fxiꞌzewaꞌjsa yuꞌ.
15 Txajũꞌ txãa eçxaꞌ yuwesuk yuꞌ nuysẽh, yuꞌaꞌs seenaꞌ wala nuywalaaçxa txãa uꞌyaꞌs yuꞌ jxũna uꞌkhan.
16 Nawa txãa eçx yuwesu yuꞌsẽesaꞌs kiweꞌ jxuka çxazxaçxa txãa uꞌyaꞌs nweꞌwek.
17 12:17-18 Txãꞌwẽ yũuteꞌ, txãa eçx seenaꞌsaꞌ txãa uꞌyaꞌs jweeíiçxáak seenaꞌ wala ũusaçxa. Saꞌ txãa uꞌy jiꞌjweꞌsx yakh puiiyaꞌk uꞌj Dxus jxkaahnitxiꞌs nwẽeseꞌjna Jesukristo kaapiyaꞌjniꞌs jxpubamée nwẽeseꞌjsaweꞌsx yakh.
