Apocalipsis 13:1-18
13 Txãa eꞌsuꞌ mar pukateth yujuçxa ũsuꞌ, saꞌ uythu eçx seenaꞌ kazx ũukhũukhsa mar pxãjũ kasejeçte, saꞌ siete dxikthé jiꞌphçxa diez kaaçxuk jiꞌphuꞌ, kaaçxu iisa teeçx koronak jiꞌphuꞌ. Saꞌ txãa dxikthesu yuꞌ Kristoꞌs seenaꞌ kazx açeweꞌwenak fxiꞌjni yuꞌ.
2 Txãa eçx seenaꞌ kazx ũukhũukhsaꞌ txiklxi naꞌwẽk jxkajkwe yuꞌ, çxida yuꞌ oso naꞌwẽtx yuꞌ, saꞌ yuwe yuꞌ león naꞌwẽk yuꞌ. Açaꞌ eçxthẽꞌjaꞌ txãa eçx seenaꞌ kazx ũukhũukhsaꞌs kĩh yũuyaꞌwa ãjãwaꞌjaꞌs ũsçxa txajx jxkaahna ũsniꞌswa dukhku, saꞌ kĩhtewa jxuka puꞌçxyaꞌk neeyũu.
3 Txãa eçx seenaꞌ kazx ũukhũukhsa dxikthé teeçxsa yuꞌ uupçxãjk kpãꞌyuuni yuꞌ, nawa txãa kpãꞌ yuꞌ wẽetniyãꞌkh yuꞌ, açaꞌ naa kiwete nasa jxukaysa txãa eçx seenaꞌ kazx ũukhũukhsaçxáꞌstxi weçxana utxaaçxa neeweꞌwe.
4 Saꞌ eçxthẽꞌjaꞌswa weçxana neeweꞌwetx, txãꞌwẽ eçx seenaꞌ kazx ũukhũukhsaꞌs jxkaahwaꞌjsa vxitçxa kiꞌppaꞌga. Saꞌ eçx seenaꞌ kazx ũukhũukhsa yuꞌsaꞌ naꞌjĩnatx neeweꞌweꞌ:
—¿Kim naa naꞌwẽy seenaꞌsa ũski, saꞌ kim txãa yakh puiiyaꞌ çxhãçxhakx? jĩꞌtx.
5 13:5-6 Saꞌ eçx seenaꞌ kazx ũukhũukhsaꞌs kweꞌweꞌjnik yuu, Dxusaꞌs wẽesxuuna açeweꞌwekahn. Açaꞌ kxtey yuuçxa, Dxusaꞌs wẽesxuuçxa açeweꞌwena Dxus ũsniꞌswa açeweꞌwek, cielute ũssaweꞌsxtxiwa txãꞌwẽyku açeweꞌwe. Saꞌ txãak jxkaahwaꞌjsa yuu kuarenta y dos aꞌte ãhpkaçx.
6 —
7 Saꞌ Dxus luuçxtxi ahçeçxa gweçxaꞌswa vxit kaahnik yuu knaypkaçx. Txãasak naa kiwete jxukaysaweꞌsxtxi jxkaahwaꞌjsa yuu, nasa maꞌwẽsawa maa çxhabuweꞌsxwa fxiyfxiy weꞌwesawa jxukaysatx.
8 Açaꞌ naꞌwẽ Piisxakuẽ jĩnisa ikhni yuuk txãꞌ libru jiꞌphaꞌ bagaçxte yuhwa uuwaꞌjsamée yasetx fxiꞌjni, açaꞌ naa kiweteweꞌsx jxukaysa txãaweꞌsx yaseꞌs naa kiweꞌs vxitiynaçxáa yuhwa txãa librute fxiꞌjnimeesaꞌ jxukaysa txãa eçx kazx ũukhũukhsaꞌs neeweꞌwetx.
9 Txãa enteꞌ naꞌwẽ seenaꞌ yuutxna txãꞌsaꞌ mwẽeseꞌjwe:
10 Nasatx preesuꞌjsaꞌ txãaweꞌsxwa preesuꞌjni yuutxna. Açaꞌ nasatx kçxilxuh ikhsaꞌ txãaweꞌsxwa kçxilxuh ikhni yuutxna. Txãa paꞌga Dxus luuçxaꞌ Dxus yakh yuuçxáa çxhãçxha fxiꞌzewaꞌjaꞌs jiꞌphuwaꞌj peejxtaꞌ.
11 Txãa eꞌsuꞌ vxite eçx seenaꞌ kazxsa kiwe dxiijũ kãjaçte uythu. Txãꞌ piisxáa kaaçxu naꞌwẽsa eꞌzku jiꞌphuꞌ, nawa txãa eçx seenaꞌ kazx ũukhũukhsa naꞌwẽyku Kristoꞌs açeweꞌweꞌ.
12 Saꞌ eçx kazxsa nyafxteweꞌsx naꞌwẽy jxkaajxaꞌ ãjãwaꞌjaꞌsku jiꞌphuꞌ, txãasak naa kiwete nasa jxukaysatx jxkaajaꞌ, eçx naꞌwẽ dxikthete kpãꞌ seenaꞌsa jiꞌphuçxawa wẽetku txãꞌsna neeweꞌwekahn.
13 Saꞌ kĩjkĩhwa seenaꞌsaꞌswa kaavxyaꞌjaꞌjyaꞌ ãjãꞌk, cielujũ ipx wala seenaꞌsa kaakĩijiꞌjna naa kiwete nasa uyna ũste.
14 Eçx kazxsa nyafxteweꞌsx tasxte seenaꞌsaꞌs kaavxyaꞌjaꞌjyaꞌ ãjãçxa, naa kiwete nasa jxukaysatx kaypubaꞌkh Dxus yuwe ptaꞌsxsa naꞌwẽ kĩhwa kaavxyaꞌjaꞌjçxa. Saꞌ seenaꞌ dxikthete kpãꞌ jiꞌphçxawa uumée çxhãçxhak txãa naꞌwẽysa piisakaakh ĩtxĩmeesa.
15 Saꞌ eçx kazxsa kiwe dxiijũ kãasaꞌ txãa piisanisa ĩtxĩmeesaꞌs ĩtxĩ vxit-yaꞌ ãjãwaꞌjaꞌs jiꞌphuꞌk. Açaꞌ txãa ĩtxĩ vxitnisaꞌs neeweꞌwesamée yuutxiꞌsaꞌ kiwe dxiijũ kãasa eçxaꞌ kiikheꞌjwaꞌjsak yuꞌ.
16 Txajũꞌ eçx kiwe dxiijũ kãasaꞌ naꞌwẽk yũu jxukaysatx: leꞌçxkwesa, walasa, jiꞌphsa, jiꞌphmeesa, patron jiꞌphsa, patron jiꞌphmeesa, teeçx yuhwa nvxihtmée jxukaysatx iisawaꞌkhaakh paçu kusete meeçxawa dxiꞌpte.
17 Saꞌ txãa eçx kiwe dxiijũ kãasa yaseju iisawaꞌjniꞌs meeçxawa txãa yase numeroꞌs jiꞌphmeesa yuꞌ, kĩh yuhwa weyyaꞌ ãjãmeetxna, saꞌ txweyyaꞌwa ãjãmeetxna maa yuhwa.
18 Saꞌ txãa eçx kazxsa numeroꞌ kweꞌsx jiyunisaꞌ. Açaꞌ txãꞌsaꞌ jiyuwaꞌjsa ũsçxaꞌ, ũus miiyajkxwe: txãa numeroꞌ seiscientos sesenta y seisaꞌ.
